ەل پرەزيدەنتى قاسىم-جومارت توقايەۆتىڭ حالىققا جولداۋى اسا ءبىر تاريحي قيىن، كۇردەلى كەزەڭدە، حالىقارالىق قارىم-قاتىناس، ەكونوميكالىق تىرشىلىكتىڭ اقساپ تۇرعان تۇسىندا جانە ىشكى ساياسي تۇتاستىعىمىزعا ىقپال ەتەتىن الەۋمەتتىك-ەكونوميكالىق پروبلەمالاردىڭ ورىن العان كەزەڭىندە جولدانىپ وتىر. بۇل جولداۋىندا قاسىم-جومارت كەمەل ۇلى، ەڭ اۋەلى، حالىقتىڭ الەۋمەتتىك-تۇرمىستىق جاعدايىنا ءمان بەردى. پرەزيدەنتىمىز ەكىنشى – ازىق-تۇلىك باعاسىنىڭ تۇراقسىزدىعىنا ەرەكشە توقتالدى. قازىرگى تاڭدا ءار جەردە ءار ءتۇرلى باعامەن ساتىلىپ جاتقان ازىق-تۇلىككە جول بەرمەۋ كەرەكتىگى ايتىلدى. ءۇشىنشى مەنىڭ كوكەيىمە قونعان نارسە – حالقىمىزدىڭ 40 پايىزىنان استامى اۋىلداردا تۇرادى عوي. بۇگىندە جەردى شەتەلدىكتەرگە ساتۋعا جانە جالعا بەرۋگە تىيىم سالىنعانى بەلگىلى. ال ەندى اۋىلدى جەتىلدىرۋ ءۇشىن جەردى يگەرۋ ماسەلەسىنە قاتتى نازار اۋدارىلدى. مەملەكەت باسشىسى جايىلىمدىق جەرلەردى ورىنسىز پايدالاناتىندار شارۋا قوجالىقتارىنىڭ وسىپ-ونۋىنە مۇمكىندىك بەرمەي وتىر دەگەندى اشىپ ايتتى. بۇل - بۇرىن ايتىلا قويماعان اششى اقيقات.
تاعى ءبىر ايتا كەتەتىن ماسەلە – قانشاما رىنوكقا تاۋەلدى ەلمىز دەگەنمەن، بىزگە رىنوكتى مونوپوليزاسيالاۋ، بەلگىلى ءبىر مۇددەلى توپتاردىڭ، سولاردىڭ عانا جەتەگىندە كەتۋ حالىقتىڭ تۇرمىسىنىڭ جاقسارۋىنا، ەركىن دامۋىنا مۇمكىندىك بەرمەيدى.
سونداي-اق، جولداۋدا وقۋ-اعارتۋ ىسىنە بايلانىستى ءبىرسىپىرا اشىق اڭگىمەلەر ايتىلدى. سونىڭ ىشىندە مەنىڭ كوكەيىمە قونعانى، مىنا عىلىمدى دامىتۋ، گرانت مەرزىمىن 5 جىلعا كوشىرۋى مەن گرانتتىڭ ورىندالۋىن تەكسەرىپ وتىرۋى. بۇل اينالىپ كەلگەندە، ەلدىڭ ىشكى دامۋىن قامتاماسىز ەتەتىن كريتەريي دەپ ەسەپتەيمىن. مۇعالىمدەرگە بيىل دا جاقسى ءمان بەرىلىپ جاتىر. ارينە، بالالاردىڭ ساۋاتتى، ءبىلىمدى بولۋى ماڭىزدى، ول ءبىزدىڭ بولاشاعىمىز. الايدا، بيۋدجەتتەن قامتاماسىز ەتىلىپ وتىرعان باسقا دا ماماندار بار. مادەنيەت نەمەسە سپورت بولسىن، الداعى 2022 جىلدىڭ 1 قاڭتارىنان باستاپ وسىنىڭ ءبارىنىڭ جالاقىسىن وسىرەدى جانە ارعى جىلداردا دا 20 پايىزدان قوسىپ وتىرۋدى جالعاستىرماق. وسىلايشا ەلدىڭ تۇرمىستىق جاعدايىن كوتەرەدى.
جولداۋ بارىسىندا رەسپۋبليكاداعى ەڭ تومەنگى جالاقى كولەمىن 42 500 تەڭگەدەن 63 000 تەڭگەگە دەيىن كوتەرۋ تۋرالى تاپسىرما بەرىلدى. ودان كەيىن تۇرعىن ءۇي ماسەلەسى سىندى تاقىرىپتاردى قامتۋ ەلدىڭ ەكونوميكالىق، الەۋمەتتىك جاعدايىن رەتكە كەلتىرۋدىڭ ناقتى ۇسىنىستارى بولىپ تۇر. ونىڭ ۇستىنە، ورتا ازيانىڭ تاعدىرى گەوساياسي تۇرعان ورنىنا بايلانىستى ءقاۋىپ توندىرۋگە قولايلى دەسەك بولادى. اۋعانستاندا بولىپ جاتقان جاعداي بۇل وتە ۇلكەن ماسەلە. وسى جاعدايدا ساياسي قىراعىلىق تانىتىپ، پرەزيدەنتىمىز الەۋمەتتىك-تۇرمىستىق جاعدايدى رەتتەۋدى ءتيىستى ۇكىمەت ورگاندارىنا ناقتىلاپ بەردى.
سونىمەن قاتار، مەملەكەت باسشىسى ەكپە الۋعا قارسى ۇگىتتەپ جۇرگەندەردىڭ جەتەگىندە كەتپەگەنىمىز ءجون دەيدى. ەلدى اداستىرماۋ كەرەك. ەكپە الۋعا قارسى ادامدار وزدەرىنىڭ عانا ەمەس، وزگەلەردىڭ ءومىرى ءۇشىن جاۋاپتى ەكەنىن تۇسىنگەنى ابزال.