ءا.قاستەيەۆ اتىنداعى ق ر مەملەكەتتىك ونەر مۋزەيىندە دە مەرەكە. حالىقارالىق «مۋزەي ءتۇنى» ءىس-شاراسى اياسىندا ونەرسۇيەر قاۋىمنىڭ نازارىنا مۋزەي قورىنان الىنعان جادىگەرلەر نەگىزىندە «جاپون ونەرى. XVII-XXI عاسىرلار» اتتى كورمە اشىلدى جانە كاتالوگتىڭ تۇساۋكەسەرى ءوتتى.
“قازاقستاننىڭ جەتەكشى ونەر مۋزەيىنىڭ قورىنان جاپون ونەرىنىڭ كاتالوگىن باسىپ شىعارۋ ەكى ەل اراسىنداعى حالىقارالىق مادەني ءوزارا ءىس-قيمىلدى نىعايتۋ مەن جانداندىرۋعا سەپتىگىن تيگىزەدى دەگەن ۇمىتتەمىز”، - دەدى مۋزەي ديرەكتورى گۇلايىم جۇمابەكوۆا.
اتالمىش كاتالوگقا 250 شىعارما كىردى، ولاردىڭ كوپشىلىگى 1936 جىلدان باستاپ مۋزەي قورىنا مەملەكەتتىك شىعىس ونەرى مۋزەيىنەن، قازاقستان مەملەكەتتىك ورتالىق مۋزەيىنەن، سەلينوگراد وبلىستىق تاريحي-ولكەتانۋ مۋزەيىنەن جانە ت.ب. بەرىلدى. مۋزەيدىڭ عىلىمي قىزمەتكەرلەرى وسى كوللەكسيانى زەرتتەپ، «جاپون ونەرى. XVII-XXI عاسىرلار» اتتى كاتالوگتى دايىنداپ، 150 جىلدىق تاريحى بار، كەڭسە جانە كاسىبي سيفرلىق شىعارۋ سالاسىنداعى الەمدىك كوشباسشى KONICA MINOLTA KAZAKHSTAN كومپانياسىنىڭ قولداۋىمەن جارىققا شىعاردى.
سونداي-اق، ايگىلى زاماناۋي جاپون سۋرەتشىسى كاورۋ موري جاساعان، قىزىقتى الەمگە ەنۋگە مۇمكىندىك بەرەتىن «قالىڭدىقتىڭ حيكاياسى» سەرياسىنىڭ مانگا كورمەسى اشىلدى.
كورمە ەكسپوزيسياسىندا جەتە ورىندالعان يلليۋستراسيالاردىڭ 207 پاراعىنان تۇراتىن وسى سەريانىڭ 14-تومى ۇسىنىلعان. ولار ورتالىق ازيانىڭ جارقىن جانە ەرەكشە مادەنيەتى مەن ءومىر سالتىن كورسەتەتىن اسەرلى، ءارى شيەلەنىسكەن وقيعالاردى، اسەرلى كەيىپكەرلەردى سيپاتتايدى.
مەرەكەلىك ءىس-شارا سەرىكتەسى «يچيكاۆا» جاپون ورتالىعى جانە ءال-فارابي اتىنداعى ءقازۇۋ-نىڭ شىعىستانۋ كافەدراسىنىڭ ۇيىمداستىرۋىمەن «XVII-XXI عع. جاپون ونەرى» ەكسپوزيسيا زالىندا وريگامي، كالليگرافيا، جاپون ءتىلىن ۇيرەنۋ، تەماري (جىپتەن شار جاساۋ ونەرى) بويىنشا شەبەرلىك ساباقتارى تەگىن وتۋدە.