كينوتەاترلاردا "قارا قابىلان: ۋاكاندا جاساسىن!" بلوكباستەرىنىڭ قازاق تىلىندەگى كورسەتىلىمى تەك تاڭعى ۋاقىتقا قويىلعان.
كورەرمەندەر "قارا قابىلان: ۋاكاندا جاساسىن!" بلوكباستەرى كينوتەاترلاردا قازاق تىلىندە ىڭعايلى ۋاقىتقا قويىلماعانىن ايتىپ شاعىم ايتىپ جاتىر، دەپ حابارلايدى Almaty-akshamy.kz Inbusiness.kz-كە سىلتەمە جاساپ.
ەسبول نۇراحمەت ەسىمدى الەۋمەتتىك جەلى قولدانۋشىسى كينوتەاترلاردا كۇنىنە 15-كە جۋىق سەانستىڭ تەك بىرەۋى عانا قازاق تىلىندە كورسەتىلەتىنىن، وندا دا ءقازاقتىلدى قاۋىم ءۇشىن ىڭعايسىز ۋاقىتقا قويىلعانىن جەتكىزدى.
"ادەمىلەپ قازاقشاعا اۋدارعان. ەندى كينوتەاترلاردا كۇنى بويى 10-15 سەانسقا دەيىن قويىلىپ جاتىر. سونىڭ تەك بىرەۋى ارەڭ قازاقشا، ونىڭ ءوزى نە تاڭەرتەڭ، نە تۇسكە قاراي. بۇل نە دەگەن يتتىك؟ جۇرت جاپپاي كورىپ، الەۋمەتتىك جەلىدە ءبولىسىپ جاتىر. ءبىراق ورىسشا كورىپ جاتىر. ونىڭ باستى سەبەبى – ىڭعايلى ۋاقىتقا قويماۋىنان دەپ تۇسىنەمىن. مينيسترلىك قانشاما قارجى جۇمساپ، قازاقشاعا اۋدارعان ەكەن، ەندى سونى ىڭعايلى ۋاقىتقا قويۋعا نەگە ءمان بەرمەيدى؟"، – دەپ جازدى ەسبول نۇراحمەت فەيسبۋك پاراقشاسىنا.
وزگە جەلى قولدانۋشىلارى "رەسەي فەدەراسياسىنىڭ ءبىر اۆتونومياسىندا ءومىر ءسۇرىپ جاتقان سوڭ، تاڭقالۋدى قويدىق"، دەپ پىكىر ءبىلدىرىپتى.
ايتا كەتەلىك، "قارا قابىلان: ۆاكاندا جاساسىن!" بلوكباستەرى كينوتەاترلاردا قازاق تىلىندە كورسەتىلەتىنىن ايتقان مادەنيەت جانە سپورت ءمينيسترى داۋرەن ابايەۆ "حالىققا رەيتينگى جوعارى فيلمدەردى قازاق تىلىندە كورسەتۋ – يدەولوگيالىق تۇرعىدان دا اسا ماڭىزدى"، دەگەن بولاتىن. مينيسترلىك اتالعان ءفيلمدى 10 قاراشادان باستاپ ەلىمىزدىڭ بارلىق كينوتەاترلارىندا كورسەتىلەتىندىگىن حابارلاعان بولاتىن.
اتالعان ءفيلمنىڭ استانا كينوتەاترلارىنداعى 12 قاراشا كۇنگى 102 كورسەتىلىمىنىڭ 6 سەانسى عانا قازاق تىلىندە.