وليمپيادا ەلىمىزدەگى اۋىل وقۋشىلارىنا ارنالعان.
بۇعان قاتىسۋ ءۇشىن وتىنىمدەر 30 ناۋرىزعا دەيىن قابىلدانادى. ال تەستىلەۋ ونلاين-فورماتتا وتكىزىلەدى، دەپ حابارلايدى Almaty-akshamy.kz.
وقۋ-اعارتۋ مينيسترلىگىنىڭ مالىمەتىنشە، وبلىستار بويىنشا ەڭ جوعارى قورىتىندى بالل العان 5 مىڭ وقۋشى وليمپيادانىڭ ەكىنشى كەزەڭىنەن وتەدى.
«II كەزەڭ 2023 جىلعى ءساۋىر ايىنىڭ 26 مەن 28 ارالىعىندا وڭىرلىك تەستىلەۋ ورتالىقتارىندا كۇندىزگى فورماتتا وتەدى. قاتىسۋشىلار II كەزەڭدە ماتەماتيكالىق ساۋاتتىلىق، قازاق ءتىلى (قازاق تىلىندە وقيتىن وقۋشىلار ءۇشىن)، ورىس ءتىلى (ورىس تىلىندە وقيتىن وقۋشىلار ءۇشىن)، اعىلشىن ءتىلى جانە جاراتىلىستانۋ پاندەرى بويىنشا بىلىمدەرىن باعالاۋعا باعىتتالعان كومپيۋتەرلىك تەستىلەۋدەن ءوتۋ قاجەت. اۋىل مەكتەپتەرىنىڭ 6-سىنىبىنىڭ 500 وقۋشىسى – وتكەن جىلعى (2022 جىل) وليمپيادا فيناليستەرى وسى جىلعى وليمپيادانىڭ ەكىنشى كەزەڭىنە اۆتوماتتى تۇردە وتەدى»، - دەدى «دارىن» رەسپۋبليكالىق عىلىمي-پراكتيكالىق ورتالىعى ديرەكتورىنىڭ ۇيىمداستىرۋ قىزمەتى جونىندەگى ورىنباسارى نۇرلان جۇماگەلدى.
اتالمىش وليمپيادا اۋىلدىق جەرلەردە وقيتىن 6-سىنىپتىڭ ەڭ قابىلەتتى 1000 وقۋشىسىنا ەلىمىزدەگى رەسپۋبليكالىق فيزيكا-ماتەماتيكا مەكتەپتەرىندە، «ءبىلىم-يننوۆاسيا» ليسەيلەرىندە، «دارىن» مامانداندىرىلعان مەكتەپتەرىندە ءبىلىم الۋعا مۇمكىندىك بەرەدى. سونداي-اق وليمپيادانىڭ بەس مىڭ ءفيناليسى Birge oqý ونلاين-مەكتەبىندە تەگىن وقي الادى.
«1-كەزەڭدە ونلاين فورماتتا لوگيكالىق سۇراقتار بەرىلەدى. ولار مەكتەپتىڭ باعدارلاماسىندا جوق. ءتىپتى عالامتوردان كوشىرىپ الۋ دا مۇمكىن ەمەس. بۇل كەزەڭ ونلاين فورماتتا بولاتىندىقتان سۇراقتار سولاي قۇراستىرىلعان. باستىسى، بالانىڭ تەست سۇراقتارىنا ەرەسەكتەردىڭ كومەگىنسىز ءوزى جاۋاپ بەرگەنى دۇرىس»، - دەدى «مىڭ بالا» ۇلتتىق زياتكەرلىك وليمپياداسىنىڭ ۇيلەستىرۋشىسى ايجان ارشابايەۆا.
تاعى ءبىر ايتا كەتەرلىگى، قاتىسۋشىلارعا وليمپيادانىڭ I جانە II كەزەڭدەرىنە دايىندالۋعا ارنالعان تەست تاپسىرمالار ۇلگىلەرى 100bala.elumiti.kz سايتىندا جاريالانعان.
ايتا كەتەيىك، بۇل وليمپياداعا ەلىمىزدە سوڭعى ءۇش جىلدا اۋىل مەكتەپتەرىنەن 590 مىڭنان استام وقۋشى قاتىستى. وسى ۋاقىت ارالىعىندا 3 مىڭ وقۋشى جەڭىمپاز اتانسا، 960-ى دارىندى بالالارعا ارنالعان مەكتەپتەرگە قابىلداندى.