الماتى - ءتۇرلى بيزنەستىڭ توعىسقان جەرى. اقشاڭ بولسا جانىڭا كەرەكتىڭ ءبارى تابىلاتىن قالادا ادامعا عانا ەمەس، جانۋارلارعا دا جاعداي جاسالعان. الەمدىك جۇلدىزدار تاڭداپ ورنالاساتىن قىمبات قوناقۇيگە تولى شاھاردا مىسىقتارعا دا ارنالعان ءقوناقۇي بار. اqshamnews.kz تىلشىسىنە سۇقبات بەرگەن NEKOTYAN ءقوناقۇيىنىڭ الەۋمەتتىك ينۆەستورى نازىم وساكا ەرەكشە بيزنەستەگى جولى جايلى باياندايدى.
ءسىڭىلىمنىڭ دياگنوزى سەبەپ بولدى
مەنىڭ اتىم – نازىم، جاسىم 48-دە. ءۇش بالانىڭ اناسىمىن. 25 جىل جاپونيادا ءومىر ءسۇردىم. 6 جىلدان بەرى الماتىدا تۇرامىن. ايمان دەگەن 33 جاستاعى ءسىڭلىمنىڭ داۋن سيندرومى بار بار، ول وتە بەلسەندى قىز، جانۋارلاردى قاتتى جاقسى كورەدى، جانۋارلار دا وعان ۇيىرسەك.
بالا كۇنىمدە ءسىڭلىمدى ەرتىپ قىدىرىپ جۇرگەنىمدە ادامداردىڭ وعان تاڭىرقاي قاراپ قالاتىنىن بايقايتىنمىن. ستۋدەنت كەزىمدە دە ويناتىپ جۇرگەندە كەيبىر ايەلدەر ءسىڭلىمدى اۋلادان الىپ كەتۋىمدى تالاپ ەتەتىن. ولاردىڭ «ونىڭ پسيحيكالىق اۋىتقۋى بار، بالالارىمىزعا زيان كەلتىرۋى مۇمكىن» دەپ قورقاتىنىنا قاتتى قىنجىلاتىنمىن. ءسىڭلىم ەسەيگەن سايىن بۇل جاعداي ودان بەتەر اۋىرلاي ءتۇستى. ساۋدا ورتالىقتارىندا نەمەسە كافەدە وتىرعاندا ەرەسەكتەر دە، جاسوسپىرىمدەر دە وعان اڭتارىلا قاراپ، ۇيالى تەلەفونعا سۋرەتكە ءتۇسىرىپ، كۇلىپ، ساۋساعىن شوشايتاتىن. ءسىڭلىم مۇنىڭ ءبارىن سەزەدى، بەتىن جاۋىپ، تومەن قاراپ، ادامدارعا قاراماۋعا تىرىساتىن. ادامداردىڭ ءوزىن كەلەمەجدەيتىنى، بەت-الپەتىنە جيىركەنە قارايتىنى وعان وتە اۋىر ەدى. ءسىڭىلىمنىڭ جاسىپ قالاتىنى ماعان ودان دا اۋىر تيەتىن.
مەن ءاردايىم ونى قورعاۋعا تىرىسىپ جۇرەمىن. بىرەۋگە ەسكەرتۋ جاسايمىن، قاجەت جەردە سۋرەتكە تۇسىرگەن تەلەفوندى قاعىپ تاستايمىن، ءتىپتى كەي جاعدايلاردا سىندىرعان كەزدەرىم دە بولدى. ءبىراق قوعامدى وزگەرتۋ وڭاي ەمەس. ۋاقىت وتە ءسىڭلىم ۇيدەن شىعۋدان قاشقاقتايتىن بولدى، ءوز كەلبەتىنەن ۇيالا باستادى، اقىرىندا وزىنە سەنىمسىز بولىپ، مىنەزى تۇيىقتالدى. نەگىزى ول وتە مەيىرىمدى قىز. جان-جانۋارعا دا، ادامدارعا دا جانى اشىپ تۇراتىن سەزىمتال.
ايمان اعاسى ساعىممەن بىرگە.
ءبىز ونىڭ ءاردايىم قاسىنان تابىلۋعا تىرىسامىز. اعام ەكەۋمىز دە، انام دا ونى جالعىز قالدىرمايدى. انام كۇنى-تۇنى قاسىندا، ءبىراق جاسى 70-كە كەلگەن ادام، كەيدە قاتتى شارشايتىن كەزدەرى بولادى. ال ءسىڭلىمنىڭ ەنەرگياسى تاۋسىلمايدى، ول ۇنەمى بىردەڭەنى رەتتەپ، جيناپ، ورنىن اۋىستىرادى دا جۇرەدى. سونداي ساتتە مەنىڭ ويىما سىڭلىمە ءبىر جۇمىس اشىپ بەرۋ يدەياسى كەلدى، ويتكەنى ونى ەش جەرگە جۇمىسقا قابىلدامايدى. داۋن سيندرومى بار بالالارعا ارنالعان بالاباقشا دا، ارنايى مەكتەپ تە جوق.
جاپونيادا جۇرگەندە مىسىقتارعا ارنالعان قوناقۇيدە داۋن سيندرومى بار بالالاردىڭ جۇمىس ىستەيتىنى تۋرالى رەپورتاج كورىپ قالدىم. سول كەزدە ءسىڭلىم ءۇشىن الماتىدان ءدال وسىنداي ءقوناقۇي اشۋ يدەياسى كەلدى.
حەيتتىڭ استىندا قالدىق
ءۇيسىز مىسىقتار پانالايتىن ءقوناقۇيىمىزدىڭ بارلىق شىعىنى ءوزىمىزدىڭ موينىمىزدا. كەيدە الەۋمەتتىك جەلىدەگى وقىرماندار جەم الۋعا دونات تولەپ كومەكتەسەدى، ولارعا العىسىمىز شەكسىز.
بۇل جەردى اشقان كۇننەن باستاپ حەيتتىڭ استىندا قالدىق. كەيبىر ميكروبلوگەرلەر وزدەرىنە نازار اۋدارتاتىن حەيت ءۇشىن شىندىققا جاناسپايتىن اقپارات تاراتىپ، قوناقۇيدە «دەنى ساۋ ەمەس ادام جۇمىس ىستەيدى، وعان جانۋارلاردى سەنىپ تاپسىرۋعا بولمايدى» دەپ كورسەتكىسى كەلدى. 2GIS-كە دە كوپە-كورنەۋ وتىرىك پىكىر جازعاندار بولدى. ولاردىڭ ماقساتى نە ەكەنىن بىلمەيمىز، مۇمكىن باسەكەلەستەر شىعار، الدە مۇمكىندىگى شەكتەۋلى ادامداردى جەك كورە مە ەكەن، وكىنىشكە قاراي، وندايلار دا بار.
ءبىر كەزدە ەكى اي بويى بىردە-بىر «قوناق» كەلمەي، شىن مانىندە بوس تۇرعان جاعداي بولدى. جالپى، مىسىقتارعا ارنالعان ءقوناقۇي – ماۋسىمدىق بيزنەس. ءقوناقۇي تولاتىن كەز – وقۋشىلاردىڭ دەمالىس ۋاقىتى: دەمالىستا 100% قوناق بولسا، ال جاي كۇندەرى 30–50%-كە دەيىن «كەلۋشى» بولىپ تۇرادى. سوندىقتان كەيدە شىنىمەن قينالىپ قالامىز. ەڭ تابىستى ۋاقىت – جاز مەزگىلى. جازدا ءقوناقۇي تولى بولادى. كەيدە مىسىقتىڭ يەسى قايتىپ كەلمەي، بايلانىسقا شىقپاي قوياتىن جاعدايلار بولادى. مۇندايدا مىسىق بىزدە قالادى، ارينە، ونى دالاعا تاستاي المايمىز، اسىراپ الاتىن وتباسى تاپقانشا كۇتەمىز.
بىزگە دارەتكە شىعۋدى ۇيرەتۋ قاجەت مىسىقتاردى دا الىپ كەلەدى. كەيدە يەسى اۋرۋحاناعا جاتىپ قالاتىن نەمەسە بوسانعاننان كەيىن 40 كۇن ۇيدەن شىعا المايتىن كەزدە دە بىرنەشە ايعا قالدىراتىندار بولادى. اسىراعان مىسىعىنان بالاسىندا اۋىر اللەرگيا پايدا بولىپ، بىزگە ۋاقىتشا اكەلەتىندەر دە بار. ولارعا اي سايىنعى اقىسىن تولەپ تۇرادى، جاڭا اسىراپ الۋشى تابىلعانشا ءبىز قاراپ بەرەمىز. مىسىقتاردان بولەك توتىقۇس، بالىق، كەسىرتكە، تىشقان، مايمىل، تاسباقا، قويان، شينشيلالاردى دا قابىلدايمىز.
مىسىقتارعا جاپون ستاندارتىمەن جاعداي جاسايمىز
NEKOTYAN ءقوناقۇيى
مىسىقتار ءقوناقۇيى دەگەن دۇرىس ۇيىمداستىرا الساڭ، جاقسى تابىس اكەلەتىن شارۋا. ماڭىزدى تالاپ – تازالىقتى قاتاڭ ساقتاۋ، جانۋارلار كۇتىمىن ۋاقىتىلى جاساۋ. جۇمىستىڭ ەڭ قيىنى – قىزمەتكەرلەردىڭ ءار ۇيشىك، تور، ويىنشىق، ىدىس پەن بولمەنى ءاربىر جانۋاردىڭ ارتىنان مۇقيات دەزينفەكسيالاپ وتىرعانىن باقىلاۋ. اسەپتيكا مەن دەزينفەكسيا ەرەجەلەرىن قاتاڭ ساقتاۋ اسا ماڭىزدى. سونداي-اق كەز كەلگەن جانۋاردى قابىلداعاندا ونىڭ دەنساۋلىعىن مۇقيات تەكسەرىپ الۋ قاجەت. اۋىرىپ تۇرعان جانۋاردى مۇلدە قابىلدامايمىز، ويتكەنى بۇل باسقا «قوناقتارعا» ءقاۋىپ تۋدىرادى. سول سەبەپتى دەنساۋلىعى ءسال كۇمان تۋدىرعان جانۋاردى قابىلداۋدان بىردەن باس تارتۋ كەرەك.
ءبىزدىڭ قوناقۇيدەگى ءاربىر ۇيشىك ۇزىندىعى مەن ەنى ءبىر مەترلىك كۆادرات ءپىشىندى جانە جەكە جەلدەتكىش، سورعىش جۇيەسىمەن، جارىقپەن جانە 24/7 جۇمىس ىستەيتىن تۇنگى كورىنىسى بار بەينەباقىلاۋمەن جابدىقتالعان. ۇيشىكتەردىڭ اۋاسى ءاردايىم تازا ءارى جاڭارىپ تۇرادى، ءىشى جىلى، جەل سوقپايدى. ءار ۇيشىك قوناق بولمە، اجەتحانا جانە ۇيىقتايتىن بولمە سياقتى ءۇش بولىككە بولىنگەن. ءقوناقۇيدىڭ ىشىندە جاپونيانىڭ FUNAI ماركالى سورعىش جەلدەتۋ جۇيەسى جانە SHARP اۋا تازارتقىشى مەن يونيزاتورى بار. مىسىقتارعا ارنالعان جالبىز ءيىستى اۋا ىلعالداندىرعىشتار جۇمىس ىستەيدى.
قوناقۇيدە ءۇش ءتۇرلى ءنومىر ۇلگىسى بار: ستاندارت، پرەميۋم جانە VIP deluxe.
ستاندارت – 90 سم × 1 م
پرەميۋم – 1 م × 1 م
VIP deluxe – 4 شارشى مەتر بولمە.
بارلىق نومىرلەر جەلدەتكىشپەن جانە بەينەباقىلاۋمەن جابدىقتالعان. ءقوناقۇيدىڭ تاۋلىكتىك باعاسى – 2500-3000 تەڭگە ارالىعىندا.
قوناقۇيگە بيزنەس رەتىندە قىزىعۋشىلىق جوعارى. بۇل بيزنەستىڭ ىڭعايلى تۇسى – مۇنى ۇيىڭنەن دە اشا بەرۋگە بولادى. ەڭ باستىسى – جانۋارلاردى جاقسى كورە الۋ. سوندا عانا جۇمىس ءوز جولىمەن جۇرە باستايدى، ال مىسىقتى جاقسى كورمەيتىن ادام مۇندايعا ءوزى دە جولامايدى عوي.
«كوتوتەراپيا» دەگەن نە؟
ءبىزدىڭ قوناقۇيدە «كوتوتەراپيا» دا بار. ياعني قوعاممەن قارىم-قاتىناسى قيىن بالالار كەلىپ، مىسىقتارعا كىتاپ وقىپ بەرە الادى، ولارمەن وينايدى، جانۋارلاردىڭ جانىندا وتىرۋىنا دا بولادى. ۇيىندە مىسىق ۇستاۋعا جاعدايى كەلمەيتىن، ءبىراق مىسىقتاردى جاقسى كورەتىن ەرەسەكتەر دە بار، ولار دا بىزگە كەلىپ، مىسىقتاردى باۋىرىنا باسىپ، سيپاپ، ويناپ، تاماقتاندىرىپ كەتەدى. بۇل تەراپيا – تەگىن. كەز كەلگەن ادام مىسىقتارعا تاتتىلەر اكەلىپ، ءوز قولىمەن بەرۋىنە بولادى، مۇنداي كەلۋشىلەردى قۋانا قارسى الامىز.
ايمان ءسىڭىلىم دە قوناقۇيدە بار ىنتاسىمەن جۇمىس ىستەيدى: تاڭنان كەشكە دەيىن جيناستىرادى، تاماقتاندىرادى، ويناتادى، مىسىقتارعا قامقورلىق جاسايدى. ەڭ قىزىعى –مىسىقتار دا ونى ەرەكشە جاقسى كورەدى. ولار ءسىڭىلىم ەشقاشان تىرناعان ەمەس، وعان قاراپ ايبات شەكپەيدى. كەرىسىنشە، وعان وزدەرى جاقىندايدى، ءۇستىن سيپاسا دا قارسىلاسپايدى، ءتىپتى تىزەسىنە جاتىپ ۇيىقتاپ قالادى. ءسىڭىلىمنىڭ مىسىقتارعا دەگەن ماحابباتى شەكسىز، ولاردى جاقسى كورگەنى ءۇشىن باقىتتى. ايماننىڭ ريزالىعىن كورىپ، ءبىز ودان دا باقىتتىمىز. قوناقۇيدە سىڭىلىمنەن بولەك كاسىبي مىسىق كۇتۋشىلەر دە جۇمىس ىستەيدى، نەگىزگى تازالاۋ، كۇتىم جانە دەزينفەكسيا جۇمىستارى سول مامانداردىڭ موينىندا. سونىمەن قاتار مىسىقتاردى قابىلداپ الاتىن، مەديسينالىق ءبىلىمى بار ادمينيستراتورىمىز دا بار. جاپون ستاندارتىمەن جاسالعان قوناقۇيىمىزگە «قوناق» قابىلداۋعا دايىنبىز!