الماتى قالاسى پوليسيا دەپارتامەنتىندە العاشقى وفيسەرلىك شەندەردى تابىستاۋدىڭ سالتاناتتى ءراسىمى ءوتتى، - دەپ حابارلايدى Aqshamnews.kz.
بۇل كۇن جەكە قۇرام ءۇشىن ايرىقشا ماڭىزعا يە بولىپ، قىزمەتكە دەگەن سەنىمنىڭ، جاۋاپكەرشىلىكتىڭ جانە زاڭ مەن قوعامعا ادال قىزمەت ەتۋدىڭ جاڭا كەزەڭىنىڭ باستالۋىن ايقىندادى. سالتاناتتى ساپتا جاس پوليسەيلەرمەن قاتار، يىعىندا كوپجىلدىق قىزمەتتىڭ تاجىريبەسى بار بىلىكتى قىزمەتكەرلەر دە تۇردى. اتالعان ءراسىم بۋىندار ساباقتاستىعىنىڭ جارقىن كورىنىسىنە اينالىپ، پوليسيا قىزمەتىنە ءتان داستۇرلەر مەن قۇندىلىقتاردىڭ، كاسىبي باعدارلاردىڭ اعا بۋىننان جاس وفيسەرلەرگە بەرىلەتىنىن ايقىن كورسەتتى.
ءىس-شاراعا الماتى قالاسى پوليسيا دەپارتامەنتىنىڭ باستىعى ايدىن كابدۋلدينوۆتىڭ تىلەگى ەرەكشە مازمۇن مەن رۋحاني سەرپىن سىيلادى. ول ءوز سوزىندە پوليسيا وفيسەرى ماماندىعىنىڭ ماڭىزىنا توقتالىپ، ازاماتتار مەن مەملەكەت الدىنداعى جوعارى جاۋاپكەرشىلىكتى اتاپ ءوتتى.
– العاشقى وفيسەرلىك شەن – بۇل تەك قىزمەتتىك كيىمنىڭ ءبىر بولىگى ەمەس. ول – سەنىمنىڭ، كەمەلدىكتىڭ جانە جاۋاپكەرشىلىكتى مويىنعا الۋعا دايىندىقتىڭ بەلگىسى. سىزدەر پوليسيانىڭ قالىپتاسقان ءداستۇرىن جالعاستىرىپ، كۇندەلىكتى ەڭبەكتەرىڭىزبەن ونىڭ بولاشاعىن قالىپتاستىراسىزدار. انتقا ادال بولىپ، كاسىبي تۇرعىدا وسە بەرۋلەرىڭىزگە جانە ازاماتتاردىڭ قۇرمەتىنە يە بولۋلارىڭىزعا تىلەكتەسپىن، – دەدى ايدىن كابدۋلدينوۆ.
سالتاناتتى ءراسىم ءاربىر قاتىسۋشى ءۇشىن تەك ماڭىزدى قىزمەتتىك وقيعا عانا ەمەس، ءومىر بويى ەستە قالاتىن تاريحي تاعىلىمدى ساتكە اينالدى.