الماتى قالاسىنىڭ كرەاتيۆتى يندۋستريالاردى دامىتۋ ورتالىعى Almaty Creative نارحوز ۋنيۆەرسيتەتىمەن جانە قازاقستاننىڭ كرەاتيۆتى يندۋستريالار اليانسىمەن ىنتىماقتاستىق تۋرالى مەموراندۋمعا قول قويدى، دەپ حابارلايدى aqshamnews.kz الماتى اكىمدىگىنىڭ باسپا ءسوز قىزمەتىنە سىلتەمە جاساپ.
اليانسپەن ىنتىماقتاستىق قازاقستانداعى سالانىڭ دامۋىنا باعىتتالسا، ۋنيۆەرسيتەتپەن ارىپتەستىك ستۋدەنتتەرگە ءبىلىم بەرۋ جانە مانساپتىق مۇمكىندىكتەر ۇسىنادى.
«ءبىلىم – كرەاتيۆتى ەكونوميكانىڭ ىرگەتاسى. ءبىز ەلدىڭ الدىڭعى قاتارلى ۋنيۆەرسيتەتتەرىمەن سەرىكتەستىك ورناتىپ، جاس تالانتتارعا كرەاتيۆتى يندۋستريادا تابىستى مانساپقا قاجەتتى ءبىلىم مەن رەسۋرستار بەرۋگە قۋانىشتىمىز. بۇگىن ءبىز وسى ميسسيادا تاعى ءبىر ماڭىزدى قادام جاساپ، نارحوز ۋنيۆەرسيتەتىمەن ارىپتەستىك ورناتتىق»، – دەپ اتاپ ءوتتى Almaty Creative ورتالىعىنىڭ باس ديرەكتورىنىڭ مىندەتىن اتقارۋشى باحىت ەليۋبايەۆا.
نارحوز ۋنيۆەرسيتەتىنىڭ ەنداۋمەنت قورىنىڭ جەتەكشىسى دانا شاياحمەتتىڭ ايتۋىنشا، Almaty Creative – قالانىڭ كرەاتيۆتى يندۋستريالارىن دامىتاتىن بىرەگەي ۇيىم.
«ءبىزدىڭ سەرىكتەستىگىمىز زەرتتەۋلەر مەن ءبىلىم بەرۋ باعدارلامالارىنىڭ باعىتتارىن نىعايتا تۇسەدى»، – دەدى ول.
نارحوز Almaty Creative سەرىكتەستەرى قاتارىنا قوسىلعان توعىزىنشى جوعارى وقۋ ورنى بولدى. بۇعان دەيىن بۇل جەلىگە ت. جۇرگەنوۆ اتىنداعى ءقازۇوا، AlmaU، تۇران ۋنيۆەرسيتەتى، قۇرمانعازى اتىنداعى قازاق ۇلتتىق كونسەرۆاتورياسى، ءال-فارابي اتىنداعى قازۇۋ، قازۇاۋ، «ادىلەت» كوللەدجى جانە ەۋروپالىق ديزاين ينستيتۋتى (IED) قوسىلعان بولاتىن.