امەريكالىق ءانشى دجەننيفەر لوپەس الماتىدا وتكەن كونسەرتىندەگى قىزىق وقيعاعا پىكىر ءبىلدىردى، - دەپ حابارلايدى aqshamnews.kz ءتىلشىسى.
10 تامىزدا ساحنادا ءان ايتىپ تۇرعاندا ونىڭ موينىنا شەگىرتكە قونعان ەدى.
دجەننيفەر بۇل تۋرالى The Tonight Show Starring Jimmy Fallon باعدارلاماسىندا ايتتى. ونەر يەسى سول كەزدە العاشىندا نە بولعانىن ءوزى دە تۇسىنبەي قالعانىن مويىندادى.
"بىرنارسە سەزدىم، ءبىراق شامداردىڭ جارىعىنان ۇشىپ جۇرگەن جاندىك شىعار دەپ ويلادىم. ال كەيىن، جوق، دەنەمدە بىرنارسە ورمەلەپ بارا جاتقانىن بايقادىم!" - دەدى ءانشى كۇلىپ.
باعدارلاماداعى كورەرمەندەر دە كۇلكىگە قارىق بولدى، ال دجەي لو شەگىرتكەنىڭ قالاي "قونعانىن" ساحنادا كورسەتىپ بەردى. ول ءوزىن ۇستاپ، سابىر ساقتاۋعا تىرىسقانىن دا ايتتى.
"ول مەنى قىدىقتاپ جاتتى. ىشتەي: "جارايدى، ءاندى ءبىتىرىپ الايىن"، - دەپ ويلادىم. ال سىلكىپ جىبەرگەننەن كەيىن جارىقتا نە ەكەن دەپ قاراسام، تىكۇشاقتاي ۇلكەن شەگىرتكە ەكەن!" - دەپ ازىلدەدى لوپەس.
بۇل وقيعا جەلىدە مەمگە اينالدى. قولدانۋشىلار "دۇنيەدەگى ەڭ باقىتتى شەگىرتكە"، "ونى 500 دوللارعا اۋكسيونعا قويۋ كەرەك" دەپ قالجىڭدادى. ال كەيبىرەۋلەر لوپەستىڭ كاسىبيلىگىنە تاڭدانىسىن ءبىلدىردى.
"مەن ونىڭ ورنىندا بولسام، ايقايلاپ ساحنادان قاشىپ كەتەر ەدىم. ال ول ءانىن توقتاتپادى!" - دەپ جازدى جەلى قولدانۋشىلارى.
دجەننيفەر مۇنداي توسىن جاعدايلار كونسەرتتە ءجيى بولاتىنىن ايتتى.
"ساحنادا نە بولارىن بىلمەيسىڭ. ءبىراق ەڭ باستىسى - ءبارىن اياعىنا دەيىن جەتكىزىپ، كورەرمەنگە شوۋ سىيلاۋ"، - دەدى ول.
ايتا كەتەيىك، 10 تامىزدا الماتىنىڭ ورتالىق ستاديونىندا دجەننيفەر لوپەستىڭ قازاقستان تاريحىنداعى العاشقى كونسەرتى ءوتتى.