پارلامەنت وسىنداي زاڭ قابىلدادى.
پارلامەنت پالاتالارىنىڭ بىرلەسكەن وتىرىسىندا «قازاقستان رەسپۋبليكاسىنىڭ تۇڭعىش پرەزيدەنتى - ەلباسى تۋرالى» كونستيتۋسيالىق زاڭنىڭ كۇشi جويىلدى دەپ تانۋ تۋرالى» كونستيتۋسيالىق زاڭ جوباسىن ەكى وقىلىمدا قاراپ، قولداپ داۋىس بەردى، دەپ حابارلايدى Almaty-akshamy.kz
ءماجىلىس دەپۋتاتى ەرلان سايىروۆ بىلتىر بۇكىلحالىقتىق رەفەرەندۋم ناتيجەسىندە ەلىمىزدە جاڭا كونستيتۋسيا قابىلدانعانىن ەسكە سالدى. جاڭا كونستيتۋسيانى جاقتاپ قازاقستان حالقىنىڭ 77%-ى داۋىس بەردى.
كونستيتۋسياعا ەنگىزىلگەن وزگەرتۋلەرگە سايكەس، قازاقستان رەسپۋبليكاسى تۇڭعىش پرەزيدەنتى – ەلباسىنىڭ مارتەبەسى مەن وكىلەتتىگى رەسپۋبليكا كونستيتۋسياسىمەن جانە كونستيتۋسيالىق زاڭمەن ايقىندالادى دەگەن نورمانى كوزدەيتىن كونستيتۋسيانىڭ 46-بابى 4-تارماعى الىنىپ تاستالدى.
«قازاقستاننىڭ دەموكراتيا مەن پليۋراليزمگە بەت الىپ، تەرەڭ ساياسي ترانسفورماسيا جاساۋ كەزەڭىندە، جەكە توپتاردىڭ بيلىكتى مەنشىكتەۋگە جەتەلەيتىن قانداي دا ءبىر تەتىكتەرگە جول بەرمەۋ ماڭىزدى. سوندىقتان ءماجىلىستىڭ ءبىر توپ دەپۋتاتى حالىقتىڭ باسىم كوپشىلىگىنىڭ سۇرانىسىن ەسكەرە وتىرىپ، اتالعان زاڭ جوباسىن ۇسىندى»، - دەپ ءتۇسىندىردى سايىروۆ سەنات پەن ءماجىلىستىڭ بىرلەسكەن وتىرىسىندا.
«جاڭا قازاقستان» دەپۋتاتتىق توبى ەلباسى تۋرالى زاڭنىڭ كۇشىن جويۋ ماسەلەسىنە قاتىستى كونستيتۋسيالىق سوتقا جۇگىنگەن. كونستيتۋسيالىق سوت بۇل زاڭنىڭ ەلىمىزدىڭ جاڭا اتا زاڭىنا سايكەس كەلمەيتىندىگى جونىندە شەشىم شىعاردى.
«قازاقستاننىڭ قوعامدىق پروسەسىندە ساياسي ينستيتۋتتارعا مونوپوليا قۇرۋ ارەكەتتەرى، ءومىر كورسەتكەندەي، ەلدە ساياسي قۇندىلىقتاردى ديەۆالۆاسيالاپ، مەملەكەت دامۋىنا كەرى اسەر تيگىزۋگە قابىلەتتى. سوندىقتان مۇنداي ولقىلىقتارعا بولاشاقتا قوعامدىق-ساياسي يممۋنيتەت قالىپتاستىرۋ وتە ماڭىزدى! جوعارىدا ايتىلعاندى باسشىلىققا الىپ، ساياسي-قۇقىقتىق نەگىز جوق ەكەنىن ەسكەرە وتىرىپ، «قازاقستان رەسپۋبليكاسىنىڭ ءبىرىنشى پرەزيدەنتى - ەلباسى ستاتۋسى» جونىندەگى كونستيتۋسيالىق زاڭنىڭ كۇشىن جويۋ جونىندەگى كونستيتۋسيالىق زاڭ جوباسى ۇسىنىلادى»، - دەدى دەپۋتات.
ونىڭ ايتۋىنشا، بۇل قادام ەلىمىزدە اتا زاڭىمىزدىڭ نورمالارىن قاتاڭ ساقتاۋعا، ساياسي ينستيتۋتتاردى بوتەن پروتەكسيالىق كۇشتەردەن ساقتاندىرۋعا باعىتتالعان ساياسي-قۇقىقتىق اكت.
كونستيتۋسيالىق زاڭنىڭ قابىلدانۋى تەرىس قۇقىقتىق جانە الەۋمەتتىك-ەكونوميكالىق سالدارعا اكەلمەيدى، بيۋدجەتتەن قوسىمشا قارجى تالاپ ەتپەيدى.
پارلامەنت دەپۋتاتتارى «قازاقستان رەسپۋبليكاسىنىڭ تۇڭعىش پرەزيدەنتى - ەلباسى تۋرالى» كونستيتۋسيالىق زاڭنىڭ كۇشi جويىلدى دەپ تانۋ تۋرالى» كونستيتۋسيالىق زاڭدى قابىلدادى.