وقيعانىڭ سەبەبىن انىقتاۋ ءۇشىن سىنامالار الىندى
الەۋمەتتىك جەلىلەرگە جۇرگىزىلگەن مونيتورينگ بارىسىندا قاپشاعاي سۋ قويماسىندا بالىقتاردىڭ قىرىلۋى تۋرالى بەينەماتەريالدار انىقتالدى. بۇل تۋرالى ەكولوگيا، گەولوگيا جانە تابيعي رەسۋرستار مينيسترلىگى ءمالىم ەتتى، دەپ حابارلايدى Almaty-akshamy.kz.
بالىقتاردىڭ قىرىلۋىنا اكەپ سوقتىرعان ءمان-جايلاردى انىقتاۋ ماقساتىندا بالقاش-الاكول وبلىسارالىق باسسەيندىك بالىق شارۋاشىلىعى ينسپەكسياسى ءوزارا ءىس-قيمىل سحەماسىنا سايكەس جانۋارلاردىڭ ءقاۋپىن جانە قىرىلۋىن انىقتاعان كەزدە، ۋاكiلەتتi ورگاندارعا دەرەۋ حابارلاندى.
«اتاپ ايتقاندا، وقيعا ورنىنا ينسپەكسيا قىزمەتكەرلەرىمەن بىرگە، الماتى وبلىسى اكىمىنىڭ ورىنباسارى ر.راقىمبەكوۆ، سونداي-اق اكىمدىككە قاراستى تابيعي رەسۋرستار جانە تابيعاتتى پايدالانۋدى رەتتەۋ باسقارماسىنىڭ قىزمەتكەرلەرى، مامانداندىرىلعان تابيعاتتى قورعاۋ پروكۋراتۋراسىنىڭ وكىلدەرى كەلدى. باسقا دا جاۋاپتى مەكەمەلەردىڭ ماماندارى جۇمىستىڭ باسى-قاسىندا بولدى. ناتيجەسىندە «اينا سۋ» جشس-نە بەكىتىلگەن ليەۆ تاۋى ايماعىنداعى قاپشاعاي سۋ قويماسى بالىق شارۋاشىلىعى ۋچاسكەسىنىڭ №11 جاعالاۋ سىزىعىندا جاس بالىقتاردىڭ قىرىلعانى بەلگىلى بولدى. ولاردىڭ جالپى سالماعى شامامەن 350-400 كگ بولادى»، - دەلىنگەن حابارلامادا.
وقيعانىڭ سەبەبىن انىقتاۋ ءۇشىن قونايەۆ قالاسى بويىنشا سانيتارلىق-ەپيدەميولوگيالىق باقىلاۋ دەپارتامەنتى، الماتى وبلىسى بويىنشا ەكولوگيا دەپارتامەنتى، «بالىق شارۋاشىلىعى عىلىمي-وندىرىستىك ورتالىعى» ج ش س جانە «قازگيدرومەت» رمك ماماندارى سۋ سىنامالارىن، سونداي-اق جاس بالىقتاردىڭ ۇلگىلەرىن الدى.
«قازىرگى ۋاقىتتا «اينا سۋ» ج ش س اڭ اۋلاۋ قىزمەتى ءولى بالىق شاباقتارىن ودان ءارى كادەگە جاراتۋ ءۇشىن جيناپ جاتىر. سۋ جانە جاس بالىقتاردى زەرتتەۋ ناتيجەلەرى بويىنشا قوسىمشا مالىمەتتەر ۇسىنىلاتىن بولادى»، - دەپ جازدى مينيسترلىكتەن.
قونايەۆ قالاسىنىڭ ءىىب-دا بالىقتاردىڭ قىرىلۋ فاكتىسى تىركەلدى.