جەلىدە الماتى وبلىسى تالعار اۋدانىنداعى مەكتەپتەردىڭ ءبىرىنىڭ باسشىلىعى مۇعالىمدەردەن اقشا جيناپ جاتىر دەگەن اقپارات تارادى، دەپ حابارلايدى aqshamnews.kz
جەلىدە تاراعان ۆيدەودا مەكتەپ باسشىلىعى مۇعالىمنەن الداعى سەميناردى ۇيىمداستىرۋعا كومەكتەسۋىن وتىنەدى.
ايەل ناقتى قانداي كومەك كەرەك ەكەنىن سۇراعاندا، اڭگىمەلەسۋشى ءار مۇعالىمنەن 2 مىڭ تەڭگەدەن جيناۋدى ۇسىنادى جانە باسقا مەكتەپتەردىڭ كوپشىلىگى بۇل اقشانى الدەقاشان تاپسىرىپ قويعانىن ايتادى. الايدا ايەل قارجىلىق جاعدايىنا بايلانىستى بۇل ىسكە اتسالىسا المايتىنىن تۇسىندىرەدى.
ۆيدەو جاريالانعان سوڭ ءوڭىردىڭ ءبىلىم باسقارماسى تەكسەرۋ جۇرگىزدى. وقيعا تالعار اۋدانىنداعى №8 مامانداندىرىلعان مەكتەپتە بولعان.
ءبىلىم باسقارماسى الەۋمەتتىك جەلىلەردە تاراعان «№8 مامانداندىرىلعان مەكتەپ مۇعالىمدەرىنەن اقشا جينالىپ جاتىر» دەگەن اقپاراتتى تەكسەردى. اقشا جيناۋ تۋرالى دەرەك راستالمادى. الايدا مەكتەپ ديرەكتورى ارىپتەستەرىنە 2025 جىلى 17 قازاندا وتەتىن فيزيكا ءپانى مۇعالىمدەرىنە ارنالعان سەمينارعا باننەر دايىنداۋعا جانە وقۋ روبوتىن جالعا الۋعا كومەكتەسۋدى ۇسىنعان، - دەلىنگەن الماتى وبلىسى اكىمدىگىنىڭ باسپا ءسوز قىزمەتى تاراتقان حابارلامادا.
تەكسەرۋ قورىتىندىسى بويىنشا مەكتەپ ديرەكتورىنا ق ر ەڭبەك كودەكسىنىڭ 64-بابى بويىنشا قاتاڭ سوگىس تۇرىندەگى تارتىپتىك جازا قولدانىلدى.
ەسكە سالايىق، بۇعان دەيىن مۇعالىمدەر قۇقىعى ءجيى بۇزىلاتىن 5 وبلىس بەلگىلى بولعان ەدى.
ءبىلىم سالاسىندا ساپانى قامتاماسىز ەتۋ كوميتەتىنىڭ ءتوراعاسى سەرىك ءاشىروۆتىڭ ايتۋىنشا، قوستاناي، الماتى، اباي، جامبىل جانە پاۆلودار وبلىستارىندا ءالى دە بۇزۋشىلىقتار بولىپ جاتىر. ولار كوپ جاعدايدا پەداگوگكە ءتان ەمەس جۇمىستارعا تارتۋ بويىنشا، پەداگوگتەردىڭ ار-نامىسىنا تيۋ، ياعني بالاعاتتاۋ بويىنشا، كونسەرت بيلەتتەرىن ساتىپ الۋعا جانە ءارتۇرلى شارالارعا كورەرمەن رەتىندە قاتىسۋعا ماجبۇرلەۋ بويىنشا تىركەلگەن.