نۇرلان نوعايەۆ ماڭعىستاۋ وبلىسى جۇرتشىلىعىنا العىسىن ايتىپ، ريزاشىلىعىن ءبىلدىردى، دەپ حابارلايدى almaty-akshamy.kz.
«قۇرمەتتى ماڭعىستاۋلىقتار، ءقادىرلى جەرلەستەر! وزدەرىڭىزبەن بىرگە ءوڭىرىمىزدىڭ دامۋى مەن يگىلىگى ءۇشىن جۇمىس ىستەۋ مەن ءۇشىن ۇلكەن مارتەبە بولدى. ءۇش جىلعا جۋىق ۋاقىت بۇرىن مەملەكەت باسشىسى قاسىم-جومارت كەمەل ۇلى توقايەۆ ماعان ماڭعىستاۋ وبلىسىن باسقارۋدى تاپسىردى، وسى ۇلكەن سەنىمى ءۇشىن پرەزيدەنتىمىزگە راحمەت ايتامىن. ماڭعىستاۋداعى قىزمەتىم بارىسىندا ءاردايىم پرەزيدەنتىمىزدىڭ قولداۋىنا يە بولىپ، ءبىلىمىمدى، كاسىبي، ومىرلىك تاجىريبەلەرىمدى، بىلىكتىلىگىمدى ءوڭىردىڭ دامۋىنا جۇمسادىم»، — دەدى ول Telegram كانالىنا جازعان ۇندەۋىندە.
ونىڭ سوزىنشە، ءوندىرىس ورىندارىن، شارۋاشىلىقتاردى، تۇرعىنداردى ساپالى سۋمەن قامتاماسىز ەتۋ، ماەك-تىڭ ۇزدىكسىز جۇمىسىن قامتاماسىز ەتۋ، ينجەنەرلىك جەلىلەردى جاڭارتۋ، نەگىزسىز بولىنگەن جەر تەلىمدەرىن قايتارۋ جانە زاڭسىز قۇرىلىستارمەن كۇرەسۋ باعىتىندا، ت. ت. اۋقىمدى جۇمىستار اتقارىلعان.
«وسى ءۇش جىل ىشىندەگى وبلىس يگىلىگى ءۇشىن بىرلەسكەن ناتيجەلى ەڭبەكتەرىڭىز ءۇشىن شىن جۇرەكتەن العىس ايتامىن. ارىپتەستەرىمە، ءار دەڭگەيدەگى دەپۋتاتتىق كورپۋسقا، بارلىق كاسىپورىندار ۇجىمىنا، جاستارعا، قوعامدىق جانە ەتنومادەني بىرلەستىكتەرگە، قۇرمەتتى ارداگەرلەرگە — بارشا ماڭعىستاۋلىقتارعا شىنايى العىسىمدى بىلدىرەمىن! اشىق اسپان استىنداعى مۇراجاي اتانعان وسىناۋ كيەلى ولكەدە وتكەن كەزەڭ مەنىڭ جۇرەگىمدە جىلى ەستەلىك بولىپ ماڭگى ساقتالادى. ماڭعىستاۋ — ەكونوميكاسى نىق، دامۋ الەۋەتى زور ءوڭىر. ەڭ باستىسى ءوز ەلىن سۇيەتىن، ونىڭ گۇلدەنۋى ءۇشىن بارىن سالاتىن رۋحى بيىك حالقى بار. سىزدەرگە بارلىق جاقسىلىقتى تىلەي وتىرىپ، تابىس پەن جاڭا جەتىستىكتەرگە جەتە بەرۋلەرىڭىزگە شىن جۇرەكتەن تىلەكتەسپىن»، — دەدى نۇرلان نوعايەۆ.