2022 جىلى جولدارعا 814 تەكسەرىس جۇرگىزىلدى
ومبى-مايقاپشاعاي جول قۇرىلىسىنىڭ بىتپەي جاتۋىنا 21 ميلليارد تەڭگەنىڭ تالان-تاراجعا ءتۇسۋى سەبەپ بولۋى مۇمكىن. وڭىردەگى سىبايلاس جەمقورلىققا قارسى قىزمەت قىلمىستىق ءىس قوزعادى. ءقازىر بۇل باعىتتا اتقارىلىپ جاتقان جۇمىستارعا تەكسەرىس كۇشەيتىلدى، دەپ حابارلايدى Zakon.kz.
جالپى ولكەدەگى جولداردا زاڭسىزدىقتار ءجيى انىقتالىپ جاتىر. بۇعان وتكىزىلگەن رەيد ناتيجەلەرى ايعاق. ومبى-مايقاپشاعاي جول قۇرىلىسى بويىنشا ءالى ءبىر وڭعان ناتيجە جوق.وسى جازدا اياقتالۋ كەرەك بولعان جوبا تاعى ەكى جىلعا سوزىلدى. تالاي سەبەپ ايتىلدى. ەندى ول قاتارعا جەمقورلىق تا قوسىلۋى مۇمكىن. قۇزىرلى ورگان وكىلدەرى مەردىگەر كومپانيا وتە قوماقتى قاراجاتتى قالتاسىنا سالۋى ىقتيمال ەكەنىن مالىمدەدى، - دەپ حابارلادى "حابار-24".
«قالباتاۋ مايقاپشاعاي اۆتوجول قۇرىلىسىنا قاتىستى 21 ميلليارد تەڭگەنى ماقساتسىز پايدالانۋ، ياعني تالان-تاراجعا ءتۇسۋ فاكتىسى بويىنشا سوتقا دەيىنگى تەرگەۋ تىركەلدى. ول ءالى جالعاسىپ جاتىر. قۇجاتتار تولىق جيناقتالعان سوڭ پروسەسسۋالدى شەشىم شىعارىلادى»، - دەيدى شقو سىبايلاس جەمقورلىققا قارسى قىزمەت دەپارتامەنتىنىڭ باسشىسى دەنيس شاكەنوۆ.
رەسپۋبليكالىق ماڭىزدى جولداردا عانا ەمەس، ءتىپتى وبلىس ىشىندەگى جەرگىلىكتى باعىتتاعى جول قۇرىلىسى دا زاڭسىزدىققا تۇنىپ تۇر.
«2022 جىلى جولدارعا 814 تەكسەرىس جۇرگىزىلدى، 60-دەن اسا بۇزۋشىلىقتار انىقتالدى. مىڭ شاقتى سىناما الىندى جولداردان، ءقازىر تەكسەرىس جۇرگىزىلىپ جاتىر»،- دەدى ول.