قازاقستاندىق بىرەگەي ءبىلىم بەرۋ جۇيەسى بار جاسوسپىرىمدەر الەۋمەتتىك جەلىسى شەت ەلدەردە ۇلكەن قولداۋ تاپتى. «Almaty aqshamy» گازەتىنىڭ 11ء-شى ناۋرىز كۇنى شىققان نومىرىندە «وڭاي! قولجەتىمدى! تۇسىنىكتى!» ماقالا اتاۋىمەن بالالار مەن جاسوسپىرىمدەرگە ارنالىپ جاسالعان العاشقى ISEN الەۋمەتتىك جەلىسىنىڭ مۇمكىندىكتەرى جايلى جازعان بولاتىنبىز. مىنە، كوپ ۋاقىت وتپەي، الماتىلىق ونەرتاپقىشتىڭ قوسىمشاسى بۇكىل الەمدە قولداۋ تاۋىپ، قانشاما بىلىمگە قۇمار جاستاردىڭ يگىلىگىنە اينالدى.
ISEN قوسىمشاسىن قۇراستىرۋشىلار ۇجىمىن ەڭ ءبىرىنشى بولىپ يسپانيا كورولى فيليپ VI رەسمي حات جولداۋ ارقىلى يگى ءىس جالعاسىن تابا بەرسىن دەگەن ىزگى تىلەگىن بىلدىرسە، اقش-تىڭ قازاقستانداعى باس كونسۋلى ەريك مەيەر الەۋمەتتىك جەلى مۇمكىندىكتەرىمەن تانىسىپ، جوباعا ساتتىلىك تىلەدى. حالىقارالىق ۇيىمدار ىشىنەن يۋنەسكو تەك جاسوسپىرىمدەرگە ارنالعان الەۋمەتتىك جەلىگە اسا قىزىعۋشىلىق تانىتىپ وتىر. جاقىندا گەرمانيا كانسلەرى انگەلا مەركەل بالالار مەن جاسوسپىرىمدەردىڭ ءبىلىم الۋ جولدارىنىڭ كەز-كەلگەنىن قولدايتىنىن جەتكىزىپ حات جولداعان. مۇنىڭ بارلىعى قازاقستاندىق ءبىلىم بەرۋ جۇيەسى جاڭا تەحنولوگيالاردى يگەرە باستاعانىن، ونەرتاپقىشتاردىڭ شەت ەلدەردە مويىندالا باستاعانىن بىلدىرەدى.
«ءبىزدىڭ قوسىمشا ISEN (International social of education network) دەپ اتالادى، ياعني اعىلشىن تىلىنەن اۋدارعاندا حالىقارالىق الەۋمەتتىك جەلى دەگەندى بىلدىرەدى. دەمەك، ءبىز تەك قازاقستاندىق جاستارعا عانا ەمەس، بۇكىل الەمنىڭ بالالارىنا ءبىلىمدى قولجەتىمدى ەتۋگە تىرىسىپ باعۋدامىز.
ءقازىر دامىعان كوپتەگەن مەملكەتەتتەر باسشىلارى: اقش، يسپانيا، گەرمانيا ءبىزدىڭ قوسىمشامەن تانىسىپ، ءبىزدىڭ قوسىمشامىزدى جاقسى باعالاۋدا. ءبىز ودان بولەك ۇلىبريتانيا كوروليەۆاسىنا، ساۋد ارابيا كورولىنە، جاپونيا يمپەراتورىنا حات جولدىپ، ولاردىڭ جاۋاپتارىن كۇتۋدەمىز. مەنىڭ ويىمشا ءبىزدىڭ جولداعان حابارلامامىز ولارعا ەندى جەتىپ، ءتيىستى ماماندار تالقىسىنا سالىنىپ جاتقان بولار. ءبىراق، بىزگە اعىلشىندار، نەمىستەر مەن يسپاندىقتار جاۋاپ بەرگەنىن نەگىزگە الساق، ولار دا تەكسەرۋ جۇمىستارىنان كەيىن عانا ءبىزدى باعالاعانىن تۇسىنۋگە بولادى. سول ارقىلى ءبىزدىڭ قوسىمشامىز جەر-جەرگە تانىلىپ، قازاقستاندىق قوسىمشامەن شەتەلدىكتەر دە قولدانسا دەيمىز»، - دەدى جوبا جەتەكشىسى نۇر قۇتتى.
اتالمىش جوبانىڭ باس ديرەكتورى نۇر قۇتتى ونلاين ءبىلىم بەرۋدەگى كەدەرگىلەر مەن كەلەڭسىزدىكتەردى نەگىزگە الا وتىرىپ، كومپيۋتەرمەن ەمەس، قاراپايىم ۇيالى تەلەفون ارقىلى ءبىلىم الۋ مۇمكىندىگىن قاراستىردى. ياعني بالالارعا وقىلاتىن كۋرستار ەڭ الدىمەن قولجەتىمدى، تۇسىنىكتى، قابىلداۋعا وڭاي بولۋى ءتيىس.
كوپفۋنكسيونالدى الەۋمەتتىك جەلىدە مەسسەندجەر دە، گەو-لوكاسيا، مۇعالىمدەرگە ارنالعان چات، وقىتۋ جۇيەسى مەن ىلەسپە اۋدارما سىندى كوپتەگەن قىزمەت تۇرلەرى بار. اسىرەسە، امەريكاندىق جاستار ىلەسپە اۋدارما فۋنكسياسىن پايدالانۋدا بەلسەندىلىك تانىتىپ، ەندى تەگىن ءبىلىم بەرۋ ساباقتارىن اعىلشىن تىلىنە اۋدارىلۋىن كۇتۋدە. جاقىندا ينستاگرام بەتىنە ۇقساس، جاسوسپىرىمدەرگە يكەمدەلگەن جاڭالىقتار لەنتاسى قوسىلدى.
مۇنداي العاشقى جوبانى شەتەلدىكتەر عانا ەمەس، قازاقستاندىقتار دا قۋانا-قۋانا قولداۋدا. قازىرگى ۋاقىتتا جوبا جەتەكشىسى اقپاراتتىق قولداۋ رەتىندە «قازاق گازەتتەرى» مەن «قازاق راديوسىنان» قولداۋ تاپقان.
ودان بولەك، ق ر ءبىلىم جانە عىلىم مينيسترلىگىنىڭ «رەسپۋبليكالىق وقۋ-ادىستەمەلىك قوسىمشا ءبىلىم بەرۋ ورتالىعىمەن»، بالالاردىڭ قۇقىقتارىن قورعاۋ كوميتەتىمەن ەكىجاقتى قولداۋ جۇمىستارى جونىندە مەموراندۋمعا قول قويىلعان. جاڭا قوسىمشا ق ر سيفرلىق دامۋ، يننوۆاسيالار جانە اەروعارىش ونەركاسىبى مينيسترلىگىنىڭ تەكسەرىسۋىنەن دە وتكەن. ياعني، مينيسترلىك اقپاراتتىق تەحنولوگيالار سالاسىنداعى ۆيدەوكونتەنتتى ISEN قوسىمشا بەتىندە جاريالاۋعا، الەۋمەتتىك جەلىدە جاريالانعان وقىتۋ كۋرستارىن وزدەرىنىڭ اقپارات كوزدەرىندە جاريالاۋعا كەلىسىم العان.
نۇر قۇتتىنىڭ ايتۋىنشا، ءقازىر وزگە دە مينيسترلىكتەرمەن كەلىسسوزدەر جۇرگىزىلۋدە. مىسالى، توتەنشە جاعدايلار مينيسترلىگىمەن بىرلەسە وتىرىپ، ءتۇرلى تابيعي اپاتتاردا ءوزىن-وزى ۇستاۋ ەرەجەلەرى جايىندا قوسىمشا ۆيدەولار ءتۇسىرۋ جوسپارلار بار. ماماندارمەن تىكەلەي جۇمىس ىستەۋ ارقىلى عانا بالالارعا ساپالى كونتەنت جاساۋعا بولاتىنىن جەتكىزدى. ءقازىردىڭ وزىندە بالالاردىڭ قۇقىعىن قورعاۋ كوميتەتىنىڭ ۆيدەوروليكتەرى قوسىمشادا جاريالدانىپ، وقۋعا بەرىلگەن. وندا بۋللينگتەن قورعانۋ، وتباسىنداعى زورلىق-زومبىلىقتان ساقتانۋ جولدارى، بالالاردىڭ قۇقىعى سىندى تاقىرىپتاردا پايدالى ۆيدەولار جاريالانعان.
«رەسپۋبليكالىق وقۋ-ادىستەمەلىك قوسىمشا ءبىلىم بەرۋ ورتالىعى» مەن بالالاردىڭ قۇقىعىن قورعاۋ كوميتەتىمەن بىرلەسە وتىرىپ، جاقىندا الەۋمەتتىك جەلىدە بايقاۋ جاريالانباق. بالالار قوسىمشادا ءتۇرلى پاندەر بويىنشا قۇراستىرىلعان تەستتەردەن ءوتىپ، جينالعان بالداردى وسى الەۋمەتتىك جەلىدەگى دۇكەندەر مەن قىزمەت كورسەتۋ نىسانداردا قاجەتتى زاتتارىن ساتىپ الۋعا جۇمساي الادى.
جينالعان ۇپايلاردى تاماقتانۋ مەن دۇكەندەرگە عانا قۇرتپاي، تەتارلار مەن كورمەلەرگە بيلەت الۋ ءۇشىن، ءتىپتى، قاجەتتى دارىلەردى ساتىپ الۋ ءۇشىن پايدالانۋعا بولادى. مۇنىڭ بارلىعى ءا.قاستەيەۆ اتىنداعى ونەر مۇراجايى، قازاق مەملەكەتتىك سيركى سىندى مادەني ورىندارمەن، گاۆايي اكۆاپارك دەمالىس ورىندارىنىڭ قولداۋىمەن مۇمكىن بولىپ وتىر. ودان بولەك الماتىلىق VIVA Pharm كومپانياسى دا قولداۋ كورسەتىپ، بالالارعا ارنالعان دارۋمەندەرمەن بولىسكەن. ال، دىنمۇحامەد قونايەۆ اتىنداعى قور ءبىلىم بەرۋدىڭ قولايلى ادىسىنە باعا بەرىپ، مۇمكىندىگىنشە قولداۋ كورسەتۋگە دايىن ەكەندەرىن بىلدىرگەن ەكەن.
جان-جاقتى سەرىكتەستىك پەن قولداۋ جۇمىستارى ءوز جەمىسىن بەرۋدە. ساباقتاردىڭ تاقىرىپ اياسى كەڭەيىپ، ءبىلىم بەرىپ قانا قويماي، پسيحولوگيالىق كومەك، توتەنشە جاعدايلار مەن كەلەڭسىز وقيعالاردان ساقتانۋ جولدارىن، بولاشاق ومىرگە يكەمدەۋدى ۇيرەتەتىن جاڭا فورماتتاعى پايدالى روليكتەر دە جۇكتەلە باستادى. مۇنىڭ بارلىعى قازاقستاندىق قوسىمشانىڭ جەتىلە تۇسكەنىن، الەمنىڭ تۇكپىر-تۇكپىرىنەن بالالار مەن جاسوسپىرىمدەردىڭ باسىن ءبىر جەلىدە قوساتىن ورتاعا اينالعانىن كورسەتەدى.