الەۋمەتتىك جەلىلەردە ازاماتتاردىڭ جەكە دەرەكتەرىنىڭ تارالۋى تۋرالى اقپاراتقا بايلانىستى سيفرلىق دامۋ، يننوۆاسيالار جانە اەروعارىش ونەركاسىبى مينيسترلىگى تەكسەرىس جۇرگىزىپ جاتىر، دەپ حابارلايدى aqshamnews.kz
اقپاراتتىق قاۋىپسىزدىك كوميتەتى قۇقىق قورعاۋ جانە ارنايى ورگاندارمەن بىرلەسىپ، دەرەكتەردىڭ شىنايىلىعى مەن تارالۋ كوزىن انىقتاۋدا.
العاشقى تالداۋ مالىمەتتەردىڭ مەملەكەتتىك ەمەس، جەكە جۇيەلەردەن الىنۋى مۇمكىن ەكەنىن كورسەتىپ وتىر. مەملەكەتتىك اقپاراتتىق جۇيەلەردەن دەرەكتەردىڭ تارالۋى نەمەسە بۇزىلۋ فاكتىلەرى تىركەلمەگەن.
ەگەر ازاماتتىڭ دەرەكتەرى تارالسا، ول تۋرالى eGov پورتالى ارقىلى جەكە كابينەتىنە حابارلاما جىبەرىلەدى.
بۇعان دەيىنگى ۇقساس جاعدايلاردا اقپارات ەسكى دەرەكقورلاردان – كوبىنە قىزمەت كورسەتۋ ۇيىمدارى مەن ميكروقارجى قۇرىلىمدارىنان الىنعان.
مينيسترلىك جاعدايدى باقىلاۋدا ۇستاپ وتىر. قوسىمشا اقپارات تەكسەرىس اياقتالعاننان كەيىن بەرىلەدى.