ەندى جۇرگىزۋشى كۋالىگىن العاش رەت الاتىن ازاماتتار «ءموبيلدى حقو» قوسىمشاسى ارقىلى مامانداندىرىلعان حالىققا قىزمەت كورسەتۋ ورتالىعىنا ەمتيحان تاپسىرۋعا ءوتىنىش بەرىپ، الدىن الا كەزەكتى برونداي الاتىن بولادى. بۇل جاناشىلدىق ۋاقىت ۇنەمدەۋگە ءارى محقوداعى قىزمەتالۋشىلاردىڭ اعىنىن ازايتۋعا سەپتىگىن تيگىزەدى، دەپ حابارلايدى almaty-akshamy.kz
ول ءۇشىن قولدانۋشىعا «ءموبيلدى حقو» قوسىمشاسىندا «بەينە قىزمەتتى» تاڭداۋ كەرەك. بۇل سەرۆيس قىزمەتالۋشى العاشقى اقپاراتتى الۋ ءۇشىن مقكو وپەراتورىمەن بايلانىستىرادى. ودان كەيىن كليەنتكە مەملەكەتتىك باجدى تولەۋگە نەمەسە الدىن الا تولەنگەن تۇبىرتەكتى ۇسىنۋعا مۇمكىندىك بەرىلەدى. تولەم جاسالعاننان كەيىن № 073/ۋ فورماداعى مەديسينالىق انىقتامانىڭ، اۆتومەكتەپتى اياقتاعانى تۋرالى كۋالىكتىڭ، قىزمەتالۋشىنىڭ سۋرەتىنىڭ سكانەرلەنگەن نۇسقالارىن جانە تالاپقا سايكەس قويىلعان قولتاڭبانى سۇراتاتىن بولادى. وپەراتورمەن سويلەسۋ بارىسىندا اتالعان بارلىق قۇجاتتى ديالوگتىق تەرەزەدە تىركەۋ قاراستىرىلعان. ايتا كەتەتىن جايت، ازامات ءوتىنىشتى ءساتتى تاپسىرعاننان كەيىن، محقو-عا الدىن الا كەزەكتى برونداۋ ءۇشىن ەمتيحان تاپسىراتىن كۇن مەن ۋاقىت ۇسىنىلاتىن بولادى.
«بۇرىن ەمتيحان تاپسىراتىن ازاماتتار ءوتىنىش بەرۋ جانە تولەم جاساۋ ءۇشىن محقوعا بارۋعا مىندەتتى بولاتىن. ەندى بۇل قىزمەتتى ۇيدەن شىقپاي، ونلاين الۋعا بولادى. ياعني، بەينەقوڭىراۋ ارقىلى ءوتىنىش بەرىپ جانە كەزەكتى الدىن-الا بروندايدى. ودان كەيىن كليەنت محقوعا بەكىتىلگەن ۋاقىتتا كەلىپ، ەمتيحانىن تاپسىرىپ كەتە الادى. بولاشاقتا ءوتىنىش بەرۋ فنكسياسىن ەلەكتروندى پورتالعا جانە ەكىنشى دەڭگەيلى بانكتەردىڭ اقپاراتتىق جۇيەلەرىنە ەنگىزۋ جوسپاردا بار» - دەدى باسقارما ءتوراعاسى سۇيەنىش ءابدىلدين.
ايتا كەتەيىك، سەرۆيسپەن eGov mobile قوسىمشاسىندا دا قولدانۋعا بولادى. ول ءۇشىن باستى بەتتەگى «بەينەحقو» باتىرماسىن تاڭداۋ قاجەت.
الماتى قالاسىندا 2 محقو-دا تەوريالىق جانە پراكتيكالىق ەمتيحاندار كەلەسى مەكەنجايدا قابىلدانادى: № 1 محقو ءبولىمى – سايالى ش/ا، اققاينار ك-سى، 1؛ № 1 محقو ءبولىمى - جەتىسۋ اۋدانى، كامەل شاعىناۋدانى، اقسۋات، 118.