قوستاناي وبلىسىنا جۇمىس ساپارى بارىسىندا پرەمەر-مينيستر ولجاس بەكتەنوۆ ءوڭىردىڭ الەۋمەتتىك-ەكونوميكالىق دامۋ پەرسپەكتيۆالارى، وندىرىستىك كاسىپورىندار جانە كادرلىق الەۋەتتى ارتتىرۋ ماسەلەلەرىن تالقىلادى. سونىمەن قاتار، ءبىرىڭعاي ۋاقىت بەلدەۋىنە كوشۋ ماسەلەسى ەرەكشە نازارعا الىندى، دەپ حابارلايدى aqshamnews.kz
كەزدەسۋدە تۇرعىندار ءبىرىڭعاي ۋاقىت بەلدەۋىنە كوشۋ تابيعي ۋاقىتقا سايكەس كەلىپ، كۇندەلىكتى تۇرمىستى جەڭىلدەتكەنىن ايتىپ، بۇل شەشىمدى قولدادى.
پرەمەر-مينيستر بۇل شەشىمنىڭ تەرەڭ عىلىمي زەرتتەۋلەر نەگىزىندە قابىلدانعانىن اتاپ ءوتتى. ول 2017 جىلى امەريكالىق عالىمداردىڭ ادامنىڭ سيركادتىق ىرعاعىن زەرتتەگەنى ءۇشىن نوبەل سىيلىعىمەن ماراپاتتالعانىن ەسكە سالدى. عىلىمي دالەلدەر تابيعي ۋاقىت بەلدەۋىنە سايكەستىكتىڭ ادام دەنساۋلىعى مەن ءال-اۋقاتىنا وڭ اسەر ەتەتىنىن كورسەتەدى. بۇل نەگىزدە 2022 جىلى بارسەلونا دەكلاراسياسى قابىلدانىپ، 80-نەن استام ەلدىڭ عالىمدارى مەن ساياساتكەرلەرى تابيعي ۋاقىت بەلدەۋىنە كوشۋدى قولدادى.
«قازاقستان ءۇشىن تابيعي ۋاقىت بەلدەۋى – ءبىز ءقازىر ءومىر ءسۇرىپ جاتقان UTC+5. بۇرىن ءبىز ديرەكتيۆالىق تارتىپپەن تابيعي ەمەس UTC+6 بەلدەۋىندە ءومىر سۇردىك. بۇل شەشىم كەيبىر ادامدار ءۇشىن باستاپقىدا قولايسىزدىق تۋدىرۋى مۇمكىن، ءبىراق ۋاقىت وتە اعزا بەيىمدەلەدى. ءبىز ازاماتتاردىڭ ءومىرىن بارىنشا جەڭىلدەتۋ ءۇشىن جارىقتاندىرۋ، كەستە ۇيىمداستىرۋ جانە باسقا دا ينفراقۇرىلىمدىق شارالاردى جۇزەگە اسىرامىز»، – دەدى پرەمەر-مينيستر.
كەزدەسۋدە زاۋىت ۇجىمدارى ەڭبەك جاعدايلارى مەن قولداۋ شارالارىن تالقىلادى. ولجاس بەكتەنوۆ مەملەكەت باسشىسى جاريالاعان «جۇمىسشى ماماندىقتارى جىلى» قارساڭىندا ەڭبەككەرلەردىڭ قۇقىعى مەن ءال-اۋقاتىن قامتاماسىز ەتۋگە باسا نازار اۋدارىلاتىنىن ايتتى.