مينيستر كۋبوگىنىڭ جالپى جۇلدە قورى 10 ميلليون تەڭگە
2-24 مامىر ارالىعىندا تۇڭعىش رەت قازاقستان رەسپۋبليكاسى مادەنيەت جانە سپورت ءمينيسترىنىڭ كۋبوگى ءۇشىن كەشەندى جارىس وتەدى، دەپ حابارلايدى Almaty-akshamy.kz قازاقستان رەسپۋبليكاسى مادەنيەت جانە سپورت مينيسترلىگىنىڭ سايتىنا سىلتەمە جاساپ.
ەلىمىزدىڭ سپورت سالاسىنداعى 17 وقۋ ورنىندا ءتالىم الىپ جاتقان 2006-2007 جىلى دۇنيەگە كەلگەن جاسوسپىرىمدەر حالىق اراسىندا كەڭ تانىلعان سپورت تۇرلەرى – بوكس، دزيۋدو، گرەك-ريم جانە ەركىن كۇرەستەن كىم مىقتىنى انىقتايدى.
كوماندالىق باسەكەنىڭ ماقساتى – دارىندى بالالاردىڭ كوزگە تۇسۋىنە جاعداي جاساۋ، سپورت مەكتەپ-ينتەرنات-كوللەدجدەر اراسىنداعى باسەكەلەستىكتى ارتتىرۋ. جارىسقا تەك 2021-2022 وقۋ جىلىنا دەيىن قابىلدانعان شاكىرتتەر قاتىسا الادى.
بۇگىن ەلوردادا جەرەبە تارتۋ ءراسىمى بولىپ، 17 كوماندا 4 توپقا ءبولىندى. اتالعان كوماندالار نۇر-سۇلتان، الماتى، اقتوبە مەن تاراز قالاسىندا ءوزارا كۇش سىناسادى.
ءار توپتاعى كوماندالار اينالمالى جۇيە بويىنشا بىر-بىرىمەن كەزدەسەدى. قورىتىندى ناتيجە ءتورت سپورت ءتۇرى بويىنشا جەڭىپ العان مەدالدار ساپاسى بويىنشا انىقتالادى. تەك 1-ورىن العان كوماندالار جارتىلاي فينالعا شىعادى. وندا ا توبىنىڭ جەڭىمپازى س توبىنىڭ ۇزدىگىنە، ۆ توبىنىڭ مىقتىسى D توبىنىڭ جەڭىمپازىنا تۇسەدى. جارتىلاي فينال جانە فينال 22-24 مامىر ارالىعىندا نۇر-سۇلتان قالاسىنداعى ج.ۇشكەمپىروۆ اتىنداعى جەكپە-جەك سارايىندا وتەدى.
«الداعى ۋاقىتتا «مينيستر كۋبوگى» ساراپقا سالىناتىن سپورت تۇرلەرىنىڭ سانىن كوبەيتۋگە تىرىسامىز. مۇنداعى ماقسات – سپورت مەكتەپ-ينتەرنات-كوللەدجدەر اراسىنداعى باسەكەلەستىكتى ارتتىرۋ. وسى كەشەندى جارىس بىزگە ءار سپورت تۇرىندەگى بىلىكتى باپكەرلەردى انىقتاۋعا كومەكتەسەدى، دەپ سەنەمىز. سونىمەن قاتار ارناۋلى وقۋ ورىندارىنداعى وزەكتى ماسەلەلەردى انىقتاپ، مىندەتىن ايقىندايمىز، دەپ ويلايمىن»، - دەپ ايتتى مسم سپورت جانە دەنە شىنىقتىرۋ ىستەرى كوميتەتى ءتوراعاسى سامات ەرعالييەۆ جەرەبە تارتۋ ءراسىمى كەزىندە.
مينيستر كۋبوگىنىڭ جالپى جۇلدە قورى 10 ميلليون تەڭگە. 1-ورىن العان كومانداعا - 5 ملن، 2-ورىنعا – 3 ملن، 3 ورىنعا – 2 ملن. تەڭگە بەرىلەدى.
ايتا كەتەيىك، جارىستىڭ باس تورەشىسى: بەكبولات بايجانوۆ – ق ر مسم سپورت جانە دەنە شىنىقتىرۋ ىستەرى كوميتەتى ءتوراعاسىنىڭ ورىنباسارى؛
جارىستىڭ باس حاتشىسى: ورالباي جاقسىمبەتوۆ – رەسپۋبليكالىق سپورتتى دامىتۋ ديرەكسياسى ديرەكتورىنىڭ ورىنباسارى.