نۇرسۇلتان نازاربايەۆ جاڭا قىزمەتكە ۇسىنىلدى

ەلباسىنى جاڭا قىزمەتكە قاسىم-جومارت توقايەۆ ۇسىندى

نۇرسۇلتان نازاربايەۆ ازياداعى ءوزارا ىقپالداستىق جانە سەنىم شارالارى جونىندەگى كەڭەستىڭ دانالار كەڭەسىنىڭ باسشىسى قىزمەتىنە ۇسىنىلدى، دەپ حابارلايدى Almaty-akshamy.kz

Egemen.kz باسىلىمىنىڭ جازۋىنشا، بۇل باستامانى ق ر سىرتقى ىستەر ءمينيسترىنىڭ ورىنباسارى اقان راحمەتۋللين نۇر-سۇلتاندا وتكەن سىرتقى ىستەر مينيسترلەرىنىڭ كەزدەسۋىندە ايتتى.

«بۇگىن دانالار كەڭەسى تۋرالى ەرەجەنى قابىلداۋىمىز كەرەك. مۇشە مەملەكەتتەر كونسۋلتاتيۆتى-كەڭەسشى ورگان قۇرۋدى قولدادى جانە مۇشەلىككە كانديداتتاردى ۇسىنا باستادى. بۇگىن دانالار كەڭەسى تۋرالى ەرەجەنى بەكىتەمىز. تاڭەرتەڭ كەزدەسۋدە پرەزيدەنت قاسىم-جومارت توقايەۆ نۇرسۇلتان نازاربايەۆتى اوسشك جەتەكشىلىگىنە كانديدات رەتىندە ۇسىندى. ءبارىڭىز بۇل كانديداتۋرانى قولدايسىزدار دەپ ۇمىتتەنەمىن»، - دەدى راحمەتۋللين. 

ازياداعى ءوزارا ىقپالداستىق جانە سەنىم شارالارى جونىندەگى كەڭەس – ازيا قۇرلىعى مەملەكەتتەرىن بىرىكتىرەتىن حالىقارالىق فورۋم. نەگىزگى مىندەتى – تۇراقتىلىق پەن قاۋىپسىزدىكتى قامتاماسىز ەتۋ ماقساتىندا ازيا مەملەكەتتەرى اراسىنداعى قارىم-قاتىناس پەن ىنتىماقتاستىقتى نىعايتۋ.

كەزدەسۋدى شاقىرۋ يدەياسىن العاش رەت نۇرسۇلتان نازاربايەۆ 1992 جىلى قازاندا بۇۇ باس اسسامبلەياسىنىڭ 47-سەسسياسىندا ۇسىنعان بولاتىن.