قارجى مينيسترلىگى ناقتى قانداي نىساندار قايتارىلعانىن ايتپادى.
نۇرسۇلتان نازاربايەۆ قورى وزىنە تيەسىلى كەي نىسانداردى مەملەكەتكە قايتاردى، دەپ حابارلايدى Almaty-akshamy.kz قارجى مينيسترلىگىنە سىلتەمە جاساپ.
قازىرگى ۋاقىتتا رەسپۋبليكالىق مەنشىككە ءتيىستى سىيعا تارتۋ شارتى نەگىزىندە استانا جانە الماتى قالالارىندا قوردىڭ مۇلكى (جيھازدالعان جانە جابدىقتالعان جىلجىمايتىن مۇلىك نىساندارى) قابىلداندى، - دەلىنگەن جاۋاپتا.
الايدا ۆەدومستۆو ەكس-پرەزيدەنت قورىنىڭ مەملەكەتكە ناقتى قاي نىسانداردى قايتارعانىن جانە ونىڭ جالپى سوماسىن اشىپ ايتپادى. مينيسترلىك وكىلى بۇل اقپاراتتى «قۇپيا» دەپ ءتۇسىندىردى.
ەستەرىڭىزگە سالا كەتەيىك، قازاقستان رەسپۋبليكاسى تۇڭعىش پرەزيدەنتى – ەلباسىنىڭ قورى «قازاقستان رەسپۋبليكاسى تۇڭعىش پرەزيدەنتى – ەلباسى تۋرالى» قازاقستان رەسپۋبليكاسىنىڭ كونستيتۋسيالىق زاڭىنىڭ 9-بابىن ورىنداۋ ءۇشىن قازاقستان رەسپۋبليكاسى پرەزيدەنتىنىڭ 2000 جىلعى 22 جەلتوقسانداعى № 528 جارلىعىنا سايكەس قۇرىلدى. بۇل رەتتە وسى جارلىقتىڭ 3-تارماعىندا قور الەۋمەتتىك، قايىرىمدىلىق، مادەني، ءبىلىم بەرۋ جانە وزگە دە قوعامدىق پايدالى ماقساتتاردى كوزدەيتىن كوممەرسيالىق ەمەس ۇيىم. قوردىڭ قارجىلاندىرۋ كوزدەرى زاڭدارعا قايشى كەلمەيتىن جارنالار مەن تۇسىمدەر دەپ بەلگىلەنگەن.
2020 جىلى اتالعان قور نۇرسۇلتان نازاربايەۆ قورى بولىپ وزگەرتىلدى.
«مەملەكەتتىك ەمەس زاڭدى تۇلعالاردىڭ مۇلكىن مەملەكەتتىك مەنشىككە وتەۋسىز نەگىزدە بەرۋ ءتارتىبى قازاقستان رەسپۋبليكاسى ۇكىمەتىنىڭ 2011 جىلعى 28 قىركۇيەكتەگى № 1103 قاۋلىسىمەن بەكىتىلگەن سىيعا تارتۋ شارتى بويىنشا مەملەكەتتىڭ مۇلىك قۇقىعىنا يە بولۋ قاعيداسىمەن رەتتەلەدى، ونىڭ 2-تارماعىنا سايكەس مەملەكەتكە سىيعا تارتۋ شارتى بويىنشا مۇلىك قۇقىعىن بەرۋ تۋرالى شەشىمدى مۇلىكتىڭ مەنشىك يەسى قابىلدايدى جانە زاڭنامادا بەلگىلەنگەن تارتىپپەن رەسىمدەلۋى ءتيىس»، - دەلىنگەن رەسمي جاۋاپتا.
سونىمەن قاتار، كوميسسيانىڭ جۇمىسى باستالعاننان بەرى تەلەكوممۋنيكاسيا، تەمىرجول ينفراقۇرىلىمى، ەكولوگيا جانە ت. ب. سالالارداعى جەكە مونوپوليالاردى (وليگوپوليالاردى) الىپ تاستاۋ ماقساتىندا سىيعا تارتۋ شارتتارى بويىنشا رەسپۋبليكالىق مەنشىككە:
10 اق جانە ج ش س اكسيالار پاكەتى مەن قاتىسۋ ۇلەس؛
5 جىلجىمايتىن مۇلىك نىسانى؛
100 ملن اقش دوللارى مەن 1،49 ملرد تەڭگە قابىلداندى.
اتاپ ايتقاندا، رەسپۋبليكالىق مەنشىككە تەلەكوممۋنيكاسيا سالاسىندا «قازاقتەلەكوم» اق-دا (28،8%)، تەمىرجول ينفراقۇرىلىمى سالاسىندا – «كولىكتىك سەرۆيس ورتالىعى» اق-دا (100%؛ مۇلىك قۇرامىندا جالپى ۇزىندىعى شامامەن 250 شاقىرىم بولاتىن 400-دەن استام كىرمە تەمىرجول قابىلدانعان)، ەكولوگيا سالاسىندا «حالىقارالىق جاسىل تەحنولوگيالار جانە ينۆەستيسيالىق جوبالار ورتالىعى» قەاق (50% + 1 اكسيا)، «وپەراتور وكم» ج ش س (100%) اكسيالار پاكەتى قابىلداندى. رەسپۋبليكالىق مەنشىككە قابىلدانعان جىلجىمايتىن مۇلىك وبەكتىلەرىنىڭ قاتارىندا الماتى قالاسىنداعى سپورتتىق-جاتتىعۋ كەشەنى، استانا قالاسىنداعى «بولاشاق» بيزنەس ورتالىعىنىڭ عيماراتى جانە ت. ب. بار.
كوميسسيا قابىلداعان شەشىمدەر تۋرالى قوعام تۇراقتى نەگىزدە، ونىڭ ىشىندە الەۋمەتتىك جەلىلەر ارقىلى حاباردار ەتىلەدى، – دەيدى مينيسترلىك.