وتىرىستا وڭىرلىك قاۋىپسىزدىكتىڭ جاڭا جاعدايلارىندا ەكسترەميزم مەن تەرروريزم قاتەرلەرىنە قارسى ءىس-قيمىل ماسەلەلەرى قارالدى، دەپ حابارلايدى almaty-akshamy.kz
قاۋىپسىزدىك كەڭەسىنىڭ ءتوراعاسى اۋعانستاندا بولىپ جاتقان وقيعالارعا بايلانىستى بۇل ماسەلەنىڭ وزەكتىلىگى ارتا تۇسكەنىن اتاپ ءوتتى.
نۇرسۇلتان نازاربايەۆ اۋعانستانداعى جاعداي بۇگىنگى تاڭدا ورتالىق ەۋرازيا كەڭىستىگىندەگى ماڭىزدى وزگەرىستەرگە تۇرتكى بولىپ، ۇزاق مەرزىمدى سىن-قاتەرلەر تۋدىرىپ وتىرعانىن ايتتى. وسىعان وراي وڭىرلىك قاۋىپسىزدىكتىڭ قازىرگى تەتىكتەرىن نىعايتىپ، جاڭا مەحانيزمدەر قالىپتاستىرۋ كەرەكتىگىنە توقتالدى.
قازاقستاننىڭ تۇڭعىش پرەزيدەنتى ەكسترەميزم مەن تەرروريزم كورىنىستەرىنە قارسى جان-جاقتى دايىندىقتى قامتاماسىز ەتۋ كەرەكتىگىنە نازار اۋداردى.
– وڭىرلىك قاۋىپسىزدىككە تونگەن جاڭا سىن-قاتەرلەر قورعانىس قابىلەتىن ودان ءارى كۇشەيتۋ شارالارىن تالاپ ەتىپ وتىر. قازاقستان ارمياسى زاماناۋي وزىق ستاندارتتارعا ساي بولۋعا ءتيىس. قارۋلى كۇشتەردىڭ جاڭعىرۋىن، قورعانىس ونەركاسىبى كەشەنىنىڭ دامۋىن ايقىندايتىن بارلىق بازالىق قۇجاتتار بەكىتىلدى. قازىرگى تاڭدا ەڭ باستىسى – ءبىز قابىلداعان شەشىمدەردىڭ ءبارى دۇرىس ورىندالۋىن قامتاماسىز ەتۋ، – دەدى قاۋىپسىزدىك كەڭەسىنىڭ ءتوراعاسى.
سونداي-اق، ازاماتتاردىڭ قاۋىپسىزدىگىن ارتتىرۋ باعىتىندا قۇقىق قورعاۋ جۇيەسىندە جۇزەگە اسىرىلىپ جاتقان ۇدەمەلى رەفورمالاردىڭ ماڭىزدىلىعى اتاپ ءوتىلدى.
ەلباسى قوعامداعى تىنىشتىق پەن كەلىسىم مەملەكەتتىڭ تۇراقتى دامۋىنىڭ نەگىزى ەكەنىنە توقتالىپ، ۇلتتىق رۋحاني كەڭىستىگىمىزدىڭ قاۋىپسىزدىگىن قورعاۋ ماڭىزدى ەكەنىن ايتتى.
قاۋىپسىزدىك كەڭەسىنىڭ ءتوراعاسى مەملەكەتتىڭ تۇراقتىلىعىنىڭ قوعامدىق-ساياسي جانە الەۋمەتتىك-ەكونوميكالىق بولىگىن ۇنەمى باقىلاۋ قاجەت ەكەنىن اتاپ ءوتتى.
– ازاماتتاردىڭ ناقتى كىرىسىن ارتتىرۋ، ساپالى جۇمىس ورىندارىن اشۋ، شاعىن جانە ورتا بيزنەستى دامىتۋ، ازىق-تۇلىك قاۋىپسىزدىگىن قامتاماسىز ەتۋ، وسىنىڭ بارىنە ەكونوميكانىڭ ءوسىمى ارقىلى قول جەتكىزەمىز. دەنساۋلىق ساقتاۋ مەن ءبىلىم بەرۋدى قولداۋ، ازاماتتاردىڭ وزەكتى ماسەلەلەرىن شەشۋ ءاردايىم مەملەكەتتىك ورگانداردىڭ باستى نازارىندا بولۋعا ءتيىس. مۇنىڭ ءبارى – قازاقستاندىقتاردىڭ الەۋمەتتىك ءال-اۋقاتى مەن سەنىمدىلىگىنىڭ كەپىلى. ەكسترەميزم مەن راديكاليزمنىڭ ورىستەۋىنە جول بەرۋگە بولمايدى، – دەدى قازاقستاننىڭ تۇڭعىش پرەزيدەنتى.
جيىندا پرەمەر-مينيستردىڭ ورىنباسارى – سىرتقى ىستەر ءمينيسترى م.تىلەۋبەردىنىڭ، ۇلتتىق قاۋىپسىزدىك كوميتەتىنىڭ ءتوراعاسى ك.ءماسىموۆتىڭ، اقپارات جانە قوعامدىق دامۋ ءمينيسترى ا.بالايەۆانىڭ باياندامالارى تىڭدالدى.
وتىرىس قورىتىندىسى بويىنشا نۇرسۇلتان نازاربايەۆ وڭىرلىك قاۋىپسىزدىك سالاسىنداعى ۇلتتىق مۇددەءمىزءدى قورعاۋعا، ازاماتتاردىڭ قاۋىپسىزدىگىن قامتاماسىز ەتۋگە جانە قوعامنىڭ ورنىقتى دامۋىنا باعىتتالعان ءبىرقاتار ناقتى تاپسىرما بەردى.