دەنساۋلىق ساقتاۋ ءمينيسترى اقمارال ءالنازاروۆا قازاقستان ازاماتتارى مىندەتتى الەۋمەتتىك مەديسينالىق ساقتاندىرۋ (ءمامس) ءۇشىن تولەگەن قاراجات ادام قايتىس بولعان جاعدايدا نەمەسە ەلدەن كوشىپ كەتكەندە قايدا كەتەتىنى تۋرالى سۇراققا جاۋاپ بەردى، - دەپ حابارلايدى اqshamnews.kz ءتىلشىسى.
بريفينگتە "بىزدەن مىندەتتى تۇردە ۇستالىپ جاتقان بۇل جارنالار مۇرا بولىپ قالمايدى، ال زەينەتاقى جيناعىن (تۋىستارى – رەد.) مۇرا ەتە الادى. ەگەر ادام شەتەلگە كوشىپ كەتسە نەمەسە قايتىس بولسا، بۇل ميللياردتارعا كىم يە بولادى؟" دەگەن سۇراق قويىلدى.
مينيستر ءالنازاروۆانىڭ ايتۋىنشا، زەينەتاقى مەن ساقتاندىرۋ جارناسىنىڭ ايىرماشىلىعىن ءتۇسىندىردى.
"ءبىرىڭعاي جيناقتاۋشى زەينەتاقى قورىندا جيناقتاۋ جۇيەسى بار، ونى كەڭىرەك قولدانۋعا بولادى. ال ساقتاندىرۋ جارنالارى ساقتاندىرۋ جارنالارى رەتىندە قاراستىرىلادى. كەز كەلگەن ساقتاندىرۋ ءتۇرى سەكىلدى ءسىز جارنا تولەيسىز، ءبىراق وعان تەك ساقتاندىرۋ جاعدايى قاجەت بولعاندا يەلىك ەتەسىز. ءمامس كونتەكستىندە بۇل - سىرقاتتانۋ، شۇعىل ەمدەۋ قاجەتتىلىگى سەكىلدى جاعدايلار"، – دەدى اقمارال ءالنازاروۆا.
ءمينيستردىڭ ايتۋىنشا، مەديسينالىق ساقتاندىرۋ قورىندا جينالعان بارلىق قاراجات ەمدەۋگە، الدىن الۋ شارالارىنا – ياعني، 20 ميلليون قازاقستاندىققا مەديسينالىق قىزمەت كورسەتۋگە باعىتتالادى.
"نەگىزگى پرينسيپ – دەنى ساۋ ادام اۋىرىپ قالعان ادام ءۇشىن، باي ادام كەدەي ادام ءۇشىن تولەيدى. بۇل – قور قۇرىلعان ساتتەن باستاپ كوزدەلگەن ۇجىمدىق جاۋاپكەرشىلىك. قور بۇل ۇستانىمدى بۇگىندە كەزەڭ-كەزەڭىمەن جۇزەگە اسىرىپ كەلەدى"، – دەپ تۇيىندەدى مينيستر.