ەرشات وڭعار جاستارعا بولاشاقتا جۇمىسقا ورنالاسۋ ماسەلەسىنە باعدار الىپ، دايىندالۋعا كەڭەس بەردى.
بۇگىن قمدب ءتوراعاسىنىڭ ورىنباسارى، نايب ءمۇفتي، PhD دوكتور ەرشات وڭعار نۇر-مۇباراك ستۋدەنتتەرىنە ارنايى ءدارىس وقىپ، تاجىريبەسىن ءبولىستى، دەپ حابارلايدى Almaty-akshamy.kz نۇر-مۇباراك ۋنيۆەرسيتەتىنىڭ باسپا ءسوز قىزمەتىنە سىلتەمە جاساپ.
ءبىلىم الۋدىڭ ارتىقشىلىعىنا توقتالعان نايب ءمۇفتي: «ادامنىڭ ءبىلىم الىپ جاتقان ۋاقىتى – ەڭ كەرەمەت، قايتالانبايتىن، ءتىپتى دۇعا-تىلەكتەرى قابىل بولاتىن بەرەكەلى كەزەڭ. ءدال ءقازىر قابىل بولماسا دا، كۇندەردىڭ كۇنىندە كەزىندەگى ارمانىڭىزدىڭ اقيقاتقا اينالعانىنا كوزىڭىز جەتىپ جاتادى. ەلىمىزدەگى بىرەگەي يسلامي ۋنيۆەرسيتەتى قابىرعاسىندا ءوتىپ جاتقان ۋاقىتتارىڭىزدى باعالاپ، بىلىمگە ۇمتىلىڭىزدار. پايعامبارىمىز (وعان اللانىڭ سالاۋاتى مەن سالەمى بولسىن): «كىمدە-كىم ءبىلىم ىزدەنۋ جولىنا تۇسسە، وندا اللا وعان ءجانناتقا اپارار جولدى جەڭىلدەتەدى. شىنىندا، پەرىشتەلەر مىندەتتى تۇردە ءبىلىم ىزدەنۋشىگە رازى بولعانىن ءبىلدىرىپ، قاناتتارىن جايادى. شىن مانىندە، عالىم ءۇشىن مىندەتتى تۇردە اسپانداعى ءارى جەردەگى بۇكىل نارسە، ءتىپتى سۋداعى بالىق تا، اللادان ونىڭ كۇنالارىنىڭ كەشىرىلۋىن تىلەيدى» دەگەن. ءبىلىم جايلى ايات-حاديستەر وتە كوپ. ەڭ باستىسى ۋاقىتتارىڭىزدى باعالاپ، ۇستازدارىڭىزدىڭ سوڭىنان قالماي ءبىلىم نارىنە سۋسىنداپ ۇلگەرىڭىزدەر» دەدى.
سونداي-اق قمدب ءتوراعاسى، باس ءمۇفتي ناۋرىزباي قاجى تاعان ۇلىنىڭ باستاماسىمەن 7 باعىتتا قىزمەت ەتىپ جاتقان ءدىني مەكەمەنىڭ جۇمىس بارىسى جايلى دا اتاپ ءوتتى. بۇل ستۋدەنتتەر ءۇشىن بولاشاقتا جۇمىسقا ورنالاسۋ ماسەلەسىندە الدىن-الا باعدار الىپ، قازىرگى ۋاقىتتان باستاپ دايىندالۋىنا كەرەمەت كەڭەس بولدى.
ستۋدەنتتەر ءدارىس سوڭىندا كوكەيلەرىندەگى ساۋالدار مەن تۋىنداعان سۇراقتارىن قويسا، وعان نايب ءمۇفتي ەرشات اعىباي ۇلى تۇشىمدى جاۋاپ بەردى.