وقۋ-اعارتۋ ءمينيسترى عاني بەيسەمبايەۆ قازاقستاندىق وقۋشىلاردىڭ قىرىمعا ساپارى تۋرالى پىكىر ءبىلدىردى.
ايتۋىنشا، مينيسترلىك سايكەس بۇيرىقسىز بالالاردىڭ شەتەلگە شىعۋىنا تىيىم سالۋدى جوسپارلاپ وتىر، دەپ حابارلايدى Almaty-akshamy.kz.
- بالالاردىڭ ءبارى امان-ەسەن ورالدى. اتا-انالارىنىڭ قولىنا تابىستالدى. مۇعالىمگە سايكەس جازا بەرىلدى، - دەپ اتاپ ءوتتى ۆەدومستۆو باسشىسى ۇكىمەتتىڭ كۋلۋارىندا تىلشىلەرگە بەرگەن سۇحباتىندا.
سونىمەن قاتار ول لاگەرگە بالالار اتا-اناسىنىڭ باستاماسىمەن بارعاندىعىن ايتتى.
«مينيسترلىكتىڭ بۇيرىعىنسىز جانە بالالاردى قورعاۋ كوميتەتىنىڭ رۇقساتىنسىز وقۋشىلاردى شەتەلگە شىعارۋعا تىيىم سالۋ بويىنشا جۇمىستار جۇرگىزىلىپ جاتىر»، - دەپ ءتۇسىندىردى عاني بەيسەمبايەۆ.
ەسكە سالا كەتەيىك، 25 مامىردا وقۋ-اعارتۋ مينيسترلىگى قازاقستاندىق وقۋشىلار توبى روسارىپتەستىك باعدارلاماسى بويىنشا قىرىمعا كەتكەنىن ايتقان ەدى. بەلگىلى بولعانداي، بۇل ساپاردى پروفيلدىك ۆەدومستۆومەن كەلىسپەي ۇيىمداستىرعان.