الماتى اۋەجايىندا ونى جانكۇيەرلەرى قارسى الدى.
الماتى اۋەجايىنان توكيو-2021 وليمپياداسىنىڭ قولا جۇلدەگەرى ەلدوس سمەتوۆتى تۋعان-تۋىستارى، باپكەرلەرى، دوستارى مەن سپورتتاعى ارىپتەستەرى سالتاناتپەن قارسى الدى، دەپ حابارلايدى Almaty-akshamy Exk.kz cىلتەمە جاساپ.
تاڭعى رەيستى كۇتىپ الۋعا ەلدوستىڭ جاقىندارىنان بولەك، ءوز بەتىنشە قۇلاعدار بوپ كۇتىپ الۋعا كەلگەن جانكۇيەرلەرى دە كوپ جينالدى. سپورت مەكتەپتەرىنىڭ جاس تۇلەكتەرى «ەلدوس — چەمپيون! العا، قازاقستان!»، «جارايسىڭ، ەلدوس! سەن چەمپيونسىڭ!» دەگەن سەكىلدى پلاكاتتار ۇستاپ، گۇل شوقتارىمەن كۇتىپ الدى. ۇلتتىق كيىم كيگەن قىزدار القالاپ، جاس اقىن دومبىرامەن ارناۋىن تولعادى. اجەلەر قازاقتىڭ سالت-داستۇرىمەن شاشۋ شاشىپ، دوستارى ەلدوستى توبەسىنە كوتەردى.
«اۋەلى ەلىمە، جەرىمە، وتانداستارىما، اتا-اناما العىس ايتقىم كەلەدى. شەت ەلدە دودادا ءجۇرىپ، سىزدەردىڭ قولداۋلارىڭىزدى سەزىندىم. بۇل ءبىزدىڭ 5 جىل كۇتكەن ءدۇبىرلى دودامىز، ۇلكەن ءبىر سىنىمىز بولدى. وزدەرىڭىزگە بەلگىلى، پاندەميا بار الەمگە قيىنشىلىقتار، اۋىرتپالىقتار الىپ كەلدى. ونىڭ كەرى اسەرى سپورتقا دا تيمەي قويمادى. ءبىراق مەن ءوزىمدى 100 پايىز دايىن سەزىندىم، كۇش-جىگەرىمدى تولىقتاي قولدانىپ، ءوزىمدى كورسەتە ءبىلدىم دەپ ايتا الامىن. امال نە، التىن مەدال بۇيىرمادى. ءبىراق، حالقىم مەنىڭ قولا جۇلدەمدى التىن مەدالداي قابىلداپ جاتىر. ماعان ەڭ باستىسى — ەلىمنىڭ، جەرىمنىڭ ريزاشىلىعى. حالقىمنىڭ قۋانىشىنا ءوزىم دە ريزا بولىپ تۇرمىن»، –دەدى ەلدوس جۋرناليستەرگە بەرگەن شاعىن سۇحباتىندا.