«مۇقاعالي» ءفيلمى قازان كينوفەستيۆالىندە ارنايى جۇلدەگە يە بولدى

جۇلدە فيلمدەگى باستى كەيىپكەردى سومداعان اكتەر اسلانبەك جانبالايەۆقا بەرىلدى.

قازاقستاندىق ەكى فيلم قازانداعى حالىقارالىق مۇسىلمان كينوفەستيۆالىندە جۇلدەلى ورىندارعا يە بولدى، دەپ حابارلايدى Almaty-akshamy.kz

«كورەرمەن كوزايىمى» جۇلدەسىن تاتارستان مەن قازاقستاننىڭ بىرلەسكەن جوباسى – «تارلان» ءفيلمى الدى. ماراپاتتى تابىستاۋ ءۇشىن ءفيلمنىڭ رەجيسسەرى يۋليا زاحاروۆا، ءفيلمنىڭ قازاقستاندىق تاراپتاعى باس پروديۋسەرى الماگۇل تىلەۋحانوۆا جانە ءفيلمنىڭ باس كەيىپكەرى بەكەجان ماياساروۆ شاقىرىلدى.

قازىلار القاسىنىڭ ارنايى جۇلدەسى «مۇقاعالي» (قازاقستان) فيلمىنە بۇيىردى. بۇل تۋىندى قازاقتىڭ اقىنى مۇقاعالي ماقاتايەۆقا ارنالعان جانە فيلم ونىڭ ءومىرىنىڭ سوڭعى جىلدارىن باياندايدى.

«مۇقاعالي» ءفيلمىنىڭ رەجيسسەرى – بولات قالىمبەتوۆ. ءفيلمنىڭ الەمدىك تۇساۋكەسەرى «قاراڭعى تۇندەر» 25ء-شى تاللين كينوفەستيۆالى (PÖFF) اياسىندا ءوتىپ، وندا قازاقستاندىق فيلم ەكۋمەنيكالىق قازىلار القاسىنىڭ جۇلدەسىنە يە بولدى.

وسى جىلدىڭ ناۋرىز ايىندا بيوگرافيالىق كارتينا كەرالادا (ءۇندىستان) وتكەن 26-شى حالىقارالىق كينوفەستيۆالدىڭ «الەمدىك كينو» نوميناسياسى بويىنشا ۇسىنىلدى.

7-11 قىركۇيەك ارالىعىندا تاتارستان استاناسىندا قازان حالىقارالىق مۇسىلمان كينوفەستيۆالى ءوتتى. XVIII قازان مۇسىلمان كينوفەستيۆالى اياسىندا جۇرتشىلىق نازارىنا كينوفورۋمنىڭ كونكۋرستىق جانە بايقاۋدان تىس باعدارلامالارىنىڭ 120-دان استام كينوتۋىندىسى ۇسىنىلدى. كينوكورسەتىلىمدەرىن 10 مىڭنان استام كورەرمەن تاماشالادى.

ىسكەرلىك الاڭعا رەسەي ايماقتارى مەن الىس-جاقىن شەت مەملەكەتتەردەن كينويندۋستريا سالاسىنىڭ 165 وكىلى قاتىستى. نەگىزگى بايقاۋ باعدارلاماسىنا تۇركيا، قازاقستان، ءۇندىستان، يران، بانگلادەش، مىسىر فيلمدەرى، سونداي-اق بىرلەسكەن وندىرىستە تۇسىرىلگەن ەكى فيلم كىردى. بيىل الەمنىڭ 44 ەلىنەن بارلىعى 625 كينوتۋىندى تىركەلگەن.