2024 جىلى مەملەكەت باسشىسى قاسىم-جومارت توقايەۆتىڭ تاپسىرماسى بويىنشا Neo Nomad دەپ اتالاتىن جاڭا ۆيزا ءتۇرى ەنگىزىلدى. بۇل ۆيزا ساياحاتتاپ، قاشىقتان جۇمىس ىستەيتىن شەتەلدىك تۋريستەرگە ارنالعان جانە زاماناۋي كوشپەندىلەر ءۇشىن ارنايى ۇسىنىلعان مۇمكىندىك بولىپ تابىلادى. ۆيزالىق رەجيمدى ەنگىزۋ كەزىندە پاندەميادان كەيىن مۇنداي باعدارلامالاردى ءساتتى قولدانعان 50-دەن استام ەلدىڭ حالىقارالىق تاجىريبەسى ەسكەرىلدى، دەپ حابارلايدى aqshamnews.kz
Neo Nomad ۆيزاسى شەتەلدىك تۋريستەرگە قازاقستاندا ءبىر جىلعا دەيىن تۇرۋعا مۇمكىندىك بەرەدى. بۇل ۋاقىت ىشىندە ولار شەتەلدىك كومپانيالاردا جۇمىس ىستەي الادى، ەلىمىزدىڭ مادەنيەتى مەن تۇرمىسىن جاقىنىراق تانىپ، تۋريزم سالاسىنا ءوز ۇلەسىن قوسىپ، قازاقستان ەكونوميكاسىنا پايدا اكەلۋى ءتيىس. ەگەر جىلىنا 500 ادام وسى ۆيزانى پايدالانسا، ەكونوميكالىق اسەر شامامەن 3،6 ملرد تەڭگە بولماق. ۆيزانى العان شەتەلدىك ازاماتتار قازاقستاندا تۇرىپ، قاراجاتىن ەلدە جۇمسايدى، ءبىراق بۇل وتاندىق ەڭبەك نارىعىنا اسەر ەتپەيدى، بۇل باعدارلامانىڭ باستى ەرەكشەلىگى.
قازاقستاننىڭ تۋريستىك الەۋەتى الەمدە كەڭىنەن ناسيحاتتالىپ كەلەدى. The New York Times الماتىنى ۇزدىك 52 تۋريستىك باعىتتىڭ قاتارىنا قوسسا، Lonely Planet قازاقستاندى 2025 جىلى ساياحاتتاۋعا ءتيىس ۇزدىك ەلدەردىڭ تىزىمىنە ەنگىزدى. سونىمەن قاتار، Conde Nast Traveller Italia باسىلىمى «شىمبۇلاق» تاۋ-شاڭعى كۋرورتىن تاڭداۋلى توپ-5 دەستيناسيا تىزىمىنە قوستى.
CNN Travel 2025 جىلى ساياحاتتاۋعا تۇرارلىق 25 باعىتتىڭ ءتىزىمىن جاريالاپ، قازاقستاندى ەرەكشە مارتەبەگە لايىق دەپ تانىدى. الماتى قالاسى تابيعي لاندشافتتار مەن ۋربانيستىك مادەنيەتتى ۇيلەستىرەتىن ەرەكشەلىگى ارقاسىندا ورتالىق ازيانىڭ «جاڭا ستيل استاناسى» دەپ اتالدى.
الداعى جىلدارى قازاقستان تۋريزم سالاسىن دامىتۋ جۇمىستارىن جالعاستىرادى. ءۇش ءىرى تۋريستىك ايماق — ششۋچە-بۋراباي كۋرورتتىق ءوڭىرى، ماڭعىستاۋ كۋرورتتىق ءوڭىرى جانە الماتى تاۋ كلاستەرى باسىم باعىتتار رەتىندە بەلگىلەندى. 2027 جىلعا دەيىن جالپى قۇنى 1،1 ترلن تەڭگەدەن اساتىن 181 ينۆەستيسيالىق جوبا ىسكە اسىرىلادى.
سالاداعى جۇمىسپەن قامتىلعاندار سانىن 800 مىڭ ادامعا دەيىن ارتتىرۋ، اگروتۋريزمدى دامىتۋ ارقىلى اۋىلدىق جەرلەردە 10 مىڭ جاڭا جۇمىس ورنىن اشۋ جوسپارلانۋدا. ىشكى تۋريستەر سانىن 11 ميلليونعا جەتكىزىپ، ورنالاستىرۋ ورىندارىنىڭ توسەك-ورىن قورىن 280 مىڭعا دەيىن ۇلعايتۋ، سونداي-اق بارلىق قوناق ۇيلەردى eQonaq اقپاراتتىق جۇيەسىنە ەنگىزۋ كوزدەلگەن.
قازاقستان دۇنيەجۇزىلىك ەكونوميكالىق فورۋمنىڭ ساياحات جانە ءتۋريزمدى دامىتۋ جاھاندىق يندەكسىندە الەمنىڭ ۇزدىك 50 ەلى قاتارىنا كىرۋدى ماقسات ەتىپ وتىر. بۇل باستامالار قازاقستاننىڭ حالىقارالىق تۋريستىك ارەناداعى ورنىن نىعايتىپ، ساياحاتشىلار، بيزنەس جانە جەرگىلىكتى قاۋىمداستىقتار ءۇشىن جاڭا مۇمكىندىكتەر اشادى.