ناۋرىزباي اۋدانىندا رەسپۋبليكالىق وتباسى كۇنىنە ورايلاستىرىلعان شارا ءوتتى

وتباسى قۇندىلىقتارى

شاھارداعى ناۋرىزباي اۋدانىندا تاۋەلسىزدىكتىڭ 30 جىلدىعى قارساڭىندا ءبىرقاتار شارالار وتەدى، دەپ حابارلايدى Almaty-akshamy.kz Almaty.tv-عا سىلتەمە جاساپ. سولاردىڭ ءبىرى رەسپۋبليكالىق وتباسى كۇنىنە ورايلاستىرىلدى.

اۋداننىڭ پوليسيا باسقارماسىندا وتباسىنداعى زورلىق-زومبىلىقتىڭ الدىن الۋ ماسەلەلەرى تالقىلانىپ، ءدۇيىم جۇرتقا ۇلگى بولعان جانۇياعا سىيلىقتار تابىستالدى. 

«رەسپۋبليكالىق وتباسى كۇنى قارساڭىندا 30 مەملەكەتتىك ورگاندا ونلاين جانە وففلاين فورماتتا، سانيتارلىق تالاپتاردى ساقتاي وتىرىپ، اۋدانداعى ۇلگىلى وتباسىلارمەن كەزدەسۋ وتكىزىلىپ جاتىر»، – دەدى ناۋرىزباي اۋدانى اكىمى اپپاراتى مادەنيەت جانە تىلدەردى دامىتۋ ءبولىمىنىڭ باس مامانى فاريزا ەسكەندىروۆا.

اتالعان شاراعا 60 جىل ءومىردىڭ اششى مەن تۇششىسىن بىرگە كورگەن بالبايەۆتار جانۇياسى قاتىستى. ولار جاستارعا بىلگەندەرىن ايتىپ، عۇمىرلىق تاجىريبەلەرىمەن ءبولىستى. 

«وتباسىن اسىراۋعا ەر ادام تالپىنىس جاساۋى قاجەت. ايەلدەر دە قاراپ وتىرماۋى كەرەك. تەك قانا نارەستەلى بولعان كەزدەن باسقا. مىنە، وسىنداي جاعدايدا "بىرىگىپ كوتەرگەن جۇك جەڭىل" بولماق»، – دەدى ناۋرىزباي اۋدانىنىڭ تۇرعىنى ەرتاي بالبايەۆ.