روبوت-گۋمانويدتار الماتىلىقتار مەن قالا قوناقتارىن ناۋرىز مەيرامىمەن قۇتتىقتاپ ءجۇر
الماتىدا پانفيلوۆ جاياۋ جۇرگىنشىلەر كوشەسىندە، قابانباي باتىر كوشەسىنەن باستاپ تولە بي كوشەسىنە دەيىنگى الاڭدا، گۋمانويدتى روبوتتاردى كەزدەستىرۋگە بولادى. ولار قالا تۇرعىندارى مەن قوناقتارىن ناۋرىز مەيرامىمەن قۇتتىقتاپ، مەرەكەلىك كوڭىل-كۇي سىيلاپ ءجۇر. ءداستۇرلى تاقيا مەن شاپان كيگەن روبوتتار كوشەدە ەركىن سەرۋەندەپ، بالالاردىڭ عانا ەمەس، ەرەسەكتەردىڭ دە قىزىعۋشىلىعىن تۋدىردى، دەپ حابارلايدى aqshamnews.kz
قالا تۇرعىندارى گۋمانويدتارمەن ەستەلىك سۋرەتكە ءتۇسىپ، بيلەپ، قول الىسىپ امانداسىپ، ولاردى ۆيدەوعا ءتۇسىرىپ جاتىر.
سونىمەن قاتار، پانفيلوۆ كوشەسىندە ەسكى پلاستيك زاتتاردان جاسالعان ستاسيونارلىق روبوتتار دا قويىلعان. ولار دا وزىنە ەرەكشە نازار اۋدارىپ، كورەرمەندەردىڭ قىزىعۋشىلىعىن تۋدىردى.
بۇدان بولەك، مەرەكەلىك الاڭدا داياشى-روبوتتار، روبوت-اسپاز جانە باريستا-روبوت جۇمىس ىستەۋدە. ولار باۋىرساق دايىنداپ، قوناقتارعا كوفە ۇسىنىپ، تاپسىرىستاردى جەتكىزۋدە. قالا تۇرعىندارى مەن تۋريستەر ولاردىڭ قىزمەتىن قۋانا پايدالانىپ جاتىر.
پانفيلوۆ كوشەسىنىڭ ورتاسىنا جارىقديودتى ەكراندارمەن جابدىقتالعان كينەتيكالىق تۋننەل ورناتىلدى. بۇل ارت-نىسان جارقىن رەڭكتى ويۋ-ورنەكتەر ارقىلى ءوتىپ بارا جاتقان ادامداردىڭ قيمىلدارىن قايتالايدى، بۇل نىسان فوتو مەن بەينەتۇسىرىلىمدەر ءۇشىن ەرەكشە فونعا اينالدى.
مەرەكەلىك الاڭدا ساداق اتىپ، ۆيرتۋالدى فورماتتا مەرگەندىك قابىلەتتى سىناۋعا مۇمكىندىك بار. سونداي-اق، VR-گارنيتۋرا ارقىلى وتكەن عاسىرلارعا ساياحات جاساۋعا بولادى. جاساندى ينتەللەكت تەحنولوگياسىن قولدانا وتىرىپ، ۇلتتىق ناقىشتا وڭدەلگەن فوتوسۋرەتكە ءتۇسىپ، ونى بىردەن تەلەفونعا جۇكتەۋگە بولادى.
زياتكەرلىك ويىنداردى ۇناتاتىندار «وي-دۋمان» شوۋىنا قاتىسىپ، روبوتوتەحنيكا كورمەسىن تاماشالاي الادى.
ايتا كەتەرلىگى، بۇل الاڭدا ۆيرتۋالدى اۆاتار – عالىمجان دا بار. ول ناۋرىز مەيرامىن اتاپ ءوتىپ جۇرگەن الماتىلىقتاردىڭ سۇراقتارىنا جاۋاپ بەرىپ، ءىس-شارالار باعدارلاماسى تۋرالى اقپارات ۇسىنىپ، حالىقپەن اڭگىمەلەسىپ، قۇتتىقتاۋ تىلەگىن جاۋدىرۋدا.
وسى Nauryz Almaty Vibe فەستيۆالى ارقىلى پانفيلوۆ كوشەسى جاڭا تەحنولوگيالار مەن داستۇرلەردىڭ ادەمى ۇيلەسكەن ەرەكشە ورتالىعىنا اينالدى. بۇل فەستيۆال 21-22 ناۋرىزدا ساعات 10:00-دەن باستاپ 22:00-گە دەيىن جالعاسادى. كەلىپ، روبوتتارمەن جۇزدەسۋگە اسىعىڭىزدار. بيلەت الۋدىڭ قاجەتى جوق، بارلىعى تەگىن.
سونىمەن قاتار، جاياۋ جۇرگىنشىلەر كوشەسىندە ساحنا ورناتىلىپ، وندا لايۆ-بەندتەر مەن ديدجەيلەر ونەر كورسەتىپ، قالا تۇرعىندارى مەن قوناقتارىنا ەرەكشە مەرەكەلىك اتموسفەرا سىيلاۋدا.