ويىن بالالارى ارەكەتىن كامەرادان تىس جەردە جاساعان
«ويىننان وت شىقتى». قونايەۆ قالاسىنداعى №5 ورتا مەكتەپتىڭ وقۋشىلارى سىنىپتاستارىن تالدىرىپ كورىپ، اجالمەن ويناعان. جۇرتتىڭ زارەسىن العان قورقىنىشتى ويىننان سەگىزىنشى سىنىپتىڭ وقۋشىسى زارداپ شەگىپ، تىستەرى سىنعان، دەپ حابارلايدى Almaty-akshamy.kz Almaty.tv-گە سىلتەمە جاساپ.
اۋزى-مۇرنى قانجوسا بولعان ءجاسوسپىرىم ءقازىر ەم الىپ جاتقان كورىنەدى.
بۇل قورقىنىشتى كادرلەردە ويىن بالاسى ويىننان وت شىعارىن بىلمەستەن، سىنىپتاسىن قابىرعاعا قىسىپ الىپ تالدىرىپ جاتىر. جيىرما رەت وتىرىپ تۇرعىزىپ، دەمى تارىلعاندا كەۋدەسىن قىسىپ قالادى. ميعا وتتەگى جەتپەگەن وقۋشى ون سەكۋندقا و دۇنيەگە اتتانا جازداپ، ەسىنەن تانادى.
«وقۋشىلار ەمەس ءقازىر ۇلكەندەردىڭ ءوزى كىرىپ كەتەتىن بولدىق قوي. زامان سونداي بولىپ كەتتى مە؟! تاربيەنىڭ ءبارى وتباسىنان باستالادى عوي. ولاردى باسقا باعىتقا سپورتقا، ۇيىرمەلەرگە تاربيەلەۋ كەرەك. بوس ۋاقىتى كوپ»، – دەدى اتا-انا ەردەن ادىلبەكوۆ.
وقۋشىنىڭ ويىن ويراندايتىن ويىندارعا ءقازىر جەلى دە جۇرت قارسى بولىپ جاتىر. ەڭ سوراقىسى ولار تۇزدەن كورگەنىن مەكتەپتە جاساپ كورەدى.
سىنىپتاستارى تىنىسىن تارىلتىپ، دەمىن تەجەپ، قاس-قاعىم ساتتە تالدىرىپ ويناعان جاعداي ءدال وسى جەردە بولعان. ويىن بالالارى بۇل ارەكەتىن ادەيى كامەرادان تىس جەردە جاساعان. ءتىپتى ەسىكتى جاۋىپ قالقالاپ قويعان. ال مەكتەپ باسشىلىعى بارلىق اتا-انامەن تۇسىندىرمە جۇمىسىن جۇرگىزگەن. ەندى ءبىلىم ورداسىنداعى باقىلاۋدى كۇشەيتپەك.
«ۇنەمى جۇمىس جاساپ وتىرامىز. سەمينارلار وتكىزەدى. اتا-انالارمەن دە جۇمىس جاسايمىز. ۆەبينارلار دا وتەدى، ءبىز قاتىسامىز. بۇل جەردە مەنىڭشە ەكى جاقتىڭ دا كىناسى بولىپ تۇر. ءبىزدىڭ دە كانىمىزدى جوق دەپ ايتا المايمىن. ويتكەنى باقىلاۋ بولماعان بولماعان»، – دەدى №5 ورتا مەكتەپ ديرەكتورىنىڭ مىندەتىن اتقارۋشى ماقپال تولەۋحان قىزى.
«بۇل ىسكە قاتىستى ءقازىر وقۋ بولىمشەسىنىڭ جاۋاپتى وكىلدەرىمەن قاتاڭ تارتىپتىك ەسكەرتۋ جۇرگىزىلدى. سونىمەن قاتار باسقا دا مەكتەپتەر اراسىندا الدىن-الۋ شارالارى جۇرگىزىلدى. زارداپ شەگۋشى مەن ونىڭ دەنساۋلىعىن نۇقسان كەلتىرگەن وقۋشىلار ارنايى ەسەپكە الىندى»، – دەدى قونايەۆ قپب اعا ينسپەكتورى، پوليسيا مايورى گۇلميرا تۋرينا.
دەنساۋلىعىنا ورتاشا جاعدايدا نۇقسان كەلگەن وقۋشى ءقازىر الماتىدا ەم الىپ جاتىر دەيدى سىنىپ جەتەكشىسى. بالانىڭ اتا-اناسى ازىرگە تولىق اقپار بەرە قويماپتى.