انكارادا نۇرعيسا تىلەندييەۆتىڭ 100 جىلدىق مەرەيتويىنا وراي تۇركسوي ۇيىمى اياسىنداعى ەسكە الۋ جىلىنىڭ اشىلۋ ءراسىمى ءوتتى، دەپ حابارلايدى aqshamnews.kz.
ءىس-شاراعا تۇركسوي باس حاتشىسى سۇلتان رايەۆ، قازاقستاننىڭ تۇركياداعى ەلشىسى ەركەبۇلان ساپييەۆ، انكارا مۋزىكا جانە ونەر ۋنيۆەرسيتەتىنىڭ رەكتورى، تۇركى الەمى ونەر ۋنيۆەرسيتەتتەرى كەڭەسىنىڭ باسشىسى ەرحان وزدەن، قازاقستاننان ارنايى كەلگەن ونەرپازدار، ديپلوماتتار، دەپۋتاتتار مەن قازاق دياسپوراسى قاتىستى.
اشىلۋ سالتاناتى انكارانىڭ اتاقتى «تۇركى الەمى» مۋزىكا توبىنىڭ ن.تىلەندييەۆ شىعارمالارىن ورىنداۋىمەن باستاۋ الدى. ودان ءارى قوناقتار كومپوزيتوردىڭ فوتوكورمەسىنىڭ تۇساۋىن كەسىپ، ن.تىلەندييەۆ مەموريالدى مۋزەيىنىڭ عىلىمي قىزمەتكەرى نۇرمۇحان شايمەردەنوۆ كەلگەن قوناقتارعا ۇلى كۇيشىنىڭ ونەر جانە ءومىر جولىمەن تانىستىردى.
ە.ساپييەۆ ءوز سوزىندە «نۇرعيسا تىلەندييەۆتىڭ مۋزىكاسى بىزگە تەك ونەردىڭ بيىگىن كورسەتىپ قانا قويماي، ەلىمىزدىڭ مادەنيەتىنە جانە ۇلتتىق بىرەگەيلىگىنە دەگەن سۇيىسپەنشىلىكتى ارتتىرادى. ونىڭ ەلى ءۇشىن سىڭىرگەن ەڭبەگى ۇرپاقتان-ۇرپاققا ۇلگى بولىپ قالارى ءسوزسىز» ەكەنىن جەتكىزدى.
تۇركسوي باس حاتشىسى سۇلتان رايەۆ نۇرعيسا تىلەندييەۆتىڭ تەك قازاق جۇرتىنا عانا ەمەس بۇكىل تۇركى الەمىنە بەلگىلى تۇلعا بولعانىن العا تارتتى. قازاقستاننان ارنايى كەلگەن قازاق مەملەكەتتىك اكادەميالىق فيلارمونياسىنىڭ ديرەكتورى اقان ءابدۋالي، ن.تىلەندييەۆ اتىنداعى اكادەميالىق فولكلورلى-ەتنوگرافيالىق «وتىرار سازى» وركەسترىنىڭ كۇيشىسى ارسەن تۇرسىن، انكاراداعى قازاق ستۋدەنتتەرىنەن قۇرالعان «وتاۋ» ءانسامبلى كومپوزيتوردىڭ كەرەمەت شىعارمالارىن ورىنداپ، ءىس-شاراعا ەرەكشە اتموسفەرا سىيلادى.