– ءبىز ءوز تاڭداۋىمىزدى جاسادىق. دالىرەك ايتقاندا، ءوزىمىز تىركەلگەن جەرىمىز بويىنشا №157 سايلاۋ ۋچاسكەسىندە داۋىس بەردىك. قازاق ەلىنىڭ تىزگىنىن ۇستار ايبىندى، وتانشىل رۋحتاعى ازاماتقا داۋسىمىزدى بەردىك. وسى ءساتتى پايدالانىپ ايتارىم، مەملەكەت باسقاراتىن ادامنىڭ بويىنان بىرنەشە قاسيەت جانە ايرىقشا مىنەزدەردى كورگىمىز كەلەدى. ەلىمىزدىڭ جاڭادان سايلاناتىن باسشىسى حالىقتىڭ الەۋمەتتىك-ەكونوميكالىق ءال-اۋقاتىنىڭ ارتۋىنا ءوز ۇلەسىن قوسىپ، تۇيتكىلدەردى تارقاتادى دەگەن نيەتتەمىز.
اۋىلداردان كەلگەن قاراكوزدەرىمىز الىپ شاھارلاردا تىرلىك قىلۋدا. كوبىسى قيىرداعى، قيانداعى اۋىلدىڭ ازاماتتارى مەن ازاماتشالارى. سونىمەن قاتار باسپانا ماسەلەسى شەشىمىن تاۋىپ، الداعى ۋاقىتتا جاس وتباسىلار ءۇيلى-جايلى بولادى دەگەن ۇمىتتەمىز. تاعى ءبىر قوسا ايتاتىن دۇنيە بار. ول، البەتتە – جۇمىسسىزدىق. وزدەرىڭىز كورىپ وتىرعانداي، پرەزيدەنت بولۋ وڭاي شارۋا ەمەس. وسىنشاما قىرۋار تىرلىك الداعى سايلاناتىن مەملەكەت باسشىسىنىڭ موينىنا ارتىلايىن دەپ تۇر. سوڭعى ۋاقىتتا ەلىمىز ەڭسەسىن تۇزەي باستادى. ءبارى بىردەن ورناي قالماس. دەسە دە، العا ۇمتىلا بەرگەن ابزال. ويتكەنى وتانىمىز، مەملەكەتىمىز، كەڭ بايتاق جەرىمىز بارىمىزگە ورتاق، اعايىن!
بولاشاققا سەنىم مول!