«الماتى – ءبىزدىڭ ورتاق ءۇيىمىز» ناۋقانى باستالعالى بەرى 30 مىڭنان استام جاپىراقتى اعاش جانە 5 مىڭ بۇتا وتىرعىزىلدى، دەپ حابارلايدى almaty-akshamy.kz.
مىسالى، نيۋ-يوركتىڭ ايگىلى ورتالىق ساياباعىندا 18-دەن 25 مىڭعا دەيىن اعاش بار. كوبىنەسە الەمدە جاپىراقتى اعاشتاردان تۇراتىن ۇلكەن ساياباقتار «قالانىڭ وكپەسى» سانالادى.
الماتى اكىمى ەربولات دوسايەۆتىڭ باستاماسىمەن اعاشتاردى جاپپاي وتىرعىزۋ 27 ساۋىردە ءوتتى. اكسيا بارىسىندا قالانىڭ بارلىق اۋدانىندا بارلىعى 8 205 جاسىل جەلەك، ونىڭ ىشىندە 4 مىڭنان استام الما اعاشى وتىرعىزىلدى.
سونىمەن قاتار، «جاسىل اۋلا» اكسياسى اياسىندا قالا تۇرعىندارىنا 3 مىڭ كوشەت، «الماتى – ب ا ق قالا» جالپىقالالىق اكسياسى بارىسىندا 8 مىڭنان استام كوشەت تاراتىلدى.
بيىل 19 ساۋىردە بارلىق جالپى ءبىلىم بەرەتىن مەكتەپتەردە «مەكتەپ اۋلاسىنىڭ ءوازيسى» لاندشافتى ديزاين فەستيۆالى ءوتتى. فەستيۆال اياسىندا 5-11 سىنىپ وقۋشىلارى 20 مىڭنان استام گۇل، 430 جەمىس اعاشى جانە 200 تۋيا كوشەتى وتىرعىزىلدى.
ەستەرىڭىزگە سالا كەتەيىك، مەملەكەت باسشىسىنىڭ تاپسىرماسىمەن ەلدى مەكەن اۋماعىن اباتتاندىرۋ جانە كوگالداندىرۋ تۋرالى «تازا قازاقستان» اكسياسى اياسىندا الماتى قالاسى اكىمدىگى 2024 جىلعى 8 ءساۋىر مەن 8 مامىر ارالىعىندا «الماتى – ءبىزدىڭ ورتاق ءۇيىمىز» ناۋقانىن وتكىزدى. ناۋقاننىڭ نەگىزگى ماقساتى – قالا ينفراقۇرىلىمىنا ۇقىپتى قاراۋ قۇندىلىعىن قالىپتاستىرۋ، حالىقتى جوعارى ازاماتتىق جاۋاپكەرشىلىك پەن ەكولوگيالىق مادەنيەتكە تاربيەلەۋ.