تابيعاتتىڭ بەرگەنىن پايدالانىپ، وعان ەش زيانىن تيگىزبەي ءومىر ءسۇرۋ.
بۇل جەتىسۋ وبلىسىنىڭ لەپسى اۋىلىندا تۇراتىن فارحات ابۋزياروۆتىڭ ومىرلىك ۇستانىمى. ءۇش اتادان بەرى ومارتاشىلىقپەن اينالىساتىن ول وزگە دە ارا وسىرۋشىلەرگە كومەكتەسىپ كەلەدى. كانىگى مامان جەر ءجانناتى جەتىسۋدا وندىرىلگەن بالدى جاپونيا، جۇڭگو جانە اراب ەلدەرى مەن ەۋروپاعا ەكسپورتتايدى، دەپ حابارلايدى Almaty-akshamy.kz.
24.kz مالىمەتى بويىنشا، فارحات ابۋزياروۆتىڭ قولىنداعى تۇتىندەتكىشتى كەزىندە ونىڭ اتاسى قولدانعان. ودان كەيىن اكەسى ەندى مىنە ءوزى پايدالانىپ ءجۇر. سوندىقتان وتباسى ءۇشىن ول كونە جادىگەردەي قۇندى. ۇرپاق ساباقتاستىعىن جالعاعان ۇل ءومىردىڭ ءمانىن ومارتاشىلىقتان تاپقان.
فارحات ابۋزياروۆ، ومارتاشى:
- ارالاردان كوپ نارسە ۇيرەنۋ كەرەك ادامدارعا. ولاردىڭ جۇمىس ىستەگەنى ءبىر بىرىمەن قارىم قاتىناسى ءبارى وتە دامىعان. ادامدار وعان جەتە المادى دەپ ويلايمىن. ولاردىڭ تاماق ىشكەنى جۇمىسى ءبارى دۇرىس قويىلعان. سونىڭ ءبىرازىن جاساسا جاقسى بولادى.
فارحات بالا كۇنىنەن ۇيرەنگەن ءىستى جالعاستىرىپ، ءبىلىم الۋ ءۇشىن ريازان قالاسىنداعى ومارتاشىلىق اكادەمياسىنا تۇسكەن. جارى زارينا ەكەۋى اتالعان جوعارعى وقۋ ورنىن قىزىل ديپلوممەن ءبىتىردى. ماماندىق الىپ ەلگە كەلگەن سوڭ ولار اتا كاسىپتى وركەندەتۋگە شىنداپ كىرىسەدى. ەرلى-زايىپتىلار ونشاقتى جىلدا ومارتا سانىن ارتتىرىپ، ءوز سالاسىنىڭ ناعىز مايتالمانىنا اينالدى.
فارحات ابۋزياروۆ، ومارتاشى:
- ءبىز ورگانيك بولعاننان كەيىن حيميالىق پرەپارات پايدالانبايمىز. ارالار بىرنەشە جىل قيىن جاعداي بولدى. ءقازىر ارالار ۇيرەنىپ كەتتى. مەن ومارتاشى مامانى بولعاننان كەيىن ارالار جاقسى بولىپ كەتتى. انا حيميانى بەرە بەرگەننەن ولار جامان بولىپ كەتەدى. يممۋنيتەتتەرى تۇسەدى. حيميا بەرمەسەڭ وزدەرى كۇش جزيناپ الادى. تابيعاتتىڭ كۇشى بەرەدى.
لەپسى اۋىلىنىڭ حالقى نەگىزىنەن ومارتاشىلىقتى كاسىپ ەتەدى. اۋا رايى قولايلى بولعان جىلى ولار مول ءونىم الىپ، ونى ساتا الماي قينالاتىن. سالاداعى وزەكتى ماسەلەنى شەشۋدى فارحات ۇسىندى. ول جەرگىلىكتى اتىمتاي جومارتتاردىڭ بىرىنە بالدى ىدىسقا قۇياتىن كاسىپورىن اشۋ كەرەكتىگىن ايتقان. باستاماسى قولداۋ تاۋىپ زاماناۋي سەح ىسكە قوسىلدى. ءوندىرىس جولعا قويىلعان سوڭ سالاداعىلار جاڭا باعىتتى يگەرە باستادى.
زارينا ابۋزياروۆا، تەحنولوگ:
- ءبىزدىڭ ايماق ەكولوگيالىق تازا بولعاندىقتان وسى جەردەگى جەمىس جيدەكتەرگە دە سۇرانىس كوپ. سوندىقتان ءبىز سۋبليماتور ساتىپ الدىق. قۇرىلعىمەن تاۋداعى بۇلدىرگەندى، تاڭقۋرايدى، وزگە دە وسىمدىكتەردى كەپتىرىپ شاي جاسايمىز. ازىرگە شايدىڭ ءتورت ءتۇرىن دايىندادىق. ولاردىڭ ءبارى پايدالى، ەمدىك شاي بولىپ ەسەپتەلەدى.
ومارتاشىلار اۋلەتى بال ونىمدەرىمەن قاتار ەندى كەپتىرىلگەن جەمىس-جيدەك ساتۋ ءىسىن دامىتۋدى جوسپارلاپ وتىر. وسىلايشا ولار شاعىن اۋىلدا تاعى ءبىر سالانىڭ نەگىزىن قالاپ، ءوندىرىستى وركەندەتپەك.