ءابدىۋاقاپ قارا مۇستافا شوقايدىڭ ءومىرىن ۇزاق جىلدار بويى زەرتتەپ كەلەدى.
عالىم، پروفەسسور ءابدىۋاقاپ قارانىڭ مۇستافا شوقاي كىتابى تۇركيادا جارىق كوردى، دەپ حابارلايدى Almaty-akshamy.kz.
Qazaqstan.tv مالىمەتىنشە، مادەنيەت جانە سپورت مينيسترلىگى تۇركى دۇنيەسىنىڭ 100 تاريحي تۇلعاسى تۋرالى كىتاپتار توپتاماسىن شىعارۋ جونىندە شەشىم قابىلداعان. ولاردىڭ قاتارىنا الاش قايراتكەرى مۇستافا شوقايدىڭ ءومىرى مەن شىعارماشىلىعى تۋرالى كىتاپ تۇڭعىش رەت ەنىپ وتىر. ۇزاق جىلدار بويى مۇستافا شوقايدىڭ ءومىرىن زەرتتەپ جۇرگەن عالىم ءابدىۋاقاپ قارا بۇل كىتاپتىڭ توپتاماعا ەنۋى كۇللى قازاقتىڭ جەتىستىگى ەكەنىن ايتادى.
«كەلەسى جىل تۇركيا رەسپۋبليكاسىنىڭ 100 جىلدىعىنا وراي 100 ۇلى تۇركى دۇنيەسىنىڭ تاريحي تۇلعاسى سەرياسىمەن شىققان كىتاپتىڭ تۇساۋكەسەرى بولدى. بۇل كىتاپتار 2021 جىلدان باستاپ شىعا باستادى. بيىل جالعاسىن تابادى»، - دەدى م. شوقاي كىتابىنىڭ اۆتورى، پروفەسسور ءابدىۋاقاپ قارا.