قازاقستان رەسپۋبليكاسىنىڭ تۇڭعىش پرەزيدەنتى – ەلباسى نۇرسۇلتان نازاربايەۆ ەل تۇرعىندارىن جەڭىس كۇنى مەرەكەسىمەن قۇتتىقتادى، دەپ حابارلايدى Almaty-akshamy.kz Inform.kz-كە سىلتەمە جاساپ.
«قۇرمەتتى قازاقستاندىقتار!
بارشاڭىزدى ۇلى جەڭىس كۇنىمەن شىن جۇرەكتەن قۇتتىقتايمىن! بۇل قاستەرلى كۇن حالقىمىزدىڭ ەرەن ەرلىگى مەن بىرلىگىنىڭ، قاھارماندىعىنىڭ سيمۆولى بولىپ سانالادى. ءبىز بۇگىن سوعىس قۇرباندارىنىڭ رۋحىنا تاعزىم ەتىپ، ارداگەرلەرگە قۇرمەت كورسەتەمىز. ولاردىڭ مايدانداعى وجەتتىگى مەن تىلداعى ەڭبەگى تۋعان ەلگە دەگەن قالتقىسىز سۇيىسپەنشىلىكتىڭ جانە قايسارلىقتىڭ جارقىن ۇلگىسى ەكەنى ءسوزسىز»، - دەدى ن.نازاربايەۆ.
تۇڭعىش پرەزيدەنت جيىرماسىنشى عاسىرداعى ەڭ سۇراپىل سوعىستاعى جەڭىس وڭايلىقپەن كەلمەگەنىن ەسكە سالدى.
«وتان ءۇشىن وت كەشكەندەردىڭ ەرلىگىن ۇمىتپاۋ، ارداگەرلەرگە قامقورلىق كورسەتۋ – بارشامىزدىڭ قاسيەتتى بورىشىمىز. باتىر بابالارىمىزدىڭ قاھارماندىعى قازىرگى تىنىش زاماندا دا ءبىزدىڭ بويىمىزعا جىگەر بەرەدى. ول اۋىزبىرلىك، پاتريوتتىق، قايسارلىق جانە وتانعا دەگەن ماحاببات ارقىلى كەز كەلگەن قيىندىقتى جەڭىپ، بەيبىت ءارى باقۋاتتى ومىرگە قول جەتكىزۋگە بولادى دەگەن سەنىمىمىزدى نىعايتا تۇسەدى. ۇلى جەڭىس كۇنىندە بارشاڭىزعا مىقتى دەنساۋلىق، باياندى باقىت پەن جاقسىلىق تىلەيمىن! اسپانىمىز ءاردايىم اشىق بولسىن!»، - دەدى نۇرسۇلتان نازاربايەۆ.