نازاربايەۆ كەڭسەسىنىڭ جۇمىسى توقتاتىلادى

ءقازىر كەڭسەنى قايتا قۇرىلىمداۋ پروسەسى ءجۇرىپ جاتىر.

قارجى ءمينيسترى ەرۇلان جاماۋبايەۆتىڭ ايتۋىنشا، زاڭ اياسىندا نۇرسۇلتان نازاربايەۆ كەڭسەسىنىڭ جۇمىسى توقتاتىلادى، دەپ حابارلايدى Almaty-akshamy.kz

ونىڭ ايتۋىنشا، ءقازىر كەڭسەنى قايتا قۇرىلىمداۋ پروسەسى ءجۇرىپ جاتىر. قىزمەتكەرلەردى جۇمىستان شىعارۋ، ورىنداردى باسقالارعا بەرۋ جۇمىسى جۇرگىزىلىپ جاتىر.

"كەز كەلگەن ادامدى جۇمىستان شىعارۋ ءۇشىن ءبىز ەڭبەك زاڭىن ساقتاۋىمىز كەرەك. ەلباسى كەڭسەسى جالپى زاڭدا كورسەتىلگەن اياسىندا عانا جۇمىس ىستەيتىن بولادى. تەك قانا كەڭسە ەمەس، كىتاپحانا بار، وندا قۇندى-قۇندى دۇنيەلەر بار. ونى قانداي مينيسترلىكتىڭ، قانداي مەملەكەتتىك ورگاننىڭ اياسىنا اۋىستىرۋ كەرەك، قايتا قۇرۋ كەرەك، جالعىز تاستاپ كەتپەيمىز عوي"، - دەدى جاماۋبايەۆ ءماجىلىس كۋلۋارىندا.

وسى ورايدا جۋرناليستەر ودان ەلباسى كەڭسەسى جۇمىسىن جالعاستىرا ما، جوق الدە توقتاتىلا ما دەپ ناقتىلادى.

"ءقازىر قايتا قۇرىلىمداۋ پروسەسى ءجۇرىپ جاتىر. نەگىزىنەن جالپى زاڭ اياسىندا ونىڭ جۇمىسى توقتاتىلادى"، - دەپ جاۋاپ بەردى مينيستر.

ب ا ق وكىلدەرى "نازاربايەۆتىڭ كەڭسەسىن جاپسا، ەكس-پرەزيدەنت قايدا جۇمىس ىستەيدى؟" دەپ تە سۇرادى.

"مۇنى ونىڭ اينالاسىنداعى ادامداردان سۇراڭىزدار. مەن قايدان بىلەيىن. ولاردان سۇراڭىز، باسقا كەڭسەلەرى بار شىعار"، - دەيدى ۆيسە-پرەمەر.

ايتۋىنشا، قايتا قۇرىلىمداۋدان شامامەن جىلىنا 2-3 ميلليارد تەڭگە ۇنەمدەلەدى.