استانا قالاسىنىڭ قىلمىستىق ىستەر جونىندەگى اۋدانارالىق سوتىندا ارىستانبەك مۇحامەدي ۇلىنىڭ ءىسى بويىنشا الدىن الا تىڭداۋ ءوتتى.
سوت ەكى ەپيزودتى ءبىر سوت ءىسىن جۇرگىزۋگە بىرىكتىردى: ءبىرىنشىسى، "التىن ادامنىڭ شەرۋى" كورمەسىن وتكىزۋگە قاتىستى تەرگەۋ دەرەكتەرى بويىنشا جاڭا ءمان-جايلاردىڭ پايدا بولۋىنا قاتىستى؛ ەكىنشىسى – استاناداعى "ديپلومات" ءقوناقۇيىن يەمدەنۋ كەزىندە قيانات جاساۋ جانە رەيدەرلىك ارەكەت.
استانالىق ادۆوكاتتار القاسىنىڭ ادۆوكاتى ايگۇل يسماعۇلوۆانىڭ ايتۋىنشا، سوت وتىرىسىندا جەتى ادام وتىر. الدىن الا تىڭداۋ كەزىندە بەس ادام تىكەلەي سوت زالىندا بولدى: ارىستانبەك مۇحامەدي ۇلى، اباي ساتىبالدين، لەونيد كوچەتوۆ، الماس نۇرازحان جانە ازامات كوشەنوۆ جانە تاعى ەكى ايىپتالۋشى - ايىم ءسادۋاقاسوۆا مەن گۇلزات جۋاسپايەۆا كونفەرەنس-بايلانىس ارقىلى ونلاين رەجيمىندە قاتىستى.
"بىزگە 2017، 2018 جانە 2019 جىلدارداعى "التىن ادامنىڭ شەرۋى" كورمەسى تۋرالى ەپيزود بويىنشا ۇرلىق جاسادى دەگەن ايىپ تاعىلىپ وتىر. ۇرلىقتىڭ سوماسى شامامەن 1،5 ميلليارد تەڭگەنى قۇرايدى.ءبىز بۇل ايىپتاۋ اكتىسىمەن كەلىسپەيمىز، ويتكەنى كىنا ەشتەڭەمەن راستالماعان.ارينە، ءبىز كىناسىزدىكتى دالەلدەيمىز، كىناسىزدىك پرەزۋمپسياسى بار، ونى ەشكىم جويعان جوق.ءىستىڭ ءبىرىنشى ساتىداعى سوتتا ءادىل جانە وبەكتيۆتى قارالىپ، ءىس بويىنشا بارلىق ءمان-جايلار انىقتالاتىنىنا سەنەمىز"- دەدى لەونيد كوچەتوۆتىڭ ادۆوكاتى ايگۇل يسماعۇلوۆا.