مەملەكەت باسشىسىنىڭ بيىلعى جىلدى «جۇمىسشى ماماندىقتارى جىلى» دەپ جاريالاۋى بۇل سالانىڭ تامىرىنا قان جۇگىرتە باستادى. قازىرگى تاڭدا ەلىمىزدىڭ بارلىق وڭىرىندە جۇمىسشى ماماندىقتارىنىڭ ماڭىزدىلىعىن ارتتىرىپ، جاستاردى وسى سالاعا تارتۋ ءۇشىن ءتۇسىندىرۋ جۇمىستارى جۇرگىزىلىپ جاتىر.
پرەزيدەنت تاپسىرماسىنا ساي قولعا الىنعان باعدارلار ەڭبەك نارىعىندا سۇرانىسقا يە ماماندىقتار بويىنشا بىلىكتى كادرلاردى دايارلاۋعا باعىتتالىپ وتىر. جالپى، قوعامدا ەڭبەك نارىعىنىڭ ۇدايى وزگەرىپ وتىراتىنى بەلگىلى. ءتىپتى ءبىر ماماندىق جويىلىپ جاتسا، جاڭادان ماماندىق پايدا بولىپ، سۇرانىس پەن ۇسىنىس قاتار كەلىپ جاتادى. مىنە، وسىندايدا ماماندىق تاڭداۋ وقۋ ورداسىنىڭ بىلىكتىلىگىن سىنعا سالادى. سول ءۇشىن ەڭ الدىمەن وقۋ ورداسى ساپالى مامان دايارلاۋ ءۇشىن ءوزىنىڭ ماتەريالدىق-تەحنيكالىق بازاسىن جاقسارتۋى كەرەك.
بۇل رەتتە بولاتجان بوزىمبايەۆ باسشىلىق ەتىپ وتىرعان «الماتى ەلەكترومەحانيكا كوللەدجى» نارىقتىڭ تالابىنا تولىق جاۋاپ بەرە الاتىن مەكەمە ەكەنىن دالەلدەپ وتىر. جاقىندا اتالمىش كوللەدج الاتاۋ اۋدانىنا قاراستى سابيلا مىرزاش قىزى باسشىلىق ەتىپ وتىرعان №82 جالپى ءبىلىم بەرەتىن مەكتەپپەن ءوزارا مەموراندۋمعا قول قويىپ، «ءبىر مەكتەپ – ءبىر داعدى» («One School – One Skill») جوباسىن قولعا الدى. «اۆتوەلەكتريك»، «ەلەكتر جابدىقتارىن مونتاجداۋشى» اتتى نەگىزگى ماماندىقتاردى تاڭداعان وقۋشىلار ءۇشىن اەمك كوللەدجىنىڭ ارنايى ءپان وقىتۋشىسى نالجىگىت بەكنۇر تەوريالىق دارىستەردى، ال اەمك كوللەدجىندە وقۋ وندىرىستىك-ىسى جونىندەگى باسشىنىڭ ورىنباسارى اسحات رايحان، ءپان وقىتۋشىلارى يگەنباي نۇربول، تولىبايەۆ قۋانىشبەك تاجىريبەلىك ساباقتاردى وتكىزۋدى باستادى.
· تاقىرىپقا وراي
ورىنشا اجەنوۆا، №82-جبب مەكتەبىنىڭ كاسىپتىك باعدار بەرۋ مامانى:
تاڭداعان ماماندىقتارىن يگەرەتىن بولادى
ارينە، مۇنداي جوبالار وقۋشىلاردىڭ قابىلەتتەرىن شىڭداپ قانا قويماي، بولاشاق كاسىبىندە پايدالى بولۋى مۇمكىن. ولار كاسىبي شەبەرلىكتىڭ باستاپقى داعدىلارىن الىپ، ەڭبەك نارىعىندا باسەكەگە قابىلەتتى ءارى ءبىلىم بەرۋ ۇيىمدارى مەن جۇمىس بەرۋشىلەر اراسىنداعى بايلانىستى نىعايتادى. سونداي-اق، جۇمىسشى ماماندىقتارىنىڭ بەدەلىن ارتتىرۋعا كومەكتەسەدى. الماتى قالالىق ءبىلىم باسقارماسىنىڭ ۇيىمداستىرۋىمەن ناۋرىزباي اۋدانىنداعى «وقۋشىلاردىڭ يننوۆاسيالىق شىعارماشىلىق ورتالىعىندا ارنايى جانە ورتا ءبىلىم بەرەتىن كوللەدجدەرىنىڭ قاتىسۋىمەن «WordSkills Kazakhstan» ستاندارتتارى بويىنشا «JasSkills Almaty – 2025» قالالىق كاسىبي شەبەرلىك چەمپيوناتى وتكەن ەدى.
وعان الماتى ەلەكترومەحانيكا كوللەدجى دايىنداعان «اۆتوەلەكتريك» ماماندىعىنىڭ «شاناق جوندەۋ» قۇزىرەتتىلىگى بويىنشا №82 جالپى ءبىلىم بەرۋ مەكتەبىنىڭ وقۋشىلارى قاتىسقان ەدى. جارىس شارتى بويىنشا جەڭىمپاز وقۋشىلار قالانىڭ كەز كەلگەن كوللەدجىنە گرانت جەڭىپ الدى. وقۋ جىلىنىڭ سوڭىندا «اۆتوەلەكتريك» جانە «ەلەكتر جابدىقتارىن مونتاجداۋشى» اتتى نەگىزگى ماماندىقتارىن تاڭداپ، تەوريالىق جانە پراكتيكالىق ءبىلىم العان №82 مەكتەپ وقۋشىلارى ەندى اەمك كوللەدجىنىڭ بازاسىندا تاڭداعان ماماندىقتارىن يگەرەتىن بولادى.