وقۋ-اعارتۋ ءمينيسترى عاني بەيسەمبايەۆ وقۋ جىلىنىڭ اياقتالۋىنا وراي قۇتتىقتاۋ جولدادى.
«قۇرمەتتى ۇستازدار، وقۋشىلار، تۇلەكتەر جانە اتا-انالار!
سىزدەردى وقۋ جىلىنىڭ اياقتالۋىمەن شىن جۇرەكتەن قۇتتىقتايمىن. بۇگىن 3،7 ملن-نان استام وقۋشى وقۋ جىلىن اياقتاپ جاتىر. بيىل ءبىلىم بەرۋ تاريحىندا العاش رەت وقۋ كەزەڭى 31 مامىردا اياقتالىپ وتىر. پەداگوگتەردىڭ، اتا-انالاردىڭ، وقۋشىلاردىڭ، كادرلاردىڭ بىرلەسە قولداۋىنىڭ ارقاسىندا ءبىز وقۋ جىلىن تابىستى اياقتادىق. ءبىلىم ساپاسىن جاقسارتۋ قاجەتتىلىگىنەن تۋىنداعان بۇل وزگەرىستى تۇسىنىستىكپەن قابىلداپ، شىدامدىلىق پەن قولداۋ تانىتقان ءاربىر مۇعالىمگە، اتا-اناعا، وقۋشىعا شىن جۇرەكتەن العىس بىلدىرەمىن! بيىلعى مەكتەپ ءبىتىرۋ سالتاناتى بالالاردى قورعاۋ كۇنىمەن تۇسپا-تۇس كەلىپ وتىر. بالا - وتباسىنىڭ، قوعامنىڭ، مەملەكەتتىڭ ەڭ قىمباتتىسى، بولاشاعىمىزدىڭ ۇكىلى ءۇمىتى. بۇل مەرەكەلى كۇنى بالالارىمىزدىڭ بالالىق شاعىن قۇقىقتارى مەن مۇددەلەرىن قورعاۋدىڭ، ولاردىڭ جان-جاقتى دامۋى ءۇشىن تەڭ مۇمكىندىكتى قامتاماسىز ەتۋدىڭ ماڭىزدىلىعىن اتاپ وتكىم كەلەدى.
قىمباتتى وقۋشىلار، سىزدەردى وسى وقۋ جىلىندا بىلىمدە، سپورتتا، ونەردە، شىعارماشىلىقتا جەتىستىكتەرگە قول جەتكىزدىڭىزدەر. بۇل جەتىستىك شاكىر پەن ۇستازدىڭ بىرلەسكەن ەڭبەگىنىڭ جەمىسى. سوندىقتان بۇگىنگى جاقسى لەبىز بەن قۇتتىقتاۋلار دا ۇستازدار ءۇشىن ارنالادى. ءاربىر بالانىڭ جەكە تۇلعا رەتىندە بولاشاعىنىڭ نەگىزىن ءوز مەكتەبىندە قالاعانى بەلگىلى. اعارتۋشىلىق ميسسياسىن ادال اتقارىپ كەلە جاتقان ءاربىر پەدوگوگ ءارقاشان الەمدەگى ەڭ قۇرمەتتى مامان يەلەرى بولىپ قالا بەرەدى»، دەدى عاني بەيسەمبايەۆ.
سونداي-اق ول بۇگىن 11 سىنىپتى ءبىتىرۋشى 172 مىڭ تۇلەك ءۇشىن ومىرلەرىنىڭ ەڭ ماڭىزدى، جارقىن كەزەڭى باستالعانىن ايتتى.
«بۇل كۇن ءبىر جاعىنان قۋانىشتى بولعانمەن، ەكىنشى جاعىنان مەكتەپ ءبىتىرۋ ەمحاندارى الدىنداعى قوبالجۋلى ساتتەر. سىزدەردىڭ ءارقايسىلارىڭىز ۇلتتىق ءبىرىڭعاي تەستىلەۋدەن ءساتتى ءوتىپ، جاقسى ناتيجە كورسەتەدى دەپ سەنەمىن. كوللەدجدەر مەن كاسىپتىك تەحنيكا تۇلەكتەرى ءۇشىن دە جاڭا مۇمكىندىكتەرگە جول اشىلدى. سىزدەر ساپالى ءبىلىم الىپ قانا قويماي، ءوز بىلىمدەرىڭىز بەن بىلىكتەرىڭىزدى تاجىريبەدە قولدانۋدى ۇيرەندىڭىزدەر.
ءقادىرلى تۇلەكتەرىمىزگە اق جول تىلەيمىن! سىزدەر ەلىمىزدىڭ ۇلتتىق داستۇرلەرىن، تاريحي جانە مادەني قۇندىلىقتارىن قاستەرلەپ، ونىڭ عاسىرلارعا اماناتتالۋىنا جاۋاپتى بولاتىن، تاۋەلسىز قازاقستاننىڭ يگىلىگى ءۇشىن ەڭبەك ەتەتىن سانالى ۇرپاق بولادى دەپ سەنەمىن. ەمتيحانداردى ءساتتى تاپسىرۋلارىڭىزعا جانە بارلىق ماقساتتارىڭىزدىڭ ورىندالۋىنا تىلەكتەسپىن!»، دەدى مينيستر.