جاڭا قولداۋ قۇرالدارى شەڭبەرىندە وتو-مەن شارت جاساسۋ كولەمى 40%-عا ارتتى
پرەمەر-مينيستر ولجاس بەكتەنوۆ AMANAT پارتياسى فراكسياسىنىڭ كەڭەيتىلگەن جيىنىندا ۇكىمەت ەلىمىزدىڭ تۇراقتى دامۋىن قامتاماسىز ەتۋ جانە مەملەكەت باسشىسىنىڭ 2029 جىلعا قاراي ەكونوميكا ءوسىمىن $450 ملرد-قا دەيىن جەتكىزۋ جونىندەگى العا قويعان مىندەتىنە قول جەتكىزۋ ءۇشىن ەكونوميكا قۇرىلىمىن وزگەرتۋ بويىنشا جۇمىس ىستەپ جاتقانىن اتاپ ءوتتى.
ەكونوميكالىق پاتريوتيزم قاعيداتى ۇكىمەتتىڭ نەگىزگى باسىمدىعى بولىپ بەلگىلەندى.
«ءبىز قاشان دا وتاندىق وندىرۋشىلەردى قولدايمىز. مەملەكەتتىك ساتىپ الۋ شەڭبەرىندە تەك قانا جەرگىلىكتى وندىرۋشىلەردەن ساتىپ الىناتىن تاۋارلاردىڭ تىزبەسى ەداۋىر كەڭەيتىلدى. سونىڭ ىشىندە حيميا ونەركاسىبى، قاعاز ونىمدەرى، ماشينا جاساۋ جانە جەڭىل ونەركاسىپ سالالارىندا وتاندىق ونىمدەردى ساتىپ الۋ كولەمى ايتارلىقتاي وسۋدە. قورىتا ايتقاندا، وتاندىق كاسىپورىندارمەن جاسالعان شارتتاردىڭ سانى 1،4 ەسەگە ۇلعايىپ، جالپى سوماسى 40%-عا ءوستى»، — دەپ اتاپ ءوتتى ولجاس بەكتەنوۆ.
اتاپ ايتقاندا، سولتۇستىك قازاقستان وبلىسىنداعى «رادۋگا» كومپانياسىنىڭ وندىرىستىك جۇكتەمەسى بيىلعى 7 ايدىڭ ىشىندە 12%-دان 100%-عا جەتكىزىلدى. پاۆلودار وبلىسىنداعى بوياۋ ونىمدەرىن شىعاراتىن «لاكرا» كاسىپورنىنىڭ جۇكتەمەسى 70%-عا دەيىن ءوستى. ال، «جايلى مەكتەپ» ۇلتتىق جوباسى استانالىق «Metal Former» كومپانياسىن 100%-عا جۇكتەۋگە مۇمكىندىك بەردى.
سونىمەن قاتار «سامۇرىق-قازىنا» قورىنىڭ كومپانيالار توبى، جەر قويناۋىن پايدالانۋشى باسقا دا ءىرى سۋبەكتىلەر وتاندىق وندىرۋشىلەرمەن 635 ملرد تەڭگە سوماسىنا 382 كەلىسىمشارت جاساستى.
ەكونوميكا ءوسىمىن ىنتالاندىراتىن نەگىزگى قۇرالداردىڭ ءبىرى دەپۋتاتتاردىڭ قولداۋىمەن قابىلدانعان «مەملەكەتتىك ساتىپ الۋ تۋرالى» زاڭ بولدى. بۇل وندىرۋشىلەردىڭ مۇمكىندىكتەرىن ەداۋىر كەڭەيتەدى جانە ساتىپ الۋ سالاسىنداعى زاڭسىز ارەكەتتەردىڭ الدىن الادى. زاڭ اياسىندا ءبىرىڭعاي ساتىپ الۋ پلاتفورماسى ىسكە قوسىلدى.
تاۋارلاردىڭ شىعارىلعان ەلىن ايقىنداۋ ماسەلەلەرى بويىنشا زاڭ جوباسى ءماجىلىستىڭ قاراۋىندا جاتىر. ول ءىرى كاسىپورىندار ءۇشىن جەرگىلىكتى وندىرۋشىلەرمەن ۇزاقمەرزىمدى شارتتار، وفتەيك-كەلىسىمشارتتار جاساسۋ، سونداي-اق ەلىشىلىك قۇندىلىقتى دامىتۋ باعدارلاماسىن ەنگىزۋ بويىنشا مىندەتتەمەلەردى كوزدەيدى.