بۇل تۋرالى بىلتىر حابارلاعانبىز.
ۇكىم ءالى زاڭدى كۇشىنە ەنگەن جوق، دەپ حابارلايدى Almaty-akshamy.kz ق ر جوعارعى سوتىنىڭ باسپا ءسوز قىزمەتىنە سىلتەمە جاساپ.
الماتى قالاسى مەدەۋ اۋدانىنىڭ №2 اۋداندىق سوتىندا پارا الماق بولدى جانە الاياقتىق جاسادى دەپ ايىپتالعان ەكى ادامعا قاتىستى قىلمىستىق ءىس قارالدى.
سوت نەنى انىقتادى؟
م.، الماتى قالاسى ءبىلىم باسقارماسىنىڭ مەملەكەتتىك ساتىپ الۋلار جونىندەگى باس مامانى بولا تۇرا، كاسىپكەر ن.-دان پارا الۋ ماقساتىندا ونىڭ “ب» ج ش س جانە «ا» ج ش س كومپانيالارىن ەرەكشە قاجەتتىلىكتەرى بار بالالاردىڭ، جەتىم بالالار مەن اتا-اناسىنىڭ قامقورلىعىنسىز قالعان بالالاردىڭ جازعى دەمالىسىن ۇيىمداستىرۋ جونىندەگى مەملەكەتتىك ساتىپ الۋ كونكۋرسىنىڭ جەڭىمپازى دەپ تانىعان.
2023 جىلدىڭ جازىندا ن. ءوزىنىڭ جەكە مەكتەبىنە 50 بالانى اكەلگەن. سول كۇنى بالالار لاگەرىن ۇيىمداستىرامىز دەگەن جەلەۋمەن 300 بالانى فيتنەس ورتالىعى بار مونشا كەشەنىنە اكەلگەن.
بالالاردىڭ اتا-انالارى جەكە مەكتەپ پەن فيتنەس-ورتالىعى بار مونشا كەشەنىنىڭ شىن مانىندە بالالاردىڭ دەمالىس ايماعىنا اينالعانىن ءبىلىپ، بالالاردى ۇيلەرىنە الىپ كەتكەن.
م. جانە ن.-نىڭ قىلمىستىق ارەكەتتەرىنىڭ ناتيجەسىندە قولايسىز جاعدايدا، بەيتانىس ادامداردىڭ اراسىندا بولعان، ونىڭ ىشىندە ەرەكشە كۇتىمدى قاجەت ەتەتىن بالالاردىڭ جازعى دەمالىسى بۇزىلعان.
سوتتالۋشىلاردىڭ كىناسى ءىس بويىنشا جيناقتالعان دالەلدەمەلەرمەن، سوتتالۋشى ن.-نىڭ كىنالى ىس-ارەكەتتەردى جاساعانىن مويىنداۋىمەن، كۋالاردىڭ ايعاقتارىمەن، مامانداردىڭ قورىتىندىلارىمەن، جاسىرىن تەرگەۋ ارەكەتتەرىنىڭ ناتيجەلەرىمەن جانە ت.ب. دالەلدەندى.
تاراپتاردىڭ پوزيسياسى
سوتتالۋشى م.، كىناسىن مويىنداماي، سوتتان ءوزىن اقتاۋدى سۇرادى.
سوتتالۋشى ن.، ءوز كىناسىن تولىق مويىنداپ، باس بوستاندىعىنان ايىرۋمەن بايلانىستى ەمەس جازا تاعايىنداۋدى سۇرادى. پروكۋرور م. – 7 جىل، ن. – 5 جىل جازا تاعايىنداۋدى سۇرادى.
سوتتىڭ شەشىمى
سوت ۇكىمىمەن م.، اسا ءىرى مولشەردە پارا الۋعا ارەكەتتەنگەنى ءۇشىن كىنالى دەپ تانىلدى. ول ءومىر بويىنا مەملەكەتتىك قىزمەتتە قىزمەت اتقارۋعا تىيىم سالىنىپ، 6 جىلعا باس بوستاندىعىنان ايىرىلدى.
ن. اسا ءىرى مولشەردە الداۋ جانە سەنىمگە قيانات جاساۋ ارقىلى الاياقتىق ارەكەتى ءۇشىن سوتتالدى. وعان 5 جىل مەرزىمگە باس بوستاندىعىنان ايىرۋ جازاسى تاعايىندالدى. جازانى تاعايىنداۋ كەزىندە سوت جەڭىلدەتەتىن ءمان-جايلاردى: سوتتىلىعىنىڭ بولماۋىن، سوتتالۋشى م.-نىڭ اسىراۋىندا ەكى كىشكەنتاي بالاسىنىڭ بولۋىن جانە ن.-نىڭ جاساعان قىلمىسىنا وكىنۋىن ەسكەردى. ەشقانداي اۋىرلاتاتىن ءمان-جايلار انىقتالعان جوق.