الماتى قالاسىنىڭ №7 قالالىق كلينيكالىق اۋرۋحاناسىنىڭ قابىلداۋ بولىمشەسىنە قارت ايەل وتە اۋىر جاعدايدا ءتۇستى. قاتتى اۋىرسىنۋ جانە ۋلانۋ سيندرومى سالدارىنان جالپى جاي-كۇيى اۋىر دەپ باعالاندى. بۇعان دەيىن بەس كۇن بويى ايەلدىڭ وڭ جاق بەل تۇسىندا قاتتى اۋىرسىنۋ، ءجيى ءزار شىعارۋ، اۋىزى قۇرعاۋ، شولدەۋ، جۇرەك اينۋ، جالپى السىزدىك بەلگىلەرى بولعان.
ءوزى تىركەۋدە تۇرعان ەمحاناعا مەديسينالىق كومەككە جۇگىنبەگەن. ءۇي جاعدايىندا ءوز بەتىنشە دارىلىك زاتتار قابىلداعان، ءبىراق ەم ناتيجە بەرمەگەن. كەيىننەن جوعارىدا اتالعان شاعىمدارى ۇدەيە تۇسكەن. №7 قالالىق كلينيكالىق اۋرۋحانادا ناۋقاستى تەراپيەۆت، ۋرولوگ، رەانيماتولوگ ماماندار قارادى.
«ناۋقاستىڭ وتە اۋىر جاعدايى، نەگىزگى اۋىر دياگنوزعا بايلانىستى – بۇيرەك پەن نەسەپاعاردىڭ بىتەلۋىمەن بىرگە جۇرەتىن گيدرونەفروز (نەسەپ-تاستىڭ ءقاۋىپتى اسقىنۋى)، ونىڭ اسقىنۋلارى مەن قاتار جۇرەتىن اۋرۋلارى (ءجىتى ءىرىڭدى سيستيت، ۋروسەپسيس، نەسەپاعاردىڭ ۋروليتيازى، پيەلونەفريت، گيپەرتونيا، جاڭادان انىقتالعان قانت ديابەتى، ەكىنشىلىك ترومبوسيتوپەنيا، ەكىنشىلىك انەميا)، بۇل اۋرۋدىڭ كلينيكاسىن ودان ءارى اۋىرلاتادى. ۋروسەپسيستىڭ ومىرگە ءقاۋىپ توندىرەتىن اسقىنۋى قانت ديابەتى اياسىندا ينفەكسيالىق-ۋىتتىق شوكقا اكەلۋى مۇمكىن، ونىڭ سالدارى ءولىم بولۋى مۇمكىن»، – دەدى №7 قكا-نىڭ ۋرولوگيا بولىمشەسىنىڭ مەڭگەرۋشىسى ەركەبۇلان تولەگەنوۆ.
دارىگەر تولەگەنوۆ سونداي-اق پاسيەنتتىڭ جالپى جاعدايىن – ۋروسەپسيس، ازوت الماسۋىنىڭ ونىمدەرىمەن ۋلانۋ جانە سۋ-ەلەكتروليتتىك تەڭگەرىمسىزدىك، زەرتحانالىق دەرەكتەرگە جانە پاسيەنتتىڭ كلينيكاسىنا سايكەس دارىگەرلەر دەنساۋلىعىنا بايلانىستى شۇعىل حيرۋرگيالىق ارالاسۋ تۋرالى شەشىم قابىلداعانىن حابارلادى.
ناۋقاستىڭ ەمىن باقىلاۋشى ۋرولوگ-دارىگەر ەرلان قوڭىروۆتىڭ ايتۋىنشا، ءزاردىڭ شىعۋىن قالپىنا كەلتىرۋ بويىنشا تەحنيكالىق جاعىنان كۇردەلى وتا ءساتتى جاسالدى.
«ءبىز نەسەپ جولى مەن بۇيرەك جامباسىنداعى بىتەلۋدى ترانسۋرەترالدى الىپ تاستاۋدى» ءساتتى جۇرگىزدىك (ۋرەتەروسكوپيا، سول جاق بۇيرەكتى ستەنتتەۋ). وپەراسيا كەزىندە نەسەپ جولىنىڭ ستريكتۋراسى ورتاشا ۇشتەن ءبىر دەڭگەيدە بولدى جانە تەحنيكالىق قيىندىقتارمەن ىشكى ستەنت – كاتەتەر ورناتىلدى، بۇل ءزاردىڭ شىعۋىن قالپىنا كەلتىردى»، – دەپ اتاپ ءوتتى دارىگەر ە.قوڭىروۆ.
پاسيەنتتىڭ وپەراسياسى ءمامس اياسىندا جاسالدى. پاسيەنت 8 تاۋلىكتەن كەيىن قاناعاتتانارلىق جاعدايدا ستاسيوناردان شىعارىلدى.
دۇرىس تاڭدالعان ەم جانە جاقسى جاسالعان وپەراسيا پاسيەنتتى ومىرىنە ءقاۋىپ توندىرەتىن جاعدايدان الىپ شىقتى، بۇيرەك فۋنكسياسىن جوعالتۋ ءقاۋپىنىڭ جوعارى بولۋىنىڭ الدىن الۋعا جانە سونىڭ سالدارىنان ۋاقىتشا نەمەسە ءومىر بويى بۇيرەك الماستىرۋ تەراپياسىن (باعدارلامالىق گەمودياليز جانە ت.ب.) جۇرگىزۋ قاجەتتىلىگىنە مۇمكىندىك بەردى.