ۇلتتىق قۇرىلتايدىڭ ءۇشىنشى وتىرىسىندا مەملەكەت باسشىسى قاسىم-جومارت توقايەۆتىڭ سويلەگەن سوزىندە شەتەلدە جۇمىس ىستەپ جۇرگەن وتانداستارىمىزدىڭ جايى ايتىلدى، دەپ حابارلايدى اlmaty-akshamy.kz.
«امەريكانىڭ وزىندە ورتالىق ازياداعى كورشىلەس ەلدەردىڭ مىڭداعان ازاماتتارى تۇرىپ جاتىر. كوبى بيزنەسىن جۇرگىزىپ، ساۋدامەن اينالىسادى، اراسىندا قالتالى ادامدار پايدا بولۋدا. ءبىراق ولار ءوزىنىڭ ۇلتتىق ەرەكشەلىگىن جوعالتقان جوق. ەڭ دامىعان ەلدەردىڭ ازاماتتارى دا شەتەل اسىپ، تابىس تابۋعا نامىستانبايدى. زاماناۋي كوشپەندىلەر، Modern Nomads دەگەنىمىز – وسى. بۇل – بۇكىل الەمدە بولىپ جاتقان ءۇردىس»، - دەيدى پرەزيدەنت.
مەملەكەت باسشىسىنىڭ سوزىنشە، سوڭعى جىلدارى ءبىزدىڭ دە جاستارىمىز شەتەلگە ءجيى شىعا باستادى. ءقازىر قازاقستاننىڭ 200 مىڭعا جۋىق ازاماتى زاڭدى تۇردە سىرتتا جۇمىس ىستەپ ءجۇر. تابىس تابۋ ءۇشىن شەتەلدە بەيرەسمي ەڭبەك ەتىپ جۇرگەندەر دە بار. قاي جەردە بولسىن، ەڭبەكتىڭ، كاسىپتىڭ جامانى بولمايدى. تەك ءبارى زاڭدى بولۋى كەرەك. سوندا مەملەكەت ولاردىڭ قۇقىعىن قورعاپ، قانداي ءبىر جاعداي بولسا، كومەكتەسە الادى.
«ەل ىشىندە نەمەسە شەتەلدە زاڭدى تۇردە جۇمىس ىستەپ، تابىس تابۋعا مۇمكىندىك تۋسا، ودان باس تارتپاعان ءجون. ەڭ باستىسى – ادال ەڭبەك ەتۋ، ادال جولمەن تابىس تابۋ، ادال ازامات بولۋ»، - دەدى قاسىم-جومارت توقايەۆ.