«مىڭ بالا» وليمپياداسى ءۇشىنشى جىل قاتارىنان قابىلەتتى اۋىل وقۋشىلارىن انىقتاپ كەلەدى.
27-29 ءساۋىر ارالىعىندا (ءۇش كۇندە) I كەزەڭنىڭ بەس مىڭ ءفيناليسى وڭىرلىك تەستىلەۋ ورتالىقتارى بازاسىندا ماتەماتيكالىق ساۋاتتىلىق، قازاق ءتىلى (وقىتۋ قازاق تىلىندە جۇرگىزىلەتىن وقۋشىلار ءۇشىن)، ورىس ءتىلى (وقىتۋ ورىس تىلىندە جۇرگىزىلەتىن وقۋشىلار ءۇشىن)، اعىلشىن ءتىلى جانە جاراتىلىستانۋ بويىنشا اكادەميالىق ءبىلىمدى باعالاۋعا ارنالعان كومپيۋتەرلىك تەستىلەۋدەن وتەدى، دەپ حابارلايدى Almaty-akshamy.kz
«مىڭ بالا» - اۋىلدىق جەرلەردەگى مەكتەپ وقۋشىلارىنىڭ دارىنى مەن قابىلەتىن قولداۋعا، سونداي-اق دارىندى بالالارعا ارنالعان مامانداندىرىلعان مەكتەپتەردە وقۋ ءۇشىن اكادەميالىق قابىلەتتى وقۋشىلاردى ىرىكتەۋگە باعىتتالعان ۇلتتىق اۋقىمداعى بىرەگەي جوبا. «مىڭ بالا» ۇلتتىق زياتكەرلىك وليمپياداسى اۋىل وقۋشىلارى ءۇشىن ءبىلىم بەرۋ سالاسىنداعى باسپالداققا اينالدى.
اۋىل مەكتەپتەرىنە ارنالعان «مىڭ بالا» وليمپياداسىنىڭ ءبىرىنشى كەزەڭى ونلاين فورماتتا ارنايى ازىرلەنگەن پلاتفورمادا وتكىزىلەدى، ونىڭ ەرەكشەلىگى - ءبىر ۋاقىتتا 150 مىڭعا دەيىن قاتىسۋشىلاردىڭ تەست وتۋگە مۇمكىندىگى بار.
«بيىل ءبىز ەلىمىزدىڭ كوپتەگەن اۋىلدارىن قامتي الدىق. وليمپياداعا 146 مىڭنان استام وقۋشى تىركەلدى، 132 مىڭنان استام وقۋشى I كەزەڭنىڭ ونلاين تەستىلەۋىنە قاتىستى. تەستتەر كەڭىستىكتىك جانە لوگيكالىق ويلاۋ قابىلەتتەرىن باعالاۋعا باعىتتالعان. وليمپيادانىڭ ورتاشا ءوتۋ بالى 5-سىنىپتا 347،28، ال 6-سىنىپتا 347،13 باللدى قۇرادى. ەلىمىز بويىنشا جوعارى كورسەتكىشتى قىزىلوردا، سولتۇستىك قازاقستان، جامبىل وبلىستارىنىڭ وقۋشىلارى كورسەتتى»، - دەدى «ەلباسى اكادەمياسى» كق ديرەكتورى اسلانبەك امرين.
وليمپيادا جەڭىمپازدارى كۆوتا بويىنشا دارىندى بالالارعا ارنالعان ەلىمىزدىڭ جەتەكشى مەكتەپتەرىنە: رەسپۋبليكالىق فيزيكا-ماتەماتيكا مەكتەبىنە، «ءبىلىم-يننوۆاسيا» ليسەيىنە، «دارىن» مامانداندىرىلعان مەكتەپتەرىنە وقۋعا تۇسۋگە مۇمكىندىك الادى.
«مىڭ بالا» وليمپياداسىن «ەلباسى اكادەمياسى» كورپوراتيۆتىك قورى قازاقستان رەسپۋبليكاسى ءبىلىم جانە عىلىم مينيسترلىگىمەن سەرىكتەستىكتە بىرلەسە وتكىزەدى.