ۇلتتىق Miss Qazaqstan 2025 سۇلۋلىق بايقاۋى بيىل ەرەكشە فورماتتا وتەدى. اقتىق كەزەڭ الماتى مەتروپوليتەنىندە، ناقتىراق ايتقاندا – مۇحتار اۋەزوۆ اتىنداعى ستانسيادا ۇيىمداستىرىلادى. بۇل تۋرالى بايقاۋ ديرەكتورى ايجان رۋزايەۆا وڭىرلىك كوممۋنيكاسيالار قىزمەتىندە وتكەن باسپا ءسوز كونفەرەنسياسىندا مالىمدەدى.
ونىڭ ايتۋىنشا، مەترو – قاتىناس قۇرالى عانا ەمەس، مادەني وزگەرىستەر مەن ۋربانيستيكانىڭ نىشانى. سول سەبەپتى بايقاۋدىڭ بيىلعى تاقىرىبىن «تاڭداۋ ەركىندىگى» دەپ قويعان.
«الماتىنىڭ مەتروسى - مادەني الاڭ دا. ءبىز بايقاۋدى حالىققا جاقىن ەتكىمىز كەلەدى. ارحيتەكتۋرا مەن قالالىق اتموسفەرا اياسىندا وتەتىن فينال ناعىز ەستە قالارلىق وقيعا بولماق»، - دەدى ايجان رۋزايەۆا.
بيىلعى Miss Qazaqstan شوۋى سۇلۋلىق، ءسان، تەحنولوگيا مەن قالا اتموسفەراسىن بىرىكتىرمەك. ۇيىمداستىرۋشىلار مۇحتار اۋەزوۆ اتىنداعى ستانسيانى بەكەر تاڭداماعانىن ايتادى. مەترو – ءتۇرلى وقيعالار مەن تاعدىرلار دا توعىسقان جەر.
سپيكەرلەردىڭ ايتۋىنشا، ىرىكتەۋ 15 قالادا ءوتىپ جاتىر. قاتىسۋشىلارعا تەك سىرتقى سۇلۋلىق ەمەس، ىشكى الەمى، بەلسەندىلىگى مەن كوزقاراسى بويىنشا دا تالاپ قويىلادى.
«بىزگە جاي عانا سۇلۋ قىز ەمەس، ويى تەرەڭ، شابىتتاندىرا الاتىن، قازىرگى قازاق ايەلىنىڭ بەينەسىن - ەركىن، باتىل ءارى سانالى تۇلعاسىن كورسەتە الاتىن ارۋلار قاجەت»، - دەدى ۇيىمداستىرۋشىلار.
بايقاۋدىڭ PR-مەنەدجەرى قۇرالاي قۇرمان فينال وتەتىن ورىننىڭ ەرەكشەلىگىنە دە توقتالدى.
«Miss Qazaqstan بايقاۋىن ءسان ساحناسى ەتىپ قانا قويماي، اركىم ءوزىن كورسەتەتىن، شابىت سىيلايتىن ەركىن الاڭعا اينالدىرعىمىز كەلەدى. سۇلۋلىق دەگەن – شەكتەۋ ەمەس، ادام ءوز ويىنداعىسىن اشىق ايتاتىن ۇلكەن مۇمكىندىك تە ەكەنىن دە قوعامعا جەتكىزبەكپىز»، - دەيدى ول.
Miss Qazaqstan 2025 بايقاۋىنىڭ مارەسى جاي عانا ءسان شاراسى ەمەس، ناعىز مادەني مانيفەست بولماق. كوركەم ساحنا، سيفرلىق تەحنولوگيالار، جاندى مۋزىكا مەن ەرەكشە ساۋلەت توعىساتىن بۇل وقيعانى قالا تۇرعىندارى دا تاماشالاي الادى.