جۇما كۇنى تاڭەرتەڭ اقش-تىڭ شىعىس جاعالاۋىندا بولعان 4،8 بالدىق جەر سىلكىنىسىنىڭ دۇمپۋلەرى نيۋ-يورك پەن جاقىن ماڭداعى ايماقتارعا سەزىلدى.
جەراستى دۇمپۋلەرىنىڭ وشاعى نيۋ-دجەرسي شتاتىنداعى ليۆان قالاسىنا جاقىن ماڭدا، نيۋ-يوركتەن باتىسقا قاراي 64 شاقىرىمداي جەردە بولدى، دەپ حابارلايدى اlmaty-akshamy.kz ۆۆس-گە سىلتەمە جاساپ.
نيۋ-يورك پەن ونىڭ ماڭىنداعى اۋداندارعا كەلتىرىلگەن شىعىن كولەمى ناقتىلانبادى، ءقازىر قالانىڭ ءورت ءسوندىرۋ قىزمەتى ونىڭ سالدارىن باعالاپ جاتىر.
امەريكانىڭ شىعىس جاعالاۋىندا جەر سىلكىنىسى سيرەك كەزدەسەدى جانە بۇل نيۋ-يورك قالاسىندا سوڭعى ونجىلدىقتارداعى ەڭ كۇشتى جەر سىلكىنىسى بولدى.
الەۋمەتتىك جەلى قولدانۋشىلارى جەر سىلكىنىسى فيلادەلفيادان نيۋ-يورككە دەيىن جانە شىعىس جاعالاۋدا بوستونعا دەيىن سەزىلگەنىن حابارلادى.
وتكەن جىلى بۋففالودا (نيۋ-يورك) ماگنيتۋداسى 3،8 بالدىق جەر سىلكىنىسى بولدى، ءبىراق بۇل ايماقتا 40 جىل بويى مۇنداي كۇشتى جەر سىلكىنىسى بولماعان.
1983 جىلى نيۋ-يورك شتاتىنىڭ وڭتۇستىگىندەگى نيۋكومبتا 5،1 بالدىق جەر سىلكىنىسى بولدى.
نيۋ-يورك قالاسىنىڭ مەرى ەريك ادامس بۇگىنگى جەر سىلكىنىسىنىڭ اۋىر زارداپتارى تۋرالى مالىمەت جوق ەكەنىن ايتتى.
جەر سىلكىنىسى سالدارىنان نيۋ-يوركتىڭ بىرنەشە اۋەجايى جۇمىسىن ۋاقىتشا توقتاتتى.