1 ناۋرىز – العىس ايتۋ كۇنىنە وراي «قازاقستان» تەلەراديوكورپوراسياسىنىڭ قازاق راديوسى ءداستۇرلى «مىڭ العىس» شاراسىن وتكىزدى.
مەرەكەلىك شاراعا ق ر مادەنيەت جانە اقپارات ۆيسە-مينيسترى دانيار قادىروۆ، سەنات دەپۋتاتاتتارى ب.جەكسەنباي، گ.شيپوۆسكيح، ا.ساتۆالدييەۆ، ا.قاپباروۆا، ءماجىلىس دەپۋتاتتارى ن.دەمەنتيەۆا، ق.ابدەن، ق.يسا جانە مەملەكەتتىك ورگان جەتەكشىلەرى مەن زيالى قاۋىم وكىلدەرى قاتىستى، دەپ حابارلايدى اlmaty-akshamy.kz.
«مىڭ العىس» جوباسى بيىل جەتىنشى رەت ۇيىمداستىرىلىپ وتىر. وسى ۋاقىت ىشىندە جوبا اياسىندا 25 وتباسى باسپانالى بولىپ، ءتۇرلى دەرتكە شالدىققان، كوپشىلىك قولداۋىنا مۇقتاج 350-گە جۋىق ادامعا كومەك بەرىلدى.
بيىلعى شارانىڭ باستى كەيىپكەرلەرىنىڭ ءبىرى – قازاقستانعا تۋعان اناسىن ىزدەپ كەلگەن جانىبەك ساۆەليەۆ. وتكەن جىلدىڭ جەلتوقسانىندا ەلگە كەلىپ، قازاق راديوسىنىڭ «بارمىسىڭ، باۋىرىم؟» حابارى ارقىلى اناسىن ىزدەگەن جانىبەككە قاتىستى جۇرگىزىلگەن زەرتتەۋ جۇمىستارى ناتيجەسىندە 2001-2002 جىلدارى ارقالىقتا دۇنيەگە كەلگەن 4 بالانىڭ تۋعان اناسى تابىلدى. ال جانىبەكتىڭ ءوز اناسىنا قاتىستى ىزدەۋ جۇمىستارى ءالى دە جالعاسۋدا. شارادا جانىبەك تۋعان حالقىنا العىسىن جەتكىزدى.
«تۋعان انامدى ىزدەۋ وسىنشالىقتى قيىن بولادى دەپ ويلاعان جوقپىن. مەن قازاقستانعا كەلگەن كەزدە بىردەن انامدى تاۋىپ الىپ، ونىمەن كەزدەسەمىن دەپ جوسپارلادىم. انامدى ىزدەۋىم ارقىلى مەنەن بولەك 4 بالانىڭ تۋعان انالارى تابىلعانىنا وتە قۋانىشتىمىن. بۇل مەن ءۇشىن موتيۆاسيا، انامدى ىزدەۋدى توقتاتپايمىن. قازاق جۇرتىنا، تۋعان حالقىما مەنىمەن بىرگە بولعاندارى ءۇشىن ۇلكەن راقمەتىمدى ايتامىن!»، - دەدى جانىبەك ساۆەليەۆ.
شارادا 1930 جىلدارى اتا-باباسى قازاقستانعا قونىس اۋدارعان تۇرىك ەتنوسىنىڭ وكىلى، ەڭبەك ارداگەرى ياشا كوشاليوعلى 52 جىلدان كەيىن دوسىمەن كەزدەستى. ياشا كوشاليوعلىنىڭ اسكەر كەزىندەگى دوسى سۇلتان احمادوۆ رەسەيدىڭ گروزنىي قالاسىنان ارنايى كەلدى. ياشا كوشاليوعلى قازاق راديوسىنىڭ «بارمىسىڭ، باۋىرىم» باعدارلاماسى ارقىلى ءوزىنىڭ جاقىنىن تاپقان 150-گە جۋىق ادامنىڭ قاتارىنا قوسىلدى.
شارانىڭ نەگىزگى كەيىپكەرلەرىنىڭ ءبىرى – ومىردەن وتكەن ءبىر ادامنىڭ دونورلىق ورگانىمەن ءومىر ءسۇرىپ جۇرگەن الماتىلىق سۆەتلانا كايپوۆا مەن دانيار بايبۋلايەۆ. استاناداعى ۇلتتىق عىلىمي ونكولوگيا ورتالىعىنىڭ ترانسپلانتولوگ-دارىگەرى مەلس اسىقبايەۆ ءقازىر ەلىمىزدە 4 مىڭعا جۋىق ناۋقاس دونور كەزەگىندە تۇرعانىن ايتادى. ولاردىڭ 90 پايىزدان استامى بۇيرەككە مۇقتاج.
«بۇل كورسەتكىش تومەندەۋى ءۇشىن مايىتتىك ترانسپلانتاسياعا دەگەن كوزقاراس وڭ بولۋى ءتيىس. مي ءولىمى تىركەلگەننەن سوڭ مارقۇمنىڭ دونور بولۋعا قولحاتى بولعان جاعدايدا تۋىستارىنىڭ رۇقساتىمەن اعزاسى وزگە ادامعا سالىنادى»، - دەيدى ترانسپلانتولوگ.
سونىمەن قوسا شاراعا «مىڭ العىس» جوباسى ارقاسىندا شەتەلدە 4 رەت ەمدەلىپ، تولىق رەميسسياعا شىققان 9 جاستاعى الارناز بەن اناسى گۇلايىم ابراحمانوۆا، 25 بالانى اسىراپ العان اقتوبەلىك جەتەسوۆتەر وتباسى، استانادا ورتەنىپ جاتقان كوپقاباتتى ۇيدەن ءبىر ادامدى امان الىپ شىققان عالىمبەك وتەشيەۆ قاتىستى.
ءداستۇرلى جوبانىڭ ماقساتى – مۇقتاج جاندارعا كوپشىلىكتىڭ اتسالىسۋىمەن كومەك كورسەتىپ، قايىرىمدىلىق پەن ىزگىلىكتى ناسيحاتتاۋ، قايىرىمدى جاندارعا العىس ايتۋ.