ءجاسوسپىرىم 9 قاڭتاردا اقتوبە وبلىسىنان بۋراباي اۋدانىنا بالالار توبىنىڭ قۇرامىندا كەلگەن.
وقۋ-اعارتۋ مينيسترلىگى اقمولا وبلىسىنىڭ «بالداۋرەن» ساۋىقتىرۋ ورتالىعىندا 14 جاستاعى بالانىڭ قايتىس بولۋىنا قاتىستى تۇسىنىك بەردى، دەپ حابارلايدى Almaty-akshamy.kz.
«بالالاردىڭ قۇقىقتارىن قورعاۋ كوميتەتى ءتوراعاسىنىڭ ورىنباسارى جولداس باتىرحان لاگەرگە باردى.
بالالاردىڭ قۇقىقتارىن قورعاۋ كوميتەتى، ءبىلىم باسقارماسى، قۇقىق قورعاۋ ورگاندارىنىڭ وكىلدەرىنەن تۇراتىن ارنايى كوميسسيا قۇرىلدى.
قازىرگى تاڭدا قۇقىق قورعاۋ ورگاندارى تەرگەۋ شارالارىن جۇرگىزىپ جاتىر. ساراپتاما بالانىڭ قاتەرلى ىسىكپەن اۋىرعانىن كورسەتتى، ونىڭ سالدارى ىشكى قان كەتۋدى تۋدىرعان. قۇرىلعان كوميسسيا جۇمىسىن جالعاستىرىپ جاتىر»، - دەلىنگەن مينيسترلىك ۇسىنعان مالىمەتتە.
سونداي-اق وقۋ-اعارتۋ مينيسترلىگى وتباسىنا بارلىق قاجەتتى كومەك كورسەتىلەتىنىن، «بالداۋرەن» ساۋىقتىرۋ ورتالىعىنىڭ جانە بالالاردىڭ قۇقىقتارىن قورعاۋ كوميتەتىنىڭ ۇجىمى بالانىڭ تۋعاندارى مەن جاقىنىنا قايعىرا كوڭىل ايتاتىنىن جەتكىزدى.
اقمولا وبلىستىق پوليسيا دەپارتامەنتىنىڭ باسپا ءسوز قىزمەتىنەن ءمالىم ەتكەندەي، بالانىڭ قازاسى تۋرالى بۇگىن، 11 قاڭتاردا، ساعات 06:36-دا بۋراباي اۋداندىق پوليسيا بولىمىنە جەدەل جاردەم ستانسياسىنىڭ فەلدشەرى حابارلاعان.
«انىقتالعانداي، ءجاسوسپىرىم 9 قاڭتاردا اقتوبە وبلىسىنان بۋراباي اۋدانىنا بالالار توبىنىڭ قۇرامىندا كەلگەن. قاڭتاردىڭ 10-ىنان 11-ىنە قاراعان ءتۇنى ءجاسوسپىرىم ءىشى اۋىرىپ تۇرعانىن ايتقان. تاڭەرتەڭ ساعات 05:00 شاماسىندا اۋىرسىنۋدىڭ كۇشەيۋىنە بايلانىستى كەشەننىڭ مەديسينالىق بولىمىنە جۇگىنىپ، "جەدەل جاردەم" شاقىرىلعان. الايدا "جەدەل جاردەم" كەلگەنگە دەيىن بالا كوز جۇمعان. العاشقى تەكسەرۋ كەزىندە زورلىق-زومبىلىقتىڭ سىرتقى بەلگىلەرى بايقالعان جوق»، - دەدى ۆەدومستۆودان.
پد باسپا ءسوز قىزمەتىنەن اتاپ وتكەندەي، اتالعان فاكت سوتقا دەيىنگى تەرگەپ-تەكسەرۋدىڭ ءبىرىڭعاي تىزىلىمىنە تىركەلدى، ءتيىستى ساراپتامالار تاعايىندالدى. سونداي-اق وقۋ-ساۋىقتىرۋ ورتالىعىنىڭ اۋماعىندا سانيتارلىق-ەپيدەميولوگيالىق قىزمەت جۇمىس ىستەپ جاتىر.