ناۆالنىي كولونيادا قايتىس بولدى: ونىڭ ترومبى ءۇزىلىپ كەتكەن.
الەكسەي ناۆالنىي حار دەگەن ەلدى-مەكەندەگى «پوليارنىي ۆولك» تۇزەتۋ كولونياسىندا قايتىس بولدى، دەپ حابارلايدى Almaty-akshamy.kz
ناۆالنىي ءولىمى جايلى يامالو-نەنەس اۆتونوميالىق وكرۋگىنىڭ فەدەرالدى جازانى ورىنداۋ قىزمەتى باسقارماسى مالىمدەگەن.
«سوتتالعان ناۆالنىي ا.ا. سەرۋەندەپ كەلگەننەن كەيىن، ءوزىن ناشار سەزىنىپ، بىردەن ەسىنەن تانىپ قالعان.
مەكەمەنىڭ مەديسينا قىزمەتكەرلەرى دەرەۋ كەلىپ، جەدەل مەديسينالىق جاردەم بريگاداسى شاقىرىلدى.
بارلىق قاجەتتى رەانيماسيالىق ءىس-شارالار وتكىزىلدى، ءبىراق ولار وڭ ناتيجە بەرمەدى. جەدەل مەديسينالىق كومەك دارىگەرلەرى سوتتالۋشىنىڭ قايتىس بولعانىن ايتتى»، - دەلىنگەن رەسمي تۇردە تارالعان اقپاراتتا.
ەستەرىڭىزگە سالا كەتەيىك، الەكسەي ناۆالنىي - رەسەيلىك ساياساتكەر، زاڭگەر، ەلدەگى جەمقورلىق پەن پاراقورلىقتى اشكەرەلەيتىن تەرگەۋلەر ارقىلى اتى شىققان وپپوزيسيا كوشباسشىلارىنىڭ ءبىرى بولاتىن.
ناۆالنىي، ەكى رەت شارتتى تۇردە سوتتالعان، «يۆ روشەر» ءىسى بويىنشا جازاسىن وتەۋ شارتتارىن بىرنەشە رەت بۇزعانى ءۇشىن وعان ەزدەۋ جاريالانعان ەدى. 2021 جىلدىڭ 2 اقپانىندا سوت وعان شارتتى مەرزىمدى ناقتى مەرزىمگە اۋىستىرۋ تۋرالى شەشىم قابىلدادى. ول سونداي - اق 2022 جىلدىڭ ناۋرىزىندا سوتتى قورلاعانى جانە سايلاۋ ناۋقانىنا قاراجات جيناۋ الاياقتىقتارى ءۇشىن جانە 2023 جىلدىڭ تامىزىندا ەكسترەميستىك قوعامداستىق قۇرعانى ءۇشىن كىنالى دەپ تانىلدى.
جاقىندا رەسەيدە 15-17 ناۋرىز ارالىعىندا پرەزيدەنت سايلاۋى وتەدى. ساياسي وپپوزيسيونەردىڭ ءولىمى بۇل ناۋقانعا قالاي اسەر ەتەدى جانە بۇل ءولىم قاستىق بولۋى مۇمكىن بە دەگەن ساۋالعا ساياساتتانۋشى، «Alatau aqparat» مەدياحولدينگىنىڭ ساراپشىسى پەردەحان شامشييەۆ جاۋاپ بەردى.
«مەنىڭشە، رەسەيلىك وپپوزيسيونەر الەكسەي ناۆالنىيدىڭ ءولىمى قاستاندىق ەمەس. ارينە، تەرگەپ-تەكسەرۋ ناتيجەسىن كۇتۋ كەرەك. ءبىراق ونىڭ دەنساۋلىعى ناشارلاعانى بارىمىزگە بەلگىلى.
كرەمل الدە ونىڭ ساياسي دۇشپاندارى تاراپىنان قاستاندىق جاسالدى دەپ تە ايتا المايمىن. سەبەبى، ءبىر ايدان سوڭ 15-17 ناۋرىزدا رەسەيدە پرەزيدەنت سايلاۋى وتەدى. سايلاۋدان الدىن كرەملگە ازاماتتىق قوعام جانە ناۆالنىيدىڭ جاقتاستارى تاراپىنان نارازىلىق كوڭىل-كۇيدىڭ وسكەنى قاجەت ەمەس. ءيا، ساياسي تەحنولوگيا تۇرعىسىنان سايلاۋدان الدىن ساياسي جانە ازاماتتىق بەلسەندىلەردى وسىنداي قاستاندىق ارقىلى قورقىتۋ دۇرىس بولار، ءبىراق ۇزاق ۋاقىتتىق پەرسپەكتيۆادا كەرىسىنشە اسەر ەتۋى مۇمكىن. ناۆالنىيدىڭ ءولىمى الداعى سايلاۋ ناۋقانىنا عانا ەمەس، رەسەي مەن ۋكراينا اراسىنداعى داعدارىسقا دا اسەر ەتۋى مۇمكىن دەپ ايتار ەدىم. ارينە ماسكەۋگە بۇل ءتيىمدى ەمەس»، - دەيدى ساياساتتانۋشى پەردەحان شامشييەۆ.